थाैं जुइगु लिग चरणया प्यंगु कासां सुयात गन थ्यंकी

 

११३८ तछलाथ्व त्रयाेदशी

थौं नं लिग चरणया प्यंगु कासा जुई । थौंया कासा लिग चरणया अन्तिम कासा कथं समूह सी या अष्ट्रेलिया व पेरु, डेनमार्क व फ्रान्स दथुइ ७ः४५ ताःइलय् जुइगु खःसा समूह डी या नाइजेरिया व अर्जेन्टिना, आइसल्याण्ड व क्रोयसिया दथुइ ११ः४५ ताःइलय् जुइ । समूह सी पाखें फ्रान्स व समूह डी पाखें क्रोयसिया नकआउटय् थ्यने धुंकुगु दुसा समूह सी व डी पाखें मेगु छगू छगू टिम सु सु नकआउटय् थ्यनि थौं क्वचाइगु कासां क्वछि ।

अर्जेन्टिना–नाइजेरिया
सेन्ट पिटर्सवर्ग (रुस) । लियोनेल मेसीयात म्हिगः थःगु सर्वश्रेष्ठ कासामिया छवि क्यनेगु ई खः ।
मेसीया नितिं विश्वकपय् आः गोल यानाः अर्जेन्टिनायात समूह चरणपाखें विदा मबिकेगु ई वःगु दु । मेसीसमक्ष आः विश्वकपया सर्वश्रेष्ठ कासामिया प्रतिष्ठायात कायम हे तयाः सकसिगु अपेक्षा कथं न्हयःने वयेमाःगु ई वःगु दु । मेसीसमक्ष आः थःगु प्रदर्शनया बारेया हुइनाभुइना जुयाच्वंगु हल्लायात समाप्त यायेगु बांलागु ह्वता नं खः ।

वंगु आइतबार थःगु ३१ दँया बुन्हि हंम्ह मेसीं थौं मङ्गलबार नाइजेरियाविरुद्ध म्हितिगु इलय् च्वये न्ह्यथना कथंया सकतां चुनौतीयात समाप्त यायेमालिगु जुइ । अर्जेन्टिनायात बुकुलधाःसा नाइजेरिया नकआउट चरणय् थ्यनीगु जुइ । अझ अर्जेन्टिनालिसेया बारबरीं नं नाइजेरियायात मेगु चरणय् थ्यंकेफु । यद्यपि थुकिया नितिं नाइजेरियां क्रोसिया व आइसल्यान्ड दथुया नतिजा धाःसा पियाच्वनेमालिगु खनेदु । अर्जेन्टिनायात धाःसा त्याःगुया विकल्प मदु । अर्जेन्टिनां न्हापांगु कासाय् आइसल्यान्डसँग १–१ गोलं बराबरीइ म्हितुगु खः धाःसा निगूगु कासाय् क्रोएसियालिसें ३–० गोलं पराजय जुइमाःगु खः ।

विश्वकपमा अन्य स्टारं बिस्तारै थःगु छाप त्वताच्वंगु इलय् मेसीयात  अझ अप्वः दबाब वयाच्वंगु दु । वया प्रमुख प्रतिदन्दी पोर्चुगलया लियोनेल मेसीं ४ गू  गोल यायेधुंकुगु दु । अथेहे हेरी केन (५) बेलिज्यमया रोमेलु लुकाक (४), ब्राजिलका नेमार व जर्मनीया टोनी क्रुज नं लयलय् वयाच्वंगु दु  ।
उकिं शुरुया निगू कासा धुंकाः मेसीं आः हासिल याःगु धयागु दबाबया भारी जक हे खः । रुसय् समूह चरणय् हे विदा जुइमाल धाःसा अर्जेन्टिना व मेसीया नितिं तःधंगु बेइज्जत हे जुइ । अझ मेसीं महत्वपूर्ण अन्तर्राष्ट्रिय कासाय् कमजोर प्रदर्शन याइ धकाः वयागु आलोचनाय् थप बल जुवनिगु जुइ ।

अर्जेन्टिनाया जर्सीइ मेसीें छगू पदक जक त्याकुगु दु  १० दँ न्ह्यः अ‍ोलम्पिक्सय् । अनलिपा प्रमुख कासाय् मेसीया अर्जेन्टिनां निराश जक हे याःगु दु । अर्जेन्टिनायात उपाधिं लोभ चायेकुगु २५ दँ दयेधुंकल । सन् १९९३ कोपा अमेरिकाय् च्याम्पियन जुइधुंकाः अर्जेनिटना लगातार निराश जक हे जुयाच्वंगु दु । थःगु देय्या नितिं प्रमुख कासाया उपाधि कायेत प्यक्वःतक मेसी अन्तिम कासाय् छखे लायेधुंकुगु दु ।

