थाैंया कासाय् नकअाउट चरणय् वनेगु दाउ सुया सुया ?

११३८ तछलाथ्व दशमी

थौंया कासा बेल्जियम व ट्युनिसिया (५ः४५ ताःइलय्), दक्षिणकोरिया व मेक्सिको (८ः४५ ताःइलय्) व जर्मनी व स्वीडेन (११ः४५ ताःइलय्) दथुइ जुइ ।

बेल्जियम–ट्युनिसिया

मस्को । विश्वकप फुटबल प्रतियोगिताय् बेल्जियमया महत्वकांक्षा समूह चरण स्वयां यक्वः हे तापागु जुयाच्वंगु दु । उकिं बेल्जियमया कासामि याकनं स्वया याकनं हे नकआउट चरणय् थ्यंके मास्तिवयाच्वंगु दु । थुकिया नितिं वयागु मेगु पलाः शनिबार ट्युनिसियायात बुकेगु जुइ ।
ट्युनिसियाविरुद्धया जितं बेल्जियमयात समूह जी पाखें नकआउटया संघारय् थ्यंकेफु । गुगु पुचलय् इङ्गल्यान्ड नं दु ।

किपाः गुगल

इङ्गल्यान्डं आइतबार पनामाविरुद्ध म्हितिइगु जुइ । वंगु सोमबार बेल्जियमं थःगु न्हापांगु कासाय् पनामाविरुद्ध सुस्त सुरुवात याःगु खः । बेल्जियमविरुद्धया कासाय् नवप्रवेशी पनामाया उद्देश्य तच्वःगु हार बेहोरे मयायेगु हे खः । उकिं बेल्जियमलिसे ३–० गाेलं बुगु खःसां पनामाया प्रशिक्षक हर्नान गोमेजं सन्तुष्टि हे प्वंकादिगु दु ।

पनामासिबें स्तरीय टिम खः ट्युनिसिया । तर वयागु आक्रमण क्षमता सिर्जनात्मक फरवार्ड युसुफ मसाक्नी घाइते जुइवं कमजोर जुल । अफ्रिकी टिम ट्युनिसियायात न्ह्यःने वनेत जित घटीया नतिजां ज्या याइगु खनेमदु । ट्युनिसिया न्हापांगु कासाय् इङ्गल्यानडलिसे २–१ या गोलं बुगु खः । इङ्गल्यान्डया कप्तान ह्यारी केनं लिपांगु इलय्नं हेड गोल यासेंलि ट्युनिसियाया ल्हातं छगू अंकं त्वफ्यूगु खः ।

ट्युनिसयाया टिमय् कन्हे न्हूम्ह गोलरक्षकं गोलपोस्टया भार काइगु जुइ । न्हापाम्हं रोजाइया गोलरक्षक मोउज हासेन ब्वहःया चोटं छेँय् लिहाँ वंगुलिं ल्यंदनिगु कासाय् ट्युनिसयायात वयागु सेवा प्राप्त मजुइगु जुल ।

किपाः गुगल

चालू विश्वकपय् प्राय सेट पिस, पेनाल्टी व आत्मघातीमार्फत् गोल जुगु दु । तर पनामाविरुद्ध बेल्जियमं स्वंगू गोल ‘ओपन प्ले’ स लिकागु खः । बेल्जियमया ड्राइज मार्टेन्सं दर्शनीय ढङ्गं भली प्रहारय् न्हापांगु गोल याःगु खःसा ल्यं दनिगु निगू स्ट्राइकर रोमेलु लुकाकुपाखें वःगु खः । उकिं नं बेल्जियमया प्रशिक्षक रोवर्टो मार्टिनेज लय्ताःगु दु । फुटबलय् दकलय् थाकुगु ज्या गोल यायेगु खः । पनामाविरुद्ध दक्वं गोल ओपन प्लेपाखें याःगु खः । – प्रशिक्षक मार्टिनेज धाल ।

विश्वकपय् ब्राजिल, अर्जेन्टिना, जर्मनी थें जाःगु टिम संघर्ष जुगु स्थितिइ बेल्जियम उपाधि दावेदारया रुपय् न्ह्यःने वःगु दु । वयागु प्रमुख कासामि इडेन हजार्डं नं थ्व पालय् विश्वकप थःगु जुइ धइगु थें ज्याःगु भनाईंलं बेल्जियमया नजर उपाधिइ दुगु सिइकेफु ।

