थाैं श्री करुणामय बुँग द्यःयात पुच्वःय् बिज्याकीगु

११३८ बछलाथ्व पारु/यल

झीगु संवाददाता

स्वनिगःया दकलय् ताःहागु जात्रा कथं नाला तःगु बुंगद्यःया जात्रा थनिंनिसें शुरु जुइत्यंगु दु । थौं बुंगद्यःयात रथय् बिज्याकाः थ्व जात्रा न्ह्याकी । द्यःयात रथय् बिज्याकूगुया स्वन्हु लिपा बछलाथ्व चौथी बिहीवाः कुन्हु द्यः सालेगु ज्या जुइ ।

किपा-रेखा शाक्य

यलय् बुंगद्यःयात रथय् तइगु छन्हु न्ह्यः कटुवाल दहलय् नं तःजिगु जात्रा न्यायेकूगु खः । बुंगद्यःयात भारतया कामारुकामाक्षं नेपाः हःगु लसताय् कटुवाल दहलय् उकथं जात्रा यागु खः । म्हिगः चछि धइथें कटुवाल दहलय् पुजाआजा जूगु खँ पुजारी कपिल गुरुजुं कनादीगु दु । थौं भम्बःया रुपय् दुम्ह द्यःयात कलशय् तयाः यलय् हइगु खः ।

किपा-रेखा शाक्य

कलशयात लसकुसयाना दुकया तःबहालय् च्वंगु बुँगया  देगलय् पलिस्था याइ । अन लिपा गुरुजुया पल्टनया लिसें थी थी बाजागाजा थाना खड्ग न्ह्यः न्ह्यः तया सकलें भक्तजनपिं नापनापं  द्यःयात चिधंगु खतय् तया पुच्वय् दयेका तःगु तःधंगु रथय् बिज्याकी । थाैं हे सकल भक्तजनपिन्सं द्यः खतय् बिज्यागु लसताय् व मदुपिनिगु लुमन्तिइ १०८ प्वाः देवा नं च्याकेगु ज्या याइ ।

थुगुसी मलमास नं दुगु खःसां थुकिं द्यः सालेगुलिइ ज्याय् छुं लिच्वः मलाइगु खँ जोतिष कीर्तिमदन जोशीजुं धयादीगु दु ।

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.