ज्याथम्ह लाखे अाेम शंकरया अनुभव – लाखेप्याखंयात कया

रेखा शाक्य

ज्याथम्ह लाखे अाेमशंकर रंजित । थाैं वय्कः झी दथुइ मदु । वय्कः थःगु नश्वर शरीर त्वता वंगु नं निदँ क्यनीन । येँयाः वलकी वय्कःयात लुमंकीपिं यक्वः हे दु । उकिइ मध्येय् जि नं छम्ह खत ।  थथे हे येँयाः बलय् वय्कःयात मजिपातया लाखे छेँय् हे नापलाना खँल्हाबल्हा यानागु खः । वय्कःयाके थः लाखे जुगु र्इया अनुभव न्यनागुया छुं दिं लिपा हे वय्कः मदुगु दुःखया खँ न्यनेमाल । थ्व हे अन्तर्वाता वय्कःया जीवनया दकलय् लिपांगु जुया बिल । थाैं हाकनं वय्कःयात लुमंका वय्कलं कनादिगु अनुभव थन न्ह्यब्वःया च्वना । 

किपाः रेखा शाक्य

जिगु नां ओमशंकर रंजित । आः जि ६२ दँ दत । जि लाखेननिया हे स्थानियबासी खःसां आः थौंकन्हे छाउनी च्वनच्वना । उबलय् साप यः जितः थ्व येँया नखः । जि थ्व लाखेनापं मचाबलय् निसें हे सतिक्क च्वनाम्ह । थः थकालीपिन्स संरक्षण यानाः वयाच्वंगु (न्हापा कोहिटीया ज्यापुतय्सं संरक्षण यानाच्वंगु लिपा तिनी छिपा (रंजित तय्गु संरक्षणय् वःगु) ।

येँयाः ज्वछिं न्हिनय् जुलकी लाखेया बाजं नापं चाहुलेगु । गन गन लाखे प्याखं हुइत यंकी जि नं नापं हे वनेगु । अथे यायां जिं लाखे बाजंया बोलयात थुइका यंका । बाजं नं थाये सयेका यंका । इलय् ब्यलय् बाजं वा भुस्या थायेगु, नाप नापं बाजंया तालय् लाखे प्याखं हुलेगु पहः नं थुइका तुं वना । जितः लुमं जि लाखय् जुयागु इलय् मात्र ११ दँ दूगु खः । मचाबलय्निसें भ्यलेपुनागु जूगुलिं जुइ जिं लाखे प्याखं हुलेबले मनूत मन्त्रमुग्ध जुया स्वइगु । अथेला जिगु म्