तेक्वाण्डोया प्रशिक्षक शुद्धोदन रञ्जित दाेष मुक्त – लसताय् जैशी देगः युथ क्लबपाखें सम्मान
ने सं ११३९ कछला थ्वः चाैथी/ येँ
रेखा शाक्य
म्हिगः जैशी देगः युथ क्लबपाखें न्हूगु दँ ११३९ क्यंगु व स्वन्ति नखःया लसताय् उगु हे क्लबया पूर्व कार्यकारी सदस्य तेक्वाण्डोया प्रशिक्षक शुद्धोदन रञ्जित व तेक्वाण्डाे कासामि विधान लामायात हनेगु ज्या यात ।
वय्कःपिं निम्हसित नं थःगु देय् बाहेक विदेशय् तकं नेपाःया नां तय्गु ज्या याःगुलिं वय्कपिन्त हनेगु ज्या यानागु क्लबया दुजः राजेन्द्र मानन्धरजुं धयादिल ।
क्लबया दुजः प्रवेश बहादुर श्रेष्ठजुं स्वांमा , राजेश शर्मापाखें खादा क्वखायेका लसकुस यानादिगु खःसा महासचिव चन्द्रगोपाल प्रधानजुं नेवाः परम्परा कथं खेँ सगं बियादिगु खः । ज्याझ्वलय् निम्ह पाहाँपिन्त क्लबया अध्यक्ष प्रजापतिजुं सम्मानपत्र लःल्हानादिगु खः ।
क्लबया अध्यक्ष राजेश प्रजापतिया सभानायःसुइ न्ह्याःगु उगुु ज्याझ्वलय् ताः ई लिपाः अमेरिकाया ओरेगन राज्यय् तेक्वाण्डोया प्रशिक्षक कथं ज्यायाना च्वनादिम्ह शुद्धोदन रञ्जितयात प्रशिक्षणया झ्वलय् सन् २०१७ य् ३ म्ह मिसापिं छात्रायात अनुचित व्यवहार याःगु द्वपं बिसें यौन दुर्व्यवहार केसय् मुद्दा पिडीतपिन्सं तःगु खः । तर ५१ दँया रञ्जितविरुद्ध वासिङटन काउन्टीइ मुद्दा चले जूगु यात अनया अदालतपाखें दोषमुक्त यानाबिल । व हे लसताय् वय्कः नेपाः झाःगु इलय् क्लबपाखें सत्यया विजय जूगुु भाःपा सम्मान यानागु खँ थःगु नुगः खँ तय्गु झ्वलय् अध्यक्षजुं धयादिल ।
लिसें मिडियां दोषी आरोपित जूगु इलय् बय्बय् यानाः सत्यतथ्ययात स्वया च्वयेगु मयासें आरोप जक बिइगु यात तर दोषमुक्त जूगु खँयात सुनानं मिडियाय् थाय् मब्यूगु खँयात नं कुलादिसें सुयांगु मनस्थितियात मस्वसें बुखँ जक प्रकाशित यायेगु पत्रकारिताया धर्म मखु धयादिल ।
अथेहे थःगु बिचाः प्वंकेगु झ्वलय् थःत म्वाःमदुगु द्वपनं यानाः मानसिक तनाव जूगु धाःसें थःम्ह मयानागु गल्तीया सजाँय् फयेम्वालिगु खँय् थः धुक्क जूगु धाःसें उगु इलय् थःत साथ बियादिपिं सकसितं सुभाय् देछायादिल ।
म्हिगःया उगु सम्मान ज्याझ्वलय् क्लबया मधु सुदन प्रधानयालिसे्र अन्य पदाधिकारिपिं व तेक्वाण्डोया अन्य कासामिपिंया लिसें क्लबया दुजःपिनिगु नं सहभागिता दुगु खःसा रञ्जितजुया तिरीमय्जु रिता श्रेष्ठ रञ्जित म्ह्याय् स्मिता रञ्जित नं उपस्थित दुगु खः ।
Author Profile