स्पेनी क्लब बार्सिलोनायात कयौँ उपाधि कायेत गुहालीयाम्ह मेसीं अर्जेन्टिनायात धाःसा उपलब्धि बिइके मफुगुलिं वयात तःधंगु दबावया भारी लाःगु खः । खय्तला मेसीं विश्वकप छनोटय् अन्तिम छनोटय् इकवेडरविरुद्ध ह्याट्रिक यानाः अर्जेन्टिनायात विश्वकपय् स्वतः चयन याकुगु खः ।

मेगु संस्करणय् ३५ दँ थ्यनीगु जुगुलिं थ्व हे मेसीया अन्तिम विश्वकप जुइगु यक्वः संभावना दु । उकिं देशया नितिं जक मखु थःगु नितिं नं मेसीयात विश्वकप उपाधिया तःधंगु आवश्यकता जुगु खनेदु ।

चालू विश्वकप कासाय् मेसी शान्त हे दु । आइसल्यान्डविरुद्ध वं पेनाल्टीइ गोल याये मफत धाःसा क्रोएसियाविरुद्धया कासाय् टिमं हे कमजोर प्रदर्शन याःगु खः । आः वया पासाम्ह कासामि खःगु कथं बलयात पास याये मफया नं मेसीं स्वभाविक कासा म्हिते मफुगु धइगु कथंया खँ नं चर्चाया विषय कथं न्ह्यःने वयाच्वंगु दु ।

यद्यपि मेसीया स्तरय् आः रोनाल्डोबाहेक सुं नं फुटबलर मदु धाःसां ज्यू । न्याक्वः तक बालन डि ओ त्याके धुंकुम्ह मेसीें बार्सिलोनाया नितिं ५५२ गोल याये धुंकुगु दु । वयागु अन्तर्राष्ट्रिय गोलया ल्याः नं ६४ थ्यने धुंकल । शायद थौं मङ्गलबार बहनी नाइजेरियाविरुद्धया कासाय् मेसीं थःगु आलोचकया म्हुतुप्वाः तिनाबिइगु जुइफु ।

क्रोएसियालिसें बुइ धुंकाः अर्जेन्टिनाया टिमय् हे आन्तरिक समस्या छताछुल्ला जुगु दु । कासामिपिन्सं हे थः प्रशिक्षक जर्ज साम्पाओलीविरुद्ध कुंखिना हःगु दु । प्रशिक्षणय् नं प्रशिक्षक व कासामि दथुइ बांलाक खँल्हाबल्हा जुयाच्वंगु खनेमदु ।

नाइजेरियाया प्रशिक्षक गार्नेट रोरमायात धाःसा खास हे दबाब मदु । आइसल्यान्डविरुद्धया कासाय् प्रमुख स्थानया कासामि हिलेगुया लिसें जोखिम कयाः त्याके धुंसेलि वाहवाही कयाच्वंम्ह प्रशिक्षक रोर आः नाइजेरियायात नकआउटय् थ्यंका थःगु प्रतिष्ठा अझ च्वय् लाकेगु मनसुवालय् दु ।

क्रोएसियालिसेंया कासाय् कमजोर खनेदुगु डिफेन्सयात नाइजेरियाया अहमद मुसायात पनेत कठिन जुइफु । तेज गतिया मुसाया गोलया कारण धाःसा अर्जेन्टिनाया कासाय् सम्भावना जिवित जुगु खः । न्हापाया कासा मुसाया गोलं नाइजेरयायात आइसल्यान्डयात बुकुगु खः ।

 

किपा एपी

क्रोएसिया–आइसल्यान्ड

रोस्टोभ–अन–डन (रुस) । चालू विश्वकपय् आः तक दकलय् सिर्जनाम्त्मक टिम खनेदुगु क्रोएसियायात पनेत ह्याउँगु कार्ड काये माःसां लिउने मच्वनेगु जानकारी आइसल्यान्डया डिफेन्डर कारी अर्नासनं ब्यूगु दु । खय्तला निगू टिम ह्याउँगु कार्डया इतिहास ज्वनाः छम्ह मेम्ह विरुद्ध म्हिते त्यंगु दु । निगुलिं टिमं छम्ह मेम्ह विरुद्ध वंगु प्यंगु कासा म्हितुगु इलय् स्वंगू ह्याउँगु कार्डया दर्शन यायेधुंकुगु दु ।

