fbpx

थौं अक्षय तृतीया – साखःति त्वनेगु, तछ्वचुंया चप्पा नयेगु दि‌ं

रेखा शाक्य । झीगु सम्वाददाता

ने सं ११३९ बछला थ्वः तृतीया

बछला थ्वः तृतीया अर्थात वैशाख शुक्ल तृतीयाया दिं थौं । थौंया दिंयात अक्षय तृतीया नं धाइ । दँय्दसं थौैया दिनय् म्वः ल्हुयाः अप्सं च्वना, दान, होम, जप यानाः द्यःयाथाय् वनेगु याइ । थौंया दिनय् यायेगु छुं नं धर्मकर्म व दान गबलें नाश मजुइगु धापू दु । थुलि जक मखु थुगु जुनीयात जक मखु मेगु जुनीयात नं धर्म सञ्चय जुइगु धइगु अजाअजिपिनि जनविश्वास दु । उकिं थौंया दिनय् यायेगु पुण्य् वा दान नष्ट मजुइगु हुनिंयानाः हे थौंया न्हियात “अक्षय तृतीया”  धायेगु याःगु खः ।

थुगु दिं कुन्हु विशेषयानाः “साखःति त्वनेगु न्हि” धकाः नं धायेगु याः । छेँखापतिं साखःति दयेकाः द्यःयात छायेगुया लिसें त्वाः चुक, ननि, बहाः बहीलय् व लँजुवायात नं साखःति त्वंकाच्वनेगु नं झी नेवाःतय्गु चलन दु । साखःति दयेकेगु धकाः लखय् साखः, यला, सुकुमेल, मलय्, दालचिनी, सुंपालु, पिपि, नैंक्याया ति अले स्वाद कथं अन्य मसला तयाः दयेका तइगु खः ।

थुगु दिं विशेष थ्व अर्थय् नं खः कि थौंंया दिनय् तताजि योग चुलाना च्वंगु कथं काइ । जुजु भगिरथया तपस्यापाखे भगिरथी गंगा पृश्वी क्वब्वाना बिज्यागु, विष्णुया न्हय्गु अवतार श्री परशुराम बूग दिं, महाद्यः व पार्वतीया इहिपाया दिं, महाद्यःपाखें विष्णु द्यःयात वरदान व ब्रम्हां मखुगु खँ ल्हागुलिं श्राप ब्यूगु दिंया लिसें थ्व दिं कुन्हुनिसें हे सत्ययुग क्वचायाः त्रेतायुग शुरु जूगु धइगु थी थी धर्मशास्त्र, पुराण व ज्योतिशास्त्रय् न्ह्यथना तःगु दु ।

तःताजिं बांलागु व भिंगु ज्याखँया दिं कथं कयाः तःगुलिं आः तक नं नेवाः समाजय् थौंया दिनय् छुं नं कथं भिंगु ज्या गथेकि इहिपा, मचा जंक्वः छेँया जग तयेगु, छुं नं बांलागु ज्याया शुरुयायेगु, सत्पुजा यायेत साइत हे स्वयेम्वाःगु भिंगु दिं कथं नालावयाच्वंगु दु ।

नेवातय् नखःचखः हनेगुया नं थःगु कथंया हे ग्यसुलाःगु अर्थ कथं हनेगु चलन दु । ई ब्यःयात स्वयाः नखःचखः हनेगु व थी थी नसाज्वलं नयेगु याना तःगु हे नेवाःतय् मौलिक परम्परा खः । अथे हे अक्षय तृतीया नं तान्वःगु इलय् लाःगु दिं खः । धाइ नापं दु अक्षय तृतीया वल आः झन तान्वइ । उकिं न्हापालिपा मनइगु तछ्वचुंया चप्पा, साखःति थौंया दिनय् नयेगु चलन दु । ऋतु विज्ञान व भैषज्यहशास्त्रकथं साखःतिं म्हःयात ख्वांउकेगु ज्या याइसा तछ्वचुंलं कथु स्याइगु ल्वय् व पित्तया ल्वय् लंकी धाइ ।

Leave a Reply

Your email address will not be published. Required fields are marked *