ताेखाय् यःमह्री पुन्हिया लसताय् त्यःछिंत्यः फ्वनिगु

https://www.facebook.com/rajendra.manandhar.7906

झीगु सम्वाददाता 

ने स‌ं ११३९ थिंलाथ्व द्वादशी/ताेखा

“हाम्रो सम्पदा हाम्रो गौरव, पर्यटन प्रर्वद्धन हाम्रो पौरख” या नारा बियाः थ्वहे वइगु थिंलाथ्व पुन्हि कुन्हु “तोखा संस्कृति सम्पदा व यःमह्री पुन्हि त्यःछिं त्यः” ज्याझ्वः थ्वहे पौषया ७ गते तःजिक हनेत्यंगु दु ।

येँ, यल व ख्वपया मेयर, उपमेयरयालिसें अन्य थाय्या सकलें जनप्रतिनिधिया सहभागिताय् थुगु ज्याझ्वः याये त्यनागु खँ टोखा संस्कृति सम्पदा संरक्षण दबूया नायः मणिराज डंगोलजुं झीगु सम्वाददातायात जानकारी ब्यूगु खः ।

येँया उत्तरी प्रवेशद्वारया रुपय् म्हसिका दुगु प्राचीन सांस्कृतिक नगरी तोखायात सांस्कृतिक संरक्षित क्षेत्र घोषित याये धुंकूगु अवस्थाय् तोखायात आः न्हापासिबें अझ व्यवस्थित व विकासया लँपुइ यंकाः आन्तरिक रुपं व पर्यटनया ख्यलं नं यक्वः ज्याये यायेमाःगु थौंया आवश्यकता खः । उकिं थुकियात व्यवस्थित यायेगु ज्या जुया हे च्वंगु दु वय्कलं धयादिल ।

सरकारं समृद्धिया नारा बियाच्वंगु दु । थ्व धयागु मात्र खँग्वलं जक जुइगु मखु ज्यां क्यनेगु खः । उकिं तोखाया थुगु संस्थां यायेमाःगु ज्या यानाच्वनागु हे दु । व हे धलखय् झीगु नेवाः संस्कार व संस्कृति दुगु यःमह्री पुन्हिया लसताय् सकल थाय्या जनप्रतिनिधिपिन्त थुगु ज्याय् सहाभागिता यायेगु तातुनागु धयादिल ।

यःमह्रि पुन्हिया लसताय् त्यःछिं त्यः फ्वंवनेगुया नितिं झिगु थी थी पुचः दयेकाः जनप्रतिनिधियात सहभागीयानाः पुलांगु तोखाया दुनेया लागा नासःत्वाः,थनेलाछि, गणेद्यःयाथाय्, दुनेख्यलय्, त्वाफचाय्, क्वनेलाछि, द्यमद्ययाथाय् तुतिगलय्या लिसें अन्य थासय् वनेगु क्वःछिउगु दु । थुगु थाय्यात नगरपालिकां संरक्षण क्षेत्र धकाः घोषित याःगु खः । उकिं उगु थासय् जक त्यःछिं त्यः प्रत्येक पुचलय् नायःकथं न्ह्यःने तयाः वय्कःपिन्त उगु थाय्या अवलोकन नं याकेगु कथं ग्वसाः ग्वःयागु जानकारी डंगोलजुं बियादिगु खः ।

ज्याझ्वः सुथसिया १० बजेनिसें बहनिसिया ७ बजेतक जुइगु धाःगु दु । अथेहे सनिलपाखे थनेलाछि सांस्कृतिक ज्याझ्वः नं जुइत्यंगु दु । नापं दाफा भजन खलःयात जग्गा दान यानादिइपिं दातापिन्त हनापौ नं लःल्हायेगु ग्वसा दु । उगु दिंया ज्याझ्वःया समापन रक्षामन्त्री ईश्वर पोखरेलं याइगु जानकारी ब्यूगुु दु ।

थुगु ज्याझ्वः तोखा संस्कृति संरक्षण दबूया ग्वसालय् जुइत्यंगु खःसा तोखा नगरपालिकाया लिसें नेवाः गुथि तोखा, तोखा चण्डेशवरी दाफा खलः, सरस्वती धिमें खलः, तोखा खड्गी युवा समाज, तोखा प्वं खलःया सहकार्यय् जुइत्यंगु खः ।

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.