आइसल्यान्डया अर्नासन क्रोएसियायात विश्वकप हे त्याकेगु क्षमता दुपिं टिम कथं स्वयाच्वंगु दु । तर थःपिं विरुद्ध म्हितिबलय् क्रोएसियायात चकंक थाय् मबिइगु व शारिरीक कासा म्हिता क्रोएसियायात स्वभाविक प्रदर्शन याके मबिइगु जानकारी ब्यूगु दु ।

क्रोएसिया शुरुया निगू कासा त्याकाः नकआउटय् थ्यंने धुंकुगु दु । समूह डि लय् आइसल्यान्डसमक्ष धाःसा क्रोएसियायात बुके हे माःगु दबाब दु । क्रोएसिया पराजित जुल धाःसा वं अर्जेन्टिनालिसे नाइजेरियाया हारया कामना नं यायेमालेफु ।

अर्नासनया कथं अर्जेन्टिना थें जाःगु टिम समूह चराणय् छगू कासा नं मत्यासें विदा जुइगु सम्भावना यक्व मदु । आइसल्यान्डया नितिं क्रोएसियाविरुद्ध म्हितुगु इलय् छगू पक्षय् फाइदा जुइगु खनेदु । क्रोएसयाया प्रशिक्षक ज्लाट्को डाचिं नकआउटय् वनेन्ह्यः थकान व प्रतिबन्धय् बचेजुइत थः प्रमुख कासामिपिन्त विश्राम बिइगु संकेत याये धुंकुगु दु गुकिं यानाः आइसल्यान्डयात कासा त्याकेगु मौका जुइफु ।

आः परम्परागत दावेदार टिमत सङ्घर्षरत जुयाच्वंगु इलय् क्रोएसियां धाःसा अर्जेन्टिनालाई ३–० व नाइजेरियायात २–० गोलं बुकाः विश्वकप त्याकेफुगु टिमया रुपय् कासा न्ह्यःब्वयाच्वंगु दु ।

आइसल्यानड व क्रोएसिया दथुइ आः तक ६ गू कासा जुइधुंकुगु दु, गुकि मध्येय् क्रोएसिया ४ व आइसल्यान्ड १ गू कासाय् त्याःगु दु । छगू कासा बराबरीइ सिधःगु खः ।

३ लाख ५० हजार जक जनसङ्ख्या दुगु देश आइसल्यान्ड न्हापांगु खुसिइ विश्वकप म्हितेत्यंगु दु । यद्यपि वं थःगु न्हापांगु कासाय् अर्जेन्टिनायात १–१ गोलं बुकाः थःगु क्षमता क्यनेधुंकुगु दु । आइसल्यान्डया प्रशिक्षक हिमिर हालग्रिम्सनं क्रोएसिययात विश्वकप छनोटय् घरेलु मैदानय् बुके धुंकुगुलिं उगु हे प्रेरणाय् म्हितेगु धाःगु दु ।

 

किपा एपी

फ्रान्स व डेनमार्क

मस्को । फ्रान्स विश्वकप फुटबल कासा २०१८ या छम्ह दावेदार खः । अथेसां वं आःतक यक्वः गोल यागु नं मदुनि अले अहाः धायभनं कासा न्ह्यब्वःगु नं मदुनि । अथेखसां न्हापाया निगू कासा त्याकाः फ्रान्स नकआउट्य् थ्यनेधुंकगु टिम खः ।

थाैं मङ्गलबाः डेनमार्कविरुद्ध जुइगु कासाय् बराबरी जक जुसां फ्रान्स समूह सीलय् समूह विजेता जुइ । थथे जुल धाःसा फ्रान्स नकआउटय् क्रोसियानापया भिडन्त पाखें तापाई । फ्रान्सनापया बराबरीं डेनमार्कयात नं नकआउट चरणय् थ्यंकी । थ्व समूहलय छगू हें इलय् अस्ट्रेलिया व पेरु दथुई न कासा जुइ ।

फ्रान्सं युरो २०१६ व विश्वकप २०१४ लय् शानदार सुरुवात यासां ताःहाकगु यात्रा याये मफुगु खः । युरो २०१६ लय् यक्वः गोल याम्ह गिज्म्यानं थुगु विश्वकपय् नं गोलया खाता चायकेधुंकुगु दु ।

डेनमार्कं प्यक्वः तकया विश्वकपय् उपस्थिति धुंकाः समूह चरण पार यायेगु दाउलय् दु । डेनमार्कया थ्व न्याक्वःगु विश्वकप फुटबलया यात्रा खः । डेनमार्कया लागि आः यात थाकुगु धइगु हे फ्रान्स नापया कासाय् थःगु मुख्य निम्ह कासामी दुथ्याके मफैगु खः । पेरुनाप १–० गोल त्यागु कासाय् गोल याम्ह युसुफ पाउल्सेनं निगू म्हासुगु कार्डं छगू कासाया प्रतिबन्ध दुसा मिडफिल्डर विलियम क्विस्ट चोटया हुनिं उपचारया छेँ लिहावना हाकनं रुस लिहा वयेधुंकुगु दु ।

