थथुबहीया भुइख्यलय् सम्यकदान

११३८ पोहेंलागा चतुर्दशी/येँ

झीगु सम्वाददाता ।  बौद्ध धर्मालम्वीया तसकं महत्वपूर्णगु नखः वा पर्वया रुपय् हनाच्वंगु सम्यक दान पर्व ख्वपय् थथुबहीया भुइख्यलय् तःजिक हन । क्वाथंडो, झौर वही, प्रचण्डशिल महाविहार, थथुबही व कुथुबहीया न्याम्ह दिपंकर बुद्धया मूर्तियात थथुबहीनिसें बाजं थाना पुजायाना लँपुइ न्यासिका हःगु खः ।

क्वाथ्वंद्वः विहारया दिपंकर ।किपाः रेखा शाक्य

स्थानीय थथुबहीया भुइख्यलय् न्याम्ह दिपंकरया लिसें आजु द्यःपिं प्यम्हसित नं झ्वलिकं विराजमान याकूगु खः । विराजमान दिपंकरपिन्त ख्वपवासीपिन्सं सम्यक दान यानादिल । सम्यक दानय् परम्परागत रुपय् स्थापना जूगु बौद्ध विहारय् दीक्षित जुया गृहस्थ बौद्ध भिक्षु शाक्य व बज्राचार्यपिन्त भोजन अन्न दक्षिणा बियादिगु खः ।

दिपंकरपिं सकलें थथुबहीया भुइख्यलय् विराजमान । किपाः रेखा शाक्य

ख्वपया लिसें स्वनिगःया थाय्थासं झायादिपिं बौद्ध धर्मालम्बीपिन्सं नं दान याना दीगु खः । दच्छिया निक्वः ख्वपय् च्वंगु प्रमुख न्याम्ह दिपंकरया बुद्ध मूर्तियात सम्बन्धित विहारं पित हयाः जात्रा न्यायेकीगु थ्व परम्परा द्वलंद्वः न्ह्यःनिसें थापना जूगु थुगु विहारया भुइख्यलय् न्ह्याना वयाच्वंगु खँ रवि किरण बज्राचार्यजुं कनादिल ।

थथुबहीया अाजुपिं भुइख्यलय् विराजमान । किपाः रेखा

वय्कःया धापू कथं सम्यक दान घ्यः चाकु संल्हुया न्हि कुन्हु थुकथं जात्रा हनीगु खः । थौंया थूगु पर्वय् बिज्याना वा झायादिपिन्सं भोजनया लिसें चाय् सइगु अन्न, गेडागुडी, व तरकारी गुलि नं दु व दिपंकरयात दान याइगु खः । थूगु पावन दिनस भक्तजनपिन्सं भजन नं यानादीगु खः ।

थथुबही । किपाः रेखा

येँय् स्वयम्भुया भुइख्यलय् १२ दँय् छक्वः यलया नागबहालय् न्यादँय् छक्वः व ख्वपय् गुुह्य पुखूया पश्चिमय् च्वंगु थथुवहीया परिसरय् च्वंगु भुइख्यलय् व पंजरांबलय् थ्व पर्व हनिगु खः ।

थथुबहीया भुइख्यलय् भजन याना च्वनादिपि‌ । किपाः रेखा

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.