झी नेवाः जाति
झी नेवाः जाति नेवाः हे जुइ
धर्म कर्मसं विश्वास दुपिं
थः स्यना नं कतःया भिं तुनीपि
थःगु हे पौरखय् लुधंपिं
झी नेवाः जाति ।
नसा मदया प्वाः सुखुचिंसां
सुयाकें ल्हाः फये मसःपिं
सत्यया लँय् जुइ दतसा
थः थम्हं हे धन्य खँनीपिं
झी नेवाः जाति ।
धर्म कर्म पुजासं न्ह्याबलें दुंपिं
थःगु तजिलजि हे थःगु सम्पत्ति
सुयागुं धनसं मिखा मब्वइपिं
मामं स्यना थें कपाय् बनिया झीपिं
झी नेवाः जाति ।
देगः सतः फलेचा सकतां
कला किर्ति जाःगु ब्वसा
थ्व फुक्कं झीगु हे तिसा
खः हलिं थ्वयेका च्वनापिं
झी नेवाः जाति ।
थः हे दाजुकिजा सिनानं ख्वये मसःपिं
थः माम ख्वलनं ह्ययेके मसःपिं
थःयात दाःवल नं पँने मसःपिं
न्ह्याथे दुःख बिउसां हाले मसःपिं
झी नेवाः जाति ।
कतकं स्यावल नं हय्काये मसःपिं
थःगु ब्व लाका काल नं ख्याये मसःपिं
थवंथवय् ल्वायेत ग्वहालि म्वाःपिं
थःगु छें पित्युं वल नं ख्याये मफुपिं
झी नेवाः जाति ।
जंगले वंसा अहलिया जुइ मसःपिं
अफिसे वंसा नायो जुइ मसःपिं
म्ह छम्हं ध्याचले दुं सां फुँइ मतंपिं
थःगु हक लाकाकालं नं ल्वाये मसःपिं
झी नेवाः जाति ।
नये त्वनेथाय् न्ह्याबलें लिउने लाइपिं
ला मदु क्वँय् जक खंसां बातं कइपिं
ह्वाये नं मफु पाये नं मफु ख्याकं त्यःपिं
थवंथवय् नं हे जाये मसःपिं
झी नेवाः जाति ।
(थाैंकन्हे लय्पाैपाखें ल्ह्ययागु)
Author Profile