तर ट्युनिसिया विश्वकपय् अफ्रिकाया इतिहास ज्वनाच्वंगु टिम खः । सन् १९७८ य् मेक्सिकायात ३–१ गाेलं बुकाः ट्युनिसिया विश्वकप फुटबलय् कासा त्याकुम्ह अफ्रिकाया न्हापांगु राष्ट्र जुगु खः ।

जर्मनी–स्वीडेन

सोची (रुस)। विश्वकप फुटबल २०१८ य् स्वीडेनया यात्रा गर्व याये लायक जु । विश्वकप छनोटय् नेदरल्यान्ड्सयात लिउने लाकाः प्लेअफ कासाय् स्वीडेनं उगु चरणय् प्यक्वः तकया विजेता इटालीयात नं निगू कासाय् मात बियाः थःत विश्वकप कासा म्हितेत योग्य दयेकल ।

नेदरल्यान्ड्स व इटालीं धाःसा स्वीडेनया शिकार जुयाः विश्वकपय् हे म्हिते मखंगु खः । आः स्वीडेन मेगु हाइप्रोफाइनल टिमयात लिउने लाकाः नकआउट चरणय् थाय् दयेकेगु दाउलय् दु ।

किपाः गुगल

जर्मनीलिसें थौं शनिबार म्हितिगु इलय् स्वीडेनया न्ह्यःने थ्व मौका प्राप्त जुइफु । स्वीडेनं जर्मनीयात बुकल धाःसा उकिया लिच्वः विश्वकप इतिहासया हे दकलये तःधंगु उलटपुलट नं जुइफु । उपाधि रक्षा अभियानय् दुम्ह जर्मनीं न्हापांगु कासाय् मेक्सिकोनाप पराजय जुइधुंकुगु दु । उकिं स्वीडेनलिसें बूत धाःसा जर्मनीया फुटबल टिमं विश्वय् यानाच्वंगु राज नकआउट चरण न्ह्यः हे सिधयेफु ।

स्वीडेनया नितिं थ्व तःधंगु चुनौती खः । यद्यपि स्वीडेनं थ्व खँ थुइके धुंकुगु दु कि जर्मनीयात बुकल धकाःसा वयागु नकआउट चरणय् थःगु थाय् पक्का जुइ । सन् २००६ धुंकाः स्वीडेन न्हापांगु खुसिइ विश्वकपय् म्हितुगु खः । उकिं नं स्वीडेनयात ताःई लिपा थःगु धिसिलाःगु थाय् दयेकेगु ह्वता चुलायेफु ।

जिमिसं कासा त्याकेगु साहस याये हे माः – स्वीडेनया प्रशिक्षक याने एन्डरसनं धाल । स्वीडेनं न्हापांगु कासाय् दक्षिण कोरियायात १–० गाेलं बुके धुंकुगु दु । आः जर्मनीलिसेया जितं वयागु न्ह्यावनेगु यात्रा पक्का जुइफु ।

किपाः गुगल

मेक्सिकोलिसें न्हापांगु कासा बुगुलिं आः जर्मनी घाइते धुं जुयाच्वंगु दु । सन् १९८२ लिपा न्हापांगु खुसिइ जर्मनीं विश्वकपय् थःगु न्हापांगु कासा बूगु खः । गुगु हारं जर्मनीया टिमया आलोचना नं जुयाच्वंगु दु । यद्यपि मेक्सिकाेलिसें बुगु कासाय् नं जर्मनीं गोल यायेगु यक्वः हे ह्वताः दयेकाः थःत कमजोर धकाः सावित धाःसा मयात ।

स्वीडेनविरुद्ध फरक रणनीतिइ म्हितेमालिगु जुइ । स्वीडेन व मेक्सिको फरक शैलीइ म्हितिगु टिम खः ।  जितः मताः स्वीडेनया कासामिपिं मेक्सिकोया कासामिंपिं थें प्रवृतिपद्धत कासा म्हितेगु गुणं युक्तपिं खः, अथे खयानं स्वीडेननाप न्ह्यःनेया लाइनय् म्हितिपिं छुं अज्यापिं कासामिपिं दु, गुपिन्सं जिमिगु रणनीतिइ घात यायेफु – जर्मनीया स्ट्राइकर थोमस मुलरं ब्यूगु प्रतिक्रिया खः थ्व ।

स्वीडेन डिफेन्सय् केन्द्रित जुया अवसरवादी गोल यायेत माहिरपिं खः । ज्लाटन इब्राहिमोभिचं सन्यास कायेधुंकाः स्वीडेनया न्ह्यःनेया लाइनय् वयागु अभावया पूर्ति जुगु मदुनि । तर अनुशासित व सशक्त डिफेन्सया भरय् स्वीडेनं नेदरल्यान्ड्स व इटालीयात तकं लिउने लाकाः कठिन विश्वकप छनोट पार यात । जर्मनी धाःसा डिफेन्स, मिडफिल्ड व अग्रपंक्तिइ यानाः थ्व स्वंगू पक्षय् बांलापिं खः ।

आः जर्मनीया टिमय् मार्कस रियसया भूमिकायात कयाः बहस जुयाच्वंगु दु । मेक्सिकालिसेया कासाय् रियस ६० औँ मिनेटय् मैदान दुहाँ वःगु खः । रियस वयेधुंकाः जर्मनीया कासाय् सुधार जुगु दु ।

सन् २०१४ या विश्वकप छनोट धुंकाः थ्व निगू टिम छम्ह मेम्हविरुद्ध म्हितुगु मदुनि । उगु विश्वकप छनोट अन्तर्गत बर्लिनय् थुपिं निम्हसिनं ४–४ गाेलया बराबरी म्हितुगु खः धाःसा स्वीडेनय् जर्मनी ५–३ गाेलं त्याःगु खः ।

काेरिया–मेक्सिकाे

जर्मनीया न्हापांगु कासाय् स्तब्ध यानाब्यूगु मेक्सिकोया नितिं थौं शनिबारया  स‌ंघर्ष दक्षिण कोरियायात  सहज प्रतिद्वन्द्वी जुइफु । तर वर्तमान अवस्थाय् दकलय् तःधंगु चिन्ता थःगु हे समर्थक जुयाच्वंगु दु । कासाया इलय् अभद्र व्यवहार यायेधुंकाः फिफां मेक्सिकोया फुटबल संघयात दस हजार डलर जरिवना पुइकुगु खः ।

किपाः गुगल

मेक्सिकों थःगु निगू कासाय् दक्षिण कोरियायात बुकाः नकआउट चरणय् थ्यंकेगु सिलसिलायात कायम यायेगु कुतः जुइ । न्हापांगु खूगु विश्वकपय् मेक्सिकों समूह चरणपाखें विदा जुइमाःगु मदुनि । न्हापांगु कासाय् विश्व च्याम्पियनयात १–० गाेलं बुके धुंकाः मेक्सिको थुगु पालय् नकआउट चरणय् थ्यंकेगु बल्लागु सम्भावना खनेदु ।

किपाः गुगल

म्यान्चेस्टर युनाइटेडया पूर्व प्रशिक्षक एलेक्स फर्गुसनपाखें प्रेरित कार्लोस ओसोरियो थःगु लाइनअपयात उखेंथुखें याये यःम्ह मेक्सिकोया प्रशिक्षक खः । तर दक्षिण कोरियाविरुद्धया कासाय् वं न्हापांगु हे टिमयात म्हितकीगु अप्वःसम्भावना दु । कोरियाया कासामिपिं तसकं तेज जुगुलिं इमित पनेत प्रशिक्षक आसोरियों प्यम्ह डिफेन्डरयात म्हितकेगु धाःगु दु ।

मेक्सिको मिडफिल्डर फाबियन जर्मनीयात बुके धुंकाः थःगु टिमयात समूह विजेताया दावेदारया रुपय् कयातःगु तर थज्यागु खँयात कयाः ध्यान भङ्ग यायेमज्यूगु धाःगु दु । थुगु विश्वकपय् सुं नं दावेदार मदु – फाबियनं धयाच्वंगु दु ।

स्वीडेनलिसें न्हापांगु कासाय् पेनाल्टी गोलं बुगु दक्षिण कोरियां ४–३–३ या संरचनाय् म्हितिगु पक्का दु । जर्मनीया बुन्डेसलिगा क्लब अग्सवर्गपाखें म्हितिगु दक्षिण कोरियाया मिडफिल्डर कु जा चोलं मेक्सिकोया कासाबारे अध्ययन याये धुंकुगु व  हर्नान्डेजयात प्रमुख खतराया रुपय् कयागु धाःगु दु ।

 

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.