fbpx

थौं श्री करुणामय बुँग द्यःयात पुच्वःय् बिज्याकीगु

रेखा शाक्य । झीगु संवाददाता

११३९ बछला थ्वः पारु/ यल

स्वनिगःया दकलय् ताःहागु जात्रा कथं नाला तःगु बुंगद्यःया जात्रा थनिंनिसें शुरु जुइत्यंगु दु । बौद्धमार्गी, हिन्दू, बैष्णवी व शैव (नाथ सम्प्रादय) यापिन्सं तकं थःथःगु कथं आस्था कथं हना वयाच्वंगु दु बुंगद्यःयात ।

किपा रेखा शाक्य

विशेष याना अन्नया द्यः अले सकलसित कल्याण याइम्ह द्यः कथं करुणमयया रुपय् हना वयाच्वंगु दु । थौं बुंगद्यःयात रथय् बिज्याकेवं थ्व जात्रा विधिवत रुपं न्ह्यागु तायेकी ।  द्यःयात रथय् बिज्याकूगुया स्वन्हु लिपा बछलाथ्व चौथी बुधवाः कुन्हु द्यः सालेगु ज्या जुइ ।

यलय् बुंगद्यःयात रथय् तइगु छन्हु न्ह्यः कुरुवाः दहलय् नं तःजिक पुजाआजा जुइ । बुंगद्यःयात भारतया कामारुकामाक्षं नेपाः हःगु लसताय् कुरुवाः दहलय् चच्छि उकथं पुजा याइगु खः ।

किपा रेखा शाक्य

थौं भम्बःया रुपय् दुम्ह द्यःयात कलशय् तयाः यलय् हइ । थथे कुरुवाः दहलं भम्बयात वहःया कलशय् तयाः हयेगु परम्परा यलया ललिचा ज्यापूया सन्तति (मालिनी) पाखें आः तकं पूवंकाच्वंगु दनि । उकथं ह्याउँगु जनिखय् चिनाः प्वाथय् घानाः हइगु भम्ब रुपि कलशयात लसकुसयाना दुकयाः तःबहालय् च्वंगु बुँगया देगलय् पलिस्था याइ ।

 

अन हाकनं पुजा यायेमाःगु विधि पूवंकालि शार्दुलगणया गुरुजुया पल्टनया लिसें थी थी बाजागाजा थानाः जुजुया प्रतीक खड्ग न्ह्यः न्ह्यः तया सकलें भक्तजनपिं नापनापं द्यःयात चिधंगु खतय् तयाः पुच्वय् दयेका तःगु तःधंगु रथय् बिज्याकी । थौं हे सकल भक्तजनपिन्सं द्यः खतय् बिज्यागु लसताय् व मदुपिनिगु लुमन्तिइ १०८ प्वाः देवा नं च्याकेगु ज्या याइ ।

किपा रेखा शाक्य

Leave a Reply

Your email address will not be published. Required fields are marked *