थेचोय् परम्परागत रुपं माधवनारायण जात्रा

११३८ सिल्लाथ्व द्वादशी

झीगु संवाददाता । यलया थेचोय् नं परम्परागत रुपं महाद्यःया जात्राया लिसें सहस्रधारा हायेका पर्व हन । दँयदसं पोहेलाथ्व पुन्हिनिसें न्ह्यानाच्वंगु लच्छितकया माधवनारायणया धलं दनेगु झ्वलय् थेचोवासीपिन्सं थःगु हे कथं थुगु दिंयात हंगु खः । थुगु दिं कुन्हु सुथय् हे थेचोया पिंगद्यःयाथाय् स्थानीयवासीपिं बां ज्वना पुजाआजा या वंगु खः ।

थेचाेय् माधवनाराण जात्रा हनेगु झ्वलय् स्थानीयवासीपिं पिगनय् बां ज्वना द्यके वया च्वंगु । किपा रेखा शाक्य

थेचोवासीपिनी थौं द्यः पुजायाना समय् वा भ्वय् नयेमाःगु चलन दु । थौं हे महाद्यःया प्रतिक शिवलिंगयात छाय्पिया खतय् तया पिगनय् हःगु खः ।

थेचाेय् माधवनाराण जात्रा हनेगु झ्वलय् माद्यःया खः हया च्वंगु । किपा रेखा शाक्य

विशेषयाना सहस्रधारा हायेकेया नितिं मिजंपिं निम्ह न्ह्यःने च्वना (चाया कसिइ प्वाः खना ह्वतय् छ्वाली दुछ्वया दयेका तःगुयात पंकथि निपूया दथुइ घाका  तःगु खः गुकियात ब्वहलय् कुबिया कसिइ ज्वना लः फ्वंवनीगु खः) अथेहे मेपिं मिजंपिन्सं थःगु छ्यनय्, ब्वहलय् व ल्हापाय् सौखय् सलिइ दिका उकि इता चिकं तयाः बाजागाजाया लिसें महाद्यःया खः नापनापं तयाः पिगं द्यः चाहुला थुगु जात्रा न्ह्याकूगु खः ।

थेचाेय् माधवनाराण जात्रा हनेगु झ्वलय् सहस्रधारा हायेका च्वंगु । किपा रेखा शाक्य

थेचो लाछिया ब्रम्हायणी द्यःया लिसें मेमेगु द्यः व थासं थाय्या त्वाः नं चाहुसें त्वालय् लः फ्वंगु  खः । थुकथं चाहुलेगु झ्वलय् खासिइ मिजं मचा च्वना शंख पुयाः लः फ्वनीसा वया हे न्ह्यःन्ह्यः सहस्रधारा हायेका भक्तजनपिन्स सायाबिउगु लः जल समान छ्वाकालि थुगु पर्व हंगु खः ।

थेचाेय् खासिइ दुने च्वना शंख पुया माधवनारायणया जात्रा यासें लः फ्वना दे चाहुला च्वंगु । किपा रेखा शाक्य
थेचाेय् छ्यनय् ब्वहलय् व ल्हापाय् साैया द्यःने सलिखय् मत च्याका चाहुला च्वंपिं । किपा रेखा शाक्य

 

थुगु पर्व हनेत स्थानीय मिसापिं नं झः झः धायेक परम्परागत हाकुपटासी सिना सुकुण्डा च्याकाः मिजंतयगु सलिखय् चिकं सासां जात्राय् ब्वति काःगु खः ।

One thought on “थेचोय् परम्परागत रुपं माधवनारायण जात्रा

  • March 15, 2018 at 11:54 pm
    Permalink

    Yo parva jaile pani Bhim Dwadashi ko din hunxa. Yas din Thecho ko sabbai jana ko Dewali ( devpuja) , kulpujaa hune garxa .mathi pic maa pingal maa baha puja gareko vaniyeko xa tara tyo chwe lacchi haru ko degu dya puja ho.

    Reply

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.