तोखाया हरमार जात्रा तःजिक क्वचाल ।

११३८ सिल्लाथ्व पुन्ही/येँ

तोखाया हरमार जात्रा तःजिक क्वचाल ।
थःगु मौलिकतायात म्वाकातःसें तोखावासीपिन्सं थौं तःजिक हरमार जात्रा हन । हरहर भजन खलःया ग्वसालय् थुकथं जात्रा न्ह्यानाच्वंगु खः । चण्डेश्वरी भगवतीया प्रांगणय् लच्छितक अपसं च्वंपिं मिसा व्रतालु व थौं छन्हु जक च्वनिपिं मिजंपिं व्रतालुपिन्सं चण्डेश्वरीया द्यःयात पुजायाना छ्वालीं छाय्पियातःगु स्वतजाःगु सिजःया कलशय् लः थनेवं जात्रा शुरु जूगु खः । लिसें म्हः दाना वनिपिं व्रतालुपिन्सं नं चण्डेश्वरी द्यःयात म्हःदाना भागीयाना थःगु यात्रा न्ह्याकूगु खः ।

लँपुइ म्ह दाना वनाच्वंगु । किपा रेखा शाक्य

न्ह्यःने बाजंया तालय् माहाद्यःया यम्ह धकाः माकःया अवतारय् म्हय् रंगं छाय्पिया तःम्ह मिजं मचा छम्ह व चिधिकपिं मिजं मचात नं शंख पुयाः व्रतालु स्थानीयवासी मिसापिंसहित बाजंया लिउ लिउ सिजःया तांफय् लः जाय्का दे चाहुगु खः । थुकथं दे चाहुलेगु धकाः तोखाया गणेद्यः, हासौल, गौफल, त्वाः फः, लाछि, गःछेँ, हनुमान त्वाः, थनेलाछि, नासः द्यः, अले हानं थने लाछि, यलग जुया गणेद्यःयाथाय् थ्यंका जात्रा क्वचायेकेमाःगु परम्परा दु ।

जात्रा स्वयेत व कलशय् लः थनेत आपालं तोखावासी लँपुइ व छेँय् क्वय् करुवा व बाता ज्वना च्वना च्वंगु खः । ब्रतालुं ज्वनावःगु कलशय् लः तया बाताय् फयाकाःगु लः थ्वं थुइबलय् तयेवं थ्वं तसकं साइगु व मस्यनीगु जनविश्वास अनया स्थानीयवासीतय्गु खः ।

न्हापा थुकथं हरमार जात्रा यायेगु दच्छि तकया नितिं दिपा काःगु खःसां आः थौंकन्हे युवातय्सं थःगु तजिलजि व परम्परायात म्वाकातयेमाः धैगु भावना ज्वना न्ह्याका वयाच्वंगु खँ स्थानीय युवा टोखा टाइम्सया प्रकाशक सुविन्द्र श्रेष्ठजुं झीगु डटकमयात कनादिल । तोखा नगरपालिका वडा नं २ या वडा अध्यक्ष दिपकराज जोशीजुं ऐतिहासिक परम्परानाप स्वानाच्वंगु थुगु जात्रापर्वयात सदां जनमानसय् म्वाका तयेमाः धैगु बिचालं थःम्ह नं सहभागिताबिया जिम्मेवारी पूवंकागु धयादिल ।

न्हापान्हापा थुगु जात्रा बाज्यापिनि पालय् अथें न्ह्यानाच्वंगुयात आः व्यवस्थित यायेमाल व कालान्तरया नितिं सुव्यवस्थित यायेमाल धैगु भावना ज्वना युवापिं न्ह्यज्यागुलिं स्थानीय सरकार वयेधुंकाः थःम्ह नं युवापिन्त साथ बियागु व माःगु कथं गुहाली यायेगु बचं बियादिल ।

वडा अध्यक्षया लिसें ब्रत च्वनादीपिं सकलें । किपा रेखा शाक्य

दँयदसं थें पोहेलाथ्व पुन्हिनिसें सीपुन्हि लच्छि तक माधवनारायणया धलं दनेगु ज्या जुइगु खः । । तर तोखाय् मिजंपिं लच्छियंकं व्रत च्वनेम्वाः । दकलय् लिपांगु न्हि कुन्हु इच्छा दुपिं मिजंपिं म्वलल्हुया निराहार कलश ज्वना व म्हः दाना देश चाहुली ।

थुकथं हे इच्छां म्हः दानादिपिं मध्ये साजन डंगोल थःगु उसाँय् भिनेमाः व सकल छेँ जःपिन्त सुखी जुइमाः धैगु बिचालं ब्रत च्वनागु कनादिल सा कलश ज्वनादिम्ह संदिप डंगोलजुं नं थःगु स्वइच्छां भिंगु बिचालं न्हापांगु खुसिइ व्रत च्वनागु खँ कनादिल । अथेहे मिसापिं व्रतालुपिंन्सं नं आत्मा सन्तुष्टि, परिवारजनया निरोगीता व थःगु इच्छा पूवंगुलिं थुकथं व्रत च्वनागु खँ कनादिल ।

थुकथं जात्राया जुयाच्वंगु इलय् हरहर भजन  खलःया सकलें दुजःपिं नं महाद्यः राम व नारायणया भजन हा हा‌ं अनया स्थानीयवासीपिं नापं सकसिनं दे चाहुगु खः ।

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.