ज्यापु संस्कृति विकास कोषपाखें मंकाः गुरुपूजा

झीगु सम्वाददाता

११३८ दिल्ला गा पारु, येँ । ज्यापु संस्कृति विकास कोषपाखें गुरु पुन्हीया लसताय् २०६५ सालनिसें दँय्दसं न्हाकावयाच्वंगु येँया परम्परागत ६३ त्वाः खलःया मू गुरुपिन्त गुरुपूजा याना हनेगु ज्याझ्वः मंकाः गुरुपूजा व १५क्वःगु राष्ट्रिय ज्यापु दिवस समारोह समिति ११३९ या पाःब्वः लःल्हायेगु ज्याझ्वः येँ महानगरपालिकाया मेयर भाजु विद्यासुन्दर शाक्यजुया मूँ पाहासुई म्हिगः क्वचाःगु दु । न्हापांगु ब्वय् परम्परागत ६३ त्वाः खलःया मू गुरुपिन्त हंगु खसाः लिपांगु ब्वय् ने.सं. ११३८ सं पाःफम्ह नःबहि दगु दाफा खलःपाखें नायः भाजु न्हुच्छे नारायण महर्जनं १५क्वःगु राष्ट्रिय ज्यापु दिवस समारोह समितिया संयोजक धर्मचक्र तःननी खलःया भाजु तीर्थ नारायण महर्जनजुयात पाःब्वः लःल्हागु खः ।

किपा – शरण ज्यापु हरि
किपा – शरण ज्यापु हरि
किपा – शरण ज्यापु हरि

ज्याझ्वःलय् मूपाहां शाक्यजू जन्मय् मखु कर्मय् विश्वास यायेमा धयादिसें ज्यापु संस्कृति विकास कोषं दँयदसं गुरुपिन्त हनेगु गुगु ज्याझ्व यानावयाच्वंगु दु व तसकं च्वछाय् बहजु धयादिसें थुगुसिनिसें महानगर दुनेया सकल जातजातिया परम्परागत बाजागाजाया मू गुरुपिन्त दँय् २५,०००।–तकां सम्मान यायेगु क्वःछिनागु दु धयादिल । लिसें ज्या याम्हेसित कुँखिनेगु त्वता व सिबें बांलाक ज्या यायेगु आज्जु ज्वनादिइत नं सकलसित इनाप यानादिल ।

किपा – शरण ज्यापु हरि

ज्यापु महागुथि नेपाः केन्द्रीय तयारी समितिया नायः भाजु राजभाई जकःमिं चिनाखँ मार्फत गुरुपिन्त अभिनन्दन यासें १५दँ निसें ज्यापु संस्कृतियात जागरण यायेत अग्रसर जुयाच्वम्ह ज्यापु संस्कृति विकास कोषयात बधाई बियादिल ।

किपा – शरण ज्यापु हरि
किपा – शरण ज्यापु हरि

कोषया नायः भाजु मंगल कृष्ण सिंहजुं गुरु हनां ज्याझ्वः मदिक्क यानावनेगु खँ कसें अक्षयकोषय् रु. १५ लाख थप यायेत महानगरपालिकायात इनाप यानागु दु धयादिगु दु । नापं महानगरनाप सहकार्य याना न्ह्याःवनेगु कोषया मनसाय दुगु खँ न कनादिल ।

किपा – शरण ज्यापु हरि

कोषया न्वकु भाजु सन्तकुमार महर्जनं लसकुस न्वचुया झ्वलय् परम्परागत ६३ त्वाःखलःया मू गुरुपिन्त हसें सम्मान यायेखंग ज्यापु संस्कृति विकास कोषया अहोभाग्य खः धयादिल । नापं २०६५ सालनिसेंया ज्यापु संस्कृति विकास कोषया विस्तृत विवरण नं न्ह्यब्वयादिल । थौंतक ज्यापु त्वाःछेँ मदुगुलिं कोषया त्वाःछेँ दयेकेगु कुतःलय् ग्वाहालि यायेत सकलसित इनाप यानादिगु दु ।

किपा – शरण ज्यापु हरि

ज्याःझ्वःलय् कोषया दुजः भाजु सत्य नारायण डंगोलं कोषया भावि कार्य योजना प्रस्तुत यानादिगु खसा धर्मचक्र तःननी खलः त्वाःगुथिया नायः भाजु तीर्थ नारायण महर्जन, १४क्वःगु राष्ट्रिय ज्यापु दिवस समारोह समितिया संयोजक भाजु न्हुच्छे नारायण डंगोलजु, नारायण परिवार क्बलया नायः भाजु प्रचण्डमान बज्राचार्यजु सकल गुरुपिन्त हनाबना तसें थःथगु नुग खः न्ह्यब्वःगु खः ।

 

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.