थौं ब्राजिल, मेक्सिको, बेल्जियम व जापानया रणनिती छु जुइ ?

 

११३८ तछला गाः चाैथी

थौंया कासा ब्राजिल विरुद्ध मेक्सिको ७ः४५ ताःइलय् व बेल्जियम विरुद्ध जापान ११ः४५ ताःइलय जुइ ।

समारा (रुस), । विश्वकप फुटबल कासाय् मेक्सिकोयात सकसिगु नुगः सालेगु चरण क्वाटरफाइनल खः धाःसां पाइमखु । उकिं मेक्सिकालीपिन्सं विश्वकपय् ‘क्विन्टो पार्टिडो’ नारा घन्केयायेगु याः । गुकिया अर्थ जुइ न्याक्वःगु चरणया, क्वाटरफाइनल ।

न्हापाया खुगू विश्वकपय् मेक्सिकों समूह चरण पार याःगु दु । तर मेक्सिकों थुपिं दक्वं संस्करणय् अन्तिम १६ स्वयां च्वय्या यात्रा याये मफुत । यदि मेक्सिकों थौं सोमबार नेमार व वयागु टिम ब्राजिलयात बुके फत धाःसा मेक्सिकालीपिनिगु क्विन्टो पार्टिडोया लक्ष्य पूरा जुइगु जुइ । तर उपाधिया प्रमुख दावेदार ब्राजिलयात मेक्सिकों बुके फइला धकाः धयाच्वंपिं म्हो जक दु  । ब्राजिल सर्वाधिक न्याक्वः तक विश्वकप त्याकुगु राष्ट्र खः ।

किपा गुगल

खय्तला समूह चरणय् मेक्सिकों गत विजेता जर्मनीयात १–० गोलं बुकाः इतिहास दयेके धुंकुगुु दु । प्रतिस्पर्धात्मक कासाय् जर्मनीविरुद्ध मेक्सिकोया थ्व न्हापांगु जित खः । उगु हारं लिपा जर्मनी समूह चरणपाखें हे बिदा जुगु खः ।

ब्राजिलविरुद्ध म्हितेगु इलय् जिपिं नकआउट चरणय् थ्यंगु व न्याक्वःगु चरणसिबें छगू कासा जक तापागु प्रेरणा ज्वना म्हितेगु जुइ , जिपिं कठिन समूह पार यानाः थन थ्यंगु खः, आः थन सिबें गुलि तापाक वनेगु धइगु जिमिगु ल्हातय् दु – मेक्सिकोया कप्तान एन्द्रिज ग्वारडाडों धाल् ।

मेक्सिको समूह चरणया लिपांगु कासाय् स्वीडेनलिसे ३–० गोलं बांमलाक बूगु नतिजां धुनेवं ब्राजिलविरुद्ध म्हितेत्यंगु दु । दक्षिण कोरियां जर्मनीयात २–० गोलं स्तब्ध यायेधुंकाः जक मेक्सिको अन्तिम १६ य् थ्यनेत सफल जुगु खः । उगु पुचलय् शीर्ष स्थानय् दुम्ह स्वीडेनं स्विट्जरल्यान्डविरद्ध मेगु प्रिक्वाटरफाइनल म्हितिगु जुइ ।

किपा गुगल

वंगु संस्करणय् ब्राजिल व मेक्सिको छगू हे पुचलय् लाःगु खः । थुपिं निगू टिम दथुया कासा गोलरहित क्वचाःगु खः । यद्यपि व सिबें न्ह्यः नं विश्वकपय् थुपिं निगू टिम दथुइ स्वक्वः तक भिडन्त जुइ धुंकुगु दु । थ्व दक्वं कासाय् बाज्रिल विजयी जूगु खः । जिमिसं जर्मनीयात नं विश्वकपय् गबलें बुकागु मदु तर जिमिसं थुगु पालय् इमित बुके फत धाःसा जिमिसं न्हूगु इतिहास च्वयेगु जुइ । जिपिं फयांफत्तले दक्वं उपलब्धि कायेगु कुतलय् दु । बाज्रिलनाप मत्याइगु धयागु तथ्यांक व इतिहास जक खः तर कासा शुरु जुइधुंकाः थुकिया मैदानय् छुं अर्थ दइमखु – ग्वार्डाडों धाल ।

सन् १९८६ स थःगु भूमिइ जुगु विश्वकप धुंकाः मेक्सिको क्वाटफाइनलय् थ्यने फुगु मदुनि ।। मेक्सिकों वंगु इलय् ब्राजिलयात सन् २०१२ य् जुगु प्रदर्शनी कासाय् बुकुगु खः । ८४ हजार दर्शकया न्ह्यःने जुगु उगु कासाय् मेक्सिको २–० गोलं विजयी जुगु खः ।

ब्राजिल बिरुद्ध म्हितिगु इलय्  मेक्सिकोया डिफेन्डर हेक्टर मोरानोया सेवा प्राप्त जुइमखु । मोरानो निगू म्हासुगु कार्डया कारवाहीलय् दु । यद्यपि ब्राजिलं नं चोटया समस्यां छुं छुं कासामियात मैदानय् हयेफइगु स्थितिइ मदु ।

डगलस कोस्टा व मार्सेलां शुक्रबार टिमय् च्वना अभ्यास मयाः । सर्वियाविरुद्ध चोटया कारण मम्हितुम्ह डानिलों धाःसा टिमलिसिें प्रशिक्षणय् ब्वति काल । डानिलो कम्मरया चोट, मार्सेले जँन्हुफाःया समस्या व कोस्टा खम्पाया चोटं ग्रसित जुयाच्वंगु दु ।

मार्सेलों ट्टिवरय् च्वःगु दु – सकसिनं जितः भिं मनतुना बिया च्वयाहःगु सन्देशया नितिं सुभाय दु । अथेहे द्यःयात नं सुभाय् जिगु चोट उलि गम्भीर मदु ।

मेक्सिकोया प्राय कासामि, वया परिवार व प्रशिक्षक हुँवा कार्लोस ओसोरियो शुक्रबार रुसया रमणीय थासय् ताः ई तक हे चाहु वंगु खः ।
ब्राजिलया कासामि नं अभ्यास धुंकाः थः मस्तलिसे यक्वः ई छ्याःगु खः । उकिं थुपिं निगूलिं टिमया कासामियात प्रशिक्षकले पारिवार मैत्री वातावरण ब्यूगु दु ।

 

विश्वकप फुटबल कासाय् लगातार निगूगु संस्करणय् बेल्जियमं थःगु शानदार फुटबल म्हितेगु शैली सहित समूह चरणय् स्वंगू जीत ल्हातय् लाकुगु दु । विश्व फुटबलय् बेल्जियमयात तःधंगु सम्मान बिया तःगु दु । तर बेल्जियमं विश्वकपय् थःगु छवि अनुरुप नतिजा हयेफुगु मदुनि । वंगु न्हापाया संस्करणय् बेल्जियम क्वाटरफाइनलय् बुगु खः । थुगु खुसिइ बेल्जियमपाखें कम्तीइ नं सेमिफाइनल तकया अपेक्षा यानातःगु दु । अथे जुल धाःसा सन् १९८६ य् बेल्जियमं सेमिफाइनल म्हिता तःगु कीर्तिमानया बराबरी जुइ ।

किपा गुगल

समूह जी या विजेता जुम्ह बेल्जियमं सोमबार प्रिक्वाटरफाइनलय् समूह एचया उपविजेता जापानविरुद्ध रोस्टोभ–अन–डनय् म्हितिगु जुइ । कोलम्बिया, पोल्यान्ड व सेनेगल नं दुगु कठिन समूहपाखें जापान नकआउटय् थ्यंगु खः । उकिं प्राविधिकरुपं थःसिबें बल्लागु बेल्जियमविरुद्ध म्हितुगु इलय् जापान पक्कां नं ग्याइ मखु ।

चालू विश्वकपय् बेल्जियमं नं कासा औसतय् स्वंगू गोल याःगु दु । इङगल्यान्डविरुद्ध ९म्ह कासामिपिंन्त हिउपाः हयाः म्हिता नं बेल्जियमं जित ल्हातय् लाकुगु खः । जापानं धाःसा बल्लतल्ल समूह चरण पार याःगु खः ।

समूह चरणया लिपागु दिनय् कोलम्बियां सेनेगलयात १–० गोलं बुके धुंकाः जापानया भाग्य चम्के जुगु खः । उगु हे चान्हय् छगू हे इलय् जुगु कासाय् पोल्यान्डलिसे जापान १–० गोलं पराजित जुगु खः । थ्व नतिजां कोलम्बिया स्वंगू कासायानाः छ अङ्क कयाः समूह विजेता जुल । जापान व सेनेगलया समान चार अङ्क व गोल अन्तरय् लात । तर फिफा फेयर प्ले नियम कथं निगू म्हासुगु कार्ड कम जक काःगुलिं जापान नकआउट चरणय् थ्यनेत योग्य जुल धाःसा सेनेगल हिस्स जुल ।

फिफा फेयर प्ले नियम कथं नकआउट चरणय् थ्यंम्ह जापान न्हापांगु टिम जुल । एसियाली राष्ट्र जापानं न्याक्वंगु सहभागिताय् स्वक्वःगु खुसिइ समूह चरण पार याःगु खः ।

किपा गुगल

जापानं आः कासाया हे तसकं सन्तुलित व पूर्ण टिमविरुद्ध म्हितिगु जुइ । बेल्जियमया गोलरक्षक थिबाउट कोर्टोइस विश्वया हे सर्वश्रेष्ठ गोलरक्षकमध्ये छम्ह खः । अन्य बांलापिं गोलरक्षकया थःगु क्षमतां चुलुयाच्वंगु अवस्थाय् कोर्टोइसपाखें आः तक अज्यागु गल्ती जुगु मदुनि । बेल्जियमया आक्रमणय् नं सिर्जनात्मक विश्वस्तरीइ कासामिपिनिगु जमात दु । गुकिइ दकलय् अप्वः न्ह्यःने इडेन हजार्ड व रोमेलु लुकाकुया नां वइ ।

शारीरिकरुपं बल्लाम्ह मात्र २५दँया स्ट्राइकर लुकाकं ४० अन्तर्राष्ट्रिय गोल याये धुंकुगु दु । चालु विश्वकपय् चार गोल सहित व गोल्डेन बुटया दावेदार खः । व स्वयां न्ह्यः इङ्गल्यान्डया स्ट्राइकर हेरी केन जक दु । लुकाकु सरह पोर्चुगलया क्रिस्टियानो रोनाल्डों नं ४ गोल याःगु दु । तर रोनाल्डोया टिम पोर्चुगल कासां बिदा जुइ धुंकुगु दु ।

जापानविरुद्ध म्हितिगु इलय् लुकाकु थःगु गोलसङ्ख्या अप्वःयेकेगु कुतलय् जुइ । हजार्ड, मिडफिल्डर केभिन डि ब्रयन व विन्गर ड्राइज मार्टेन्स सिर्जनात्मक कासामि जुगु हुनिं नं लुकाकु समक्ष गोल यायेगु यक्व अवसर वयेफु । मार्टेन्स–लुकाकु–हजार्डया आक्रमण समूह आः विश्वकपय् दकलय् खतरनाक व स्वये बहःपिं कासामि कथं कयाच्वंगु दु ।

जापानया प्रशिक्षक अकिरा निसिनों ब्राजिलया आक्रमणयात पनेत रणनीतिसहित म्हितेगु धाःगु दु । यद्यपि वयात थ्व ज्या धाःसा उलि अपुइ मखु । हजार्डयात शान्त यात धाःसां अन्उ विविध खतरात दु । डि ब्रुयनयात सटिक पास बिइम्ह कासामि कथं म्हसिउ । वयागु ताःहाकगु दुरीया पास व क्रसत तसकं हे खतरनाक जुइगु याः । मार्टेन्सया म्हितिगु शैली मेपिं सिबें तसकं हे फरक दु । मैदानय् वयागु तुति व दिमाग तकसं हे ब्वाँय् वनेगु याः । वंगु निगू सत्रय् मार्टेन्सं इटालियाली सिरि एमा नापोलीया नितिं ५६ गोल यागु दु ।

जापानी टिमय् नं प्रतिभाशाली व अनुभवी आक्रामक कासामि दु । म्यान्चेस्ट युनाइटेडया पूर्व फरवार्ड सिन्जी कागावा व लोकप्रिय केसुकी होन्डां बेल्जियमविरुद्धया कासाय् थःगु अनुभवया प्रयोग याये मालिगु जुइ । ३१ अन्तर्राष्ट्रिय गोल याये धकुम्ह कागावां प्लेमेकरया भूमिकाय् म्हितिगु सम्भावना दु । होन्डा धाःसा आः न्हापांगु रोाजईय् नियमित रुपं लायेफुगु मदुनि ।

यद्यपि ३२ दँया एसी मिलानया पूर्व स्ट्राइकर आः नं फ्रिकिकय् तसकं खतरनाक दु । आक्रममक डिफेन्डर हिरोकी साकाई नं बेल्जियमविरद्ध कासाय् स्वयेबहःम्ह कासामि जुइ । बेल्जियमविरुद्ध म्हितिगु इलय् योसिनोरी मुटो व युया ओसोकामध्ये छम्ह याकः स्ट्राइकरया भूमिकाय् जुइ ।

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.