थ्वहे मंसीर १४ निसें १६ गते तक येँ-गोर्खा-लमजुंग न्हूदँ भिंतुना मोटरसाइकल र्याली जुइगु

झीगु संवाददाता

येँ, कछलाथ्व एकादसि ।

ने सं ११३९ न्हूदँया लसताय् नेवाः भोलन्टियर्सं सिन्हः स्वां खलःया गुहालिइ ग्वःगु ग्वसालं थ्व हे वइगु मंसीर १४,१५ व १६ गते येँ गोर्खा लमजुंग तक न्हूदँ भिंतुना मोटरसाइकल र्यालीया ग्वसाः ग्वःगु दु ।

नेपाःया राष्ट्रिय व मौलिक संवत् छ्यलेया नितिं प्रचारप्रसार यायेगुया लिसें स्वनिगलं पिने च्वनाच्वंपि नेवाःतय्त न्हूदँया भिंतुना बिइगु व येँया सांस्कृतिक ज्याझ्वः न्हयब्वयेगु तातुनागु खँ ग्वसाः खलः व समितिया स‌ंरक्षक मनोज नेवाः खड्गीजुं झीगु डटकमयात कनादीगु दु ।

थुकथं थःगु भाषा, कला व संस्कृतिया विकास यायेगु व प्रचार प्रसारयाना न्हूगु पुस्तायात झीगु मौलिक संवत् या लिसें नेपालभाषाया अले झीगु नेवाः कलाःयात सकभनं न्यंकेगु व इमिके नं लिकुना वना च्वंगु नेवाः पहःप्रति नुगः क्वसायेकेगु थ्व न्हूदँया लकस तःधंगु तिवः जुइगु खँ वय्कलं धयादीगु दु । नापनाप‌ं थुकथ‌ंया ज्याझ्वलं येँपाखें तापाक्क च्वनाच्वंसां नेवाः नेवाः दथुइ भाइचाराया स्वापू नं क्वातुया वनिगु व संस्कृतिया अादानप्रदान जुइगु न‌ं बांलागु ह्वताः खः धयादी ।

थ्व हे तातुनां सिन्हं स्वां खलःपाखें विगत २० दँ निसें थज्यागु ज्याझ्वःया ग्वसाः ग्वया वयाच्वनागु खँ न्ह्यथ‌ंसें थ्व मात्र न्ह्यइपुकेगु जक मखसें झी स्वनिगलय् थःगु ज्याखँय् जक तक्यना च्वंपिन्त न्हूदँया लसताय् स्वनिगलं पिने यंकाः छुं याउँकेगुया लिसें नेपाःया हे थी थी बांलागु व न्ह्याइपुगु थासय् यंकाः आन्तरिक पर्यटनया लागाय् नं तिवः बिइगु कुतः खः धयादी ।

https://www.facebook.com/rajendra.manandhar.7906

झीगु डटकमलिसे खँ ल्हायेगु झ्वलय् हे वय्कलं इलं साथ बिल धाःसा न्हूदँया र्याली झाःपिन्त बन्दिपुर नं यंकेगु जुइ धयादीगु दु ।  लिसें थःगु टिकटया नितिं ग्वसाः खलःपाखें ल्यया तःपिं व्यक्तिपिन्त स्वापू तयाः थःगु थाय् सुरक्षित यायेत नं इनाप यानादीगु दु ।

र्याली थ्व हे वइगु कछलागा अष्टमी कुन्हु बसन्तपुरया दबुलिं सुथसिया ७ ता इलय् न्ह्याइगु धाःगु दु । टिकटया नितिं निरन श्रेष्ठ ९८२३१०९९८१ कजि भिंतुना मोटर साइकल र्याली (स्वनिगः पिने), हिराकाजी महर्जन ९८५१०५५४४८ कजि आर्थिक, कबि महर्जन किपू लागाया नितिं, शैलेन्द्र बज्राचार्य ९८४१३०३३४७ यल लागाया नितिं धकाः धयातःगु दु ।

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.