fbpx

थौं मां या ख्वाः स्वयेगु दिं

रेखा शाक्य । झीगु सम्वाददाता

११३९ चौला गाः आमै

थौं चौलागा आमै । दँय्दसँ थें थौंया दिंयात मांयात लुमंकेगु दिं कथं हनेगु याइ । थौंया दिं सकलसिया नितिं विशेष दिं खः । थौं मांया ख्वाः स्वयेगु दिं । वैदिक परम्पराय् लौकिक द्यःपिनिगु वर्णन याना तःगु दु । उकियात हे लिधंसा कायेगु खःसा झीसँ कया वयागु शिक्षाय् प्यंगू वर्गयात द्यः समान धकाः धायेगु याना वयाच्वनागु दु । मां, अबु ,गुरु व अतिथि वर्ग।

थुपिं प्यंगू वर्ग मध्येय् छगू वर्गयात लुमंका श्रद्धा तयेगु दिं खः थौं । मांया ख्वाः स्वयेगु, मातातिर्थ औंसी, मातृऔंसी आदी नामं थौंयात व्याख्या याना तःगु दु । मांया बलिदान व प्रसव पिडाया सम्मानया ल्याखं सकसिनं मांयात सम्मानयाना थौंया दिं हनीगु खः ।

किपा शरण डंगाेल

थौं मांया ख्वाः स्वयेगु दिं जुगुलिं मां दुपिन्सं मांयात यःगु थी थी नसाज्वलं, सिसाबुसा, अनेक हलंज्वलं तयाः ख्वाः स्वयेगु याइ । अथे हे मां मदुपिन्सं थासं थासय् द्यःयाथाय् वनाः अन सिदा दान बिइगु चलन दु । चन्द्रागिरी नगरपालिका लागाया दक्षिण पश्चिमय् च्वंगु मातातिर्थय् तःधंगु मेला नं जुइ । अन मां मदुपिन्सं मांया नामं श्राद्ध नं याइसा अनया कुण्डय् म्वःल्हुइगु नं याइ ।

किपा शरण डंगाेल

पुलांगु जनविश्वास कथं न्हापां जंगल जक अन । आपालं मस्त बस्तुभाउ ज्व वनेगु थाय् व । छन्हु छम्ह मचा बस्तुभाउ ज्व वनेगु झ्वलय् अन हे कुण्ड लिक च्वना मरि नःगु जुयाच्वन । मचाया मह्रि व हे कुण्डय् कुतुंवंगुलिं क्वछुना स्वःगु बखतय् थः मदये धुंकुम्ह मांया छवि खनेवं मांयात नं नापं छेँय् ज्वना वनेगु धाल । उबलय् मचायात मामं छं जक मखु थः मां मदुपिनि सकस्यां मांया दर्शन यायेत दच्छिया छक्वः थ्व हे कुण्डय् दर्शन याये खनि धकाः धाःगु जुयाच्वन । उबलय् निसें उगु कुण्डय् चौलागाः आमाइया दिं कुन्हु मां मदुपिं वइगु  चलन जूगु खः धइगु न्यनेदु ।

Leave a Reply

Your email address will not be published. Required fields are marked *