थुगुसीया रत्नवत सिरपाः रत्न बेहोसीयात

११३८ चिल्लागा चौथी/येँ

रेडियो नेपालय् दक्कले न्हापां ज्ञानमाला भजन रेकर्ड याकादीम्ह वरिष्ठ म्येहालामि लिसें संगीतकार रत्न बेहोसीयात थुगुसीया रत्नवत सिरपाः बीगु जूगु दु ।

थौं ज्ञानमाला भजन खलकं येँय् पत्रकार सम्मेलनया ग्वसाः ग्वसें वइगु चिल्लागा अष्टमी शन्चरबाः बेहोसिलिसें भिक्षु थानसेठ्ठ महास्थवीर व युवक वौद्ध मण्डल नेपालयात रत्नवत सिरपाः बी त्यनागु जानकारी बियादिल । पत्रकार सम्मेलनय् भजन खलःया नायः तीर्थनारायण महर्जनं वौद्ध धर्मया प्रचारय् ब्यूगु योगदानयात च्वछासें वय्‌कःपिन्त थुगु सिरपाः लःल्हायेत्यनागु धयादिल ।

शन्चरबाः महामन्जुश्रीया पूजा नं यासें १०द्वः तका राशीया रत्नवत सिरपाः लःल्हाइगु जानकारी खलःया न्वकू पूर्णकाजी ज्यापुं बियादिल । उगु हे ज्याझ्वलय् मीनभवनया विश्वशान्तिथ विहारयात ज्ञानमाला गुलुपाः सिरपाः नं बीगु न्वकू ज्यापुं कनादिल ।

स्वयम्भु ज्ञानमाला भजन खलकं वि.सं. १९९३ निसें हे निरन्तर ज्ञानमाला भजन याना वयाच्वंगु दु । आन्दोलन, भुखाय् थुज्वःगु परिस्थितिया लिसें छुं दिं न्ह्यः भजन याइगु सतः च्याःसां भजन निरन्तर न्ह्यानाच्वंगु दनिगु जानकारी सम्मेलनय् ब्यूगु खः ।

किपा : शरण ज्यापु हरि

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.