fbpx

झिंन्याःगु शताब्दीया कोथुननी स्यंकाः ब्यापारिक कम्प्लेक्स दयेके मबिकेत डेलिगेसन

झीगु संवाददाता

येँ, बछलाथ्व १० । अनसनय् च्वंगु कोथुननी स्यंकाः ब्यापारिक कम्प्लेक्स दयेकेगु  धकाः गुथि संस्थानं यानाच्वंगु कुतःया बिरोधय् मंगलवाः येँया जनप्रतिनिधित  भूमि व्यवस्था, सहकारी तथा गरिबी निवारण मन्त्रालयया मन्त्री पद्मा कुमारी अर्यालयात नाप लात ।

पुरातात्विक महत्वं संरक्षण यायेमाःगु छेँ यात थुनाः कम्प्लेक्स दयेकेत्यंगु जुया: थुकियात तुरन्त हे दिकेमाल धकाः मन्त्री अर्यालयात संघीय सांसद जीवनराम श्रेष्ठ व रामवीर मानन्धरपाखें ध्यानाकर्षण याःगु खः ।

नेवाः ह्यलुवा नापं सम्पदाप्रेमी उमेश स्थापित व रविन्द्र श्रेष्ठं मन्त्री अर्यालयात  उगु छेँया पुरातात्विक महत्व व इतिहासबारे जानकारी बिल । डेलिगेसन पुचलय् २५ वडासदस्य कमलतारा स्थापित लिसें सञ्चारकःमि नृपेन्द्रलाल श्रेष्ठ, सुरेन्द्र भक्त श्रेष्ठया नं उपस्थिति दूगु खः ।

सार्वजनिक सम्पत्ति संरक्षण यायेगु जिम्मेवारी बियातःगु सरकारी निकाय गुथि संस्थान नं हे अन व भाडा कायेगु जक यानां मगानाः सम्पदा हे मासे यायेत्यंगु धकाः स्थानीयपिंन्स असनय् क्वथुननीया न्ह्यःने सार्वजनिक रुपं विरोधसभाया शुक्रवाः याःगु खः । उगु ज्याझ्वलय् थी थी राजनैतिक पार्टीया ब्यक्तित्वपिनिगु उपस्थिति दूगु खः ।

मल्लकालया व्यापारिक केन्द्रया कथं दयेकातःगु थ्व छेँयात नेपाःया हे दक्कले न्हापांगु  अपार्टमेन्ट कथं नं नालातःगु दु ।

च्यागु आना स्वंगू दाम क्षेत्रफलय् दुगु थुगु छेँ बायु देवता गुथिया नामय् दु । गन छगू कोथाय् अशोक बृक्ष विहार दु । थुगु बिहारय् पुरातात्वीक अमिताभ बुद्घया मुर्ति दु । थ्व मुर्ति पन्ध्र वा सोह्र शताब्दिइ दुने दयेकूगु पुरातत्व विभागं पुष्टि याःगु दु । थ्व हिसावं हे जक थ्व छेँया आयु म्होति नं न्यास दँ पुलांगु जुल ।

पुरातात्विक महत्वं संरक्षण यायेमाःगु छेँ यात थुनाः कम्प्लेक्स दयेकेत गुथि संस्थानं बज्रयोगिनी बहुउद्देश्यीय कम्पनी नां या छगू व्यापारिक संस्थाना सम्झौता याःगु खः । सम्झौता कथं उगु व्यापारिक पुचलं २७ दँ तक कारोबार यायेखनी ।

थुगु छेँ (गुकियात घडी घर नं धायेगु याः) सलंस दँ न्ह्यो निसें च्वनावयाच्वंपिं ३गु परिवार लिसें अन छेँय् पसः तयाः बनेज्या यानावयाच्वंपिं १४ परिवारनाप गुठी संस्थानं नापी जूगु इलय् सन्तान दर—सन्तान बहाल भूबहाल पुलाच्वंतले च्वनेदइगु स्वीकार याःगु खः । व न्यादँ न्ह्यो थौं कन्हय्या बजाःभाः कथं न्यादँ पतिकं बहाल रकम पुनरावलोकन यायेगु सम्झौता तक नं याःगु अवस्था खः ।

आः वयाः हे गुठी संस्थानं उगु छेँ खाली यायेत रैथानेतय्त बलजफ्ती अन्याय पूर्वक सूचंना जारी याःगु दु ।

Leave a Reply

Your email address will not be published. Required fields are marked *