क्विस्ट पेरुविरुद्ध म्हितुबलय् बपिक्वँय् त्वधुगु खः । वया स्वंय् नं हल्का समस्या खनेदुगु धाःगु दु । अथेखसां प्रशिक्षक एज हेरिडें फ्रान्सविरुद्धया कासा धुंकाः अभ्यासय् लिहांवइगु धाःगु दु। डेनमार्कं आःतक निगू पेनाल्टी गोल नयेधुंकुगु दु । निगुलिं गोल भिएआरया प्रयोग धुंकाः विपक्षीयात पेनाल्टीया अवसर ब्युगु खः ।

अस्ट्रेलिया–पेरु

सोची (रुस) । विश्वकप फुटबल कासाय् नकआउट चरणय् थ्यंकेत उप्वः गोलसहितया जितया आवश्यकता दुगुलिं अस्ट्रलियां लिबाक्कहे जुसां भेटरान स्ट्राइकर टिम काहिलयात टिमय् सतुगु दु ।

३८ वर्षीय काहिलं अस्ट्रेलियां पेरुविरुद्ध मङ्गलबाः म्हितिबलय् थुगु विश्वकपया थःगु न्हापांगु कासा म्हितिगु यक्व सम्भावना दु । अस्ट्रेलियायात नकआउटय् वनेत कासापाखें बिदा जुइ धुंकुगु टिम पेरुयात बुकेहे मागु आवश्यकता दु । थ्वया नापं समूह सी या मेगु कासाय् डेनमार्क फ्रान्सयात बुकिगु कामना यायेमाः । यदि थथे जुला धाःसा गोल अन्तरं अस्ट्रेलिया व डेनमार्क मध्ये गुगु टिम नकआउटय् वनि धैगु खँ गोल अन्तरं निर्णय याइ ।

पेरुविरुद्ध म्हितेबलय् काहिल न्ह्यःने प्यंगु विश्वकपय् गोल याम्ह न्याम्हम्ह कासामि जुइगु अवसर वइ । गुगु गौरव धाये वा इतिहास पेले, युवे सिलर, मिरोस्लाभ क्लोज व क्रिस्टियानो रोनाल्डो याके जक दु । अस्ट्रेलियाया न्हापांगु रोजाईका स्ट्राइकर एन्ड्रयु नाबाउटयात डेनमार्कविरद्धया कासाय् ब्वहःया चोटं यानाः काहिलयात कासाय् दुहाँवयेगु ह्वःता चुलागु खः ।

सन् २००६ लय् जापानविरुद्ध गोल यानाः विश्वकपय् अस्ट्रेलियाया नितिं गोल याम्ह न्हापांम्ह कासामि जुम्ह काहिल आःतक थःगु देया लागि उप्वः गोल याम्ह कासामि नं खः । वं ५० गू अन्तर्राष्ट्रिय गोल यायेधुंकुगु दु । सन् २००६ या विश्वकप व सन् २०१४ यो विश्वकपय वं २।२ गोल याःगु खः । सन् २०१० या विश्वकपय् नं काहिलं छगू गोल याःगु खः ।

काहिलनापं स्वम्हः स्ट्राइकर तं टिमय् दइसा अस्टेलियायात विपक्षी पोष्ट्य् गोल यायेत अपुइगु चाहिं खनेमदु । लिपांगु स्वंगू कासाय् अस्ट्रेलियां पेनाल्टी पाखें जक गोल याःगु खः । न्हापांगु कासाय् फ्रान्सनाप २–१ गोलं बुगु खःसा डेनमार्क नाप १–१ या बरबरीइ म्हितुम्ह अस्ट्रेलिया सन् २००६ धुंका न्ह्पांखुसिइ समूह चरण पार यानाः नकआउटय् वनेगु दाउलय् दु ।

अथेहे, निगूलिं कासा बुसां बांलागु कासा म्हितिम्ह पेरु धाःसा अस्ट्रेलियायात बुकाः छाति फुलय् यानाः विश्वकप पाखें बिदा जुइगु आशाय् दु । प्राक्टिस कासाया झ्वःलय् स्ट्राइकर जेफरसन फर्फान थः पासा नाप छ्यँ ल्वाना घाइते जुगुलिं थुगु कासाय् खनेमदैगु जुगु दु ।

 

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.