टोखाया निगू संस्थाया मंका ग्वसालय् संस्कृतविद् सत्यमोहन जोशीयात अभिनन्दन याइगु

११३८ दिल्ला गाः अष्टमी

झीगु सम्वाददाता

थ्वहे वइगु श्रावण शुक्ल पारु (श्रावण २७) कुन्हु टोखाया स‌ंस्कृति सम्पदा संरक्षण दबू पुचःनेवाः गुथि टोखाया मंका ग्वसालय् भब्य रुपं शताब्दी पुरुष इतिहास व संस्कृतिविद् सत्यमोहन जोशीयात  अभिनन्दन याइगु जुगु दु ।

किपाः रेखा शाक्य

सुथसिया ८ बजे रत्नपार्कया शान्तिवाटिकां निसें विशेष झाँकी सहित थी थी बाजंलिसें वय्कःयात राष्ट्रिय सभागृह हलय् माननीय उपप्रधान तथा रक्षा मन्त्री श्री र्इश्वर पोखरेलया मू पाहाँसुइ माननीय संस्कृति पर्यटन तथा नागरिक उड्ययन मन्त्री श्री रविन्द्र अधिकारया लिसें येँ महानगरपालिका नापं उपत्यकाया सकलें नगरया मेयर व उपमेयरपिनिगु उपस्थितिइ व सकल टोखावासीया सहभागीताय् तःजिक हनेगु ग्वसाः दुगु थौं जुगु पत्रकार सम्मेलनय् जानकारी ब्यूगु दु ।

किपाः रेखा शाक्य

उगु हे ज्याझ्वलय्  टोखाया मेयर भाजु प्रकाश अधिकारीं जानकारी ब्यूकथं टोखा नगरपालिका‌ं प्यदँया दुने यायेगु ज्याया कार्यपत्र नं न्ह्यब्वइगु जुगु दु । उगु कार्यपत्र कथं मुलुकया आर्थिक उन्नती व सृजनशीलताया नितिं स्थानीय स्रोत साधनया पहिचान यायेगु,भष्ट्राचार न्यूनिकरण यायेगु, जलविद्युत उत्पादन तीव्र यायेगु, उद्योग धन्दाया व्यापक प्रवर्द्धन याना रोजगारीया व्यापक सृजना यासें सम्मुन्त मुलुक निर्माणय् तत्काल यायेफइगु ज्याय् वर्तमान सरकार व स्थानीय सरकार‌ं याइगु नीति व योजनायात ध्यानय् तया एेतिहासिक शहर टोखायात छगू प्राचीन नेवाः बस्तीया रुपय् न्ह्यब्वयेगु जुइ धयादीगु दु ।

टोखा शहरया मौलिक संस्कृति सम्पदा व धार्मिक संस्कृतिया संरक्षण व सम्वर्द्धन यायेमाःगुलिइ टोखावासीया जक च्यूताया विषय मजूसें थ्व झी नेवाःतय्गु धरोहर खः धइगु खँया जानकारी बिइगु व येँया लिक्कसं लाःसां थुकिया व्यापक प्रचार प्रसार मजूगु हुनिं यानाः लिउने लानाच्वंगु खँ न्ह्यब्वःसें सकल जनप्रतिनिधिया न्ह्यःने थुगु शहरया गरिमायात न्ह्यब्वःयेगु तातुनां टोखा शहरय् हे अभिनन्दन ज्याझ्वः मयासे येँया सभागृहया हलय् ग्वसाः ग्वयागु खँ पत्रकारपिन्सं टोखाय् हे थुगु ज्याझ्वः छाय् यानामदीगु धइगु न्ह्यसलय् लिसः ब्यूगु खः ।

टोखा शहरयात थ्वहे आर्थिक वर्षंनिसें सांस्कृतिक संरक्षित शहर धकाः घोषणा याये धुंकगु खँयात लुमंकुसें ग्वसाः खलकं प्राचीनकालंनिसेंया सम्पदा संस्कृति व मौलिक नखःचखःयात आः व्यवस्थित जक मखसें संरक्षण व सम्बर्द्धन यानाः पर्यटकीय दृष्टीं नं टोखायात आर्थिक रुपं सम्पन्न यायेगु योजना दुगु खँ धयादिल ।

थौंया पत्रकार सम्मेलन ज्याझ्वःस टोखाया  ग्वसाः खलःया अध्यक्षद्वय मनिराज डंगोल व देवराज डंगोल टोखाया २ नं वडाया अध्यक्ष दिपकराज जोशी ३ नं वडाया अध्यक्ष सिंहराज श्रेष्ठ नेवाः देय् दबूया नायः नरेश ताम्रकारया लिसें ग्वसाः खलःया अन्य पदाधिकारीपिनिगु नं उपस्थिति दुगु खः ।

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.

%d bloggers like this: