‘तसकं यःम्ह’ म्येया म्यूजिक भिडियाे सार्वजनिक जुल

https://www.facebook.com/rajendra.manandhar.7906

झीगु संवाददाता

ने सं ११३९ थिंलागाः  एकादशी

थःगु कलेज जीवनय्अन्तर क्याम्पस धेंधेंबल्ला कासाय् छपू म्ये हाला म्ये हालामि सुरज बज्राचार्यं तसकं बांलाम्ह म्ये हालामिया सिरपा त्याकादिल । व हे म्येय् तःदँ लिपा म्युजिक भिडियाेया रुपय् सार्वजनिक जुल  ‘तसकं यःम्ह’ नां ज्वना ।  गुकियात  वरिष्ठ संगीतकार अमरराज शर्मां च्वयादीगु व लसय् हनादिगु खः ।

अथेला म्ये हालामिया आपालं लाेकंह्वाःगु मेमेगु म्ये नं दु । तर छुं दँ न्ह्यः छपू म्येगु म्येय् पाखें अझ अप्वःसिन वय्कःयात म्हसिकेगु ह्वता चूलात । ग्या‌ंगम स्टाइलया म्येयात नेवाः भाषं थःगु हे नेवाः पहः दुथ्याकाः थ्व ला ग्यानपु स्टाइल धकाः थासंथासय् दबुलिइ वय्कः दँ झाल । गुगु म्येयात मचानिसें बुह्रातसें तक उलि हे न्ह्याइपुक न्येनेगु यात । उकिं सुरजजुया थुगु म्येयात नं सकसिनं ययेकीगु खँय् वय्कः ढुक्क जुयादी ।

छपू म्ये बांला धायेकेत शब्द संगीत अले सःया सुमधुर संगम जुइमाः । अले जक न्यनामिपिनिगु नुगलय् दुहाँ वनी । म्येया मिठास यइपुगुया लिसें कर्णप्रिय जुलकि जक सकसिगु नुगलय् सदां ल्यनाच्वनिगु खः । सुरजजुं हालादिगु थुगु तन्हु मछि दत वइत जिं मखंगु । जि यःम्ह तसकं यःम्ह । थुकिया शब्द हे नं सकसिगु न्हाय्पं सालेत ताः लाःगु दु । अथेहे शर्माजुया लय् व संगीत नं कर्णप्रिय जुयाच्वंगु दु ।

युट्युबय् नं सार्वजनिक यायेधुंकुगु थुगु म्येया स्वकुमिपिं खुद्वलं मल्याक थ्यने धुंकल । अझ नं ल्याः अप्वया वनिगु हे जुइ । थुगु म्यूजिक भिडियोस नेपालभाषाया लिसें नेपाली भाषाया नकिं आशिष्मा नकर्मीया लिसें मेम्ह लाेकंह्वानाच्वंम्ह कलाकार रुपेन श्रेष्ठ थक्वाः व म्ये हालामि बज्राचार्यं स्वयमं हे अभिनय नं यानादीगु दु । किपूया थासंथासय्  छायाँकन जूगु म्यूजिक भिडियो उलेज्या म्ये हालामिया अबुजु चित्रवीर बज्राचार्यया नायसुइ जूगु खः ।

थुगु म्ये वंगु दँय्  सुरजवीरया हे नेपालभाषाया  ‘बूदिंया भिंतुना ’  म्येया ‘दोहलपा’ एल्बमय् दुथ्यागु छपू म्ये खः । थुगु म्येया  छायाँकन व सम्पादन सोहन मानन्धरं याःगु खः ।

राष्ट्रिय पुरस्कार विजेता रामकृष्ण खड्गीया निर्देशनय् दयेकूगु थुगु  म्यूजिक भिडियो सार्वजनिक याःगु इलय्  कलाकारपिं व  निर्देशक खड्गीं म्यूजिक भिडियो निर्माणया झ्वलय् जूगु अनुभव न्यंकादीगु खः ।

च्वमि व लय् चिनामि शर्मां  थ्यंमथ्यं ३५ दँ या इलय् म्ये सृजनाया  अनुभव न्यंकुसें सकल न्यनामिपिं पाखें बांलागु प्रतिकृया  वयाच्वंगु खँ कनादिल । अथेहे म्ये हालामि सुरजजुं थःगु म्ये अभिनय यानागु अनुभव कंसें सकल निर्माण पुचः व गुहालिमिंपिन्त सुभाय देछाया दीगु खः । ।

 

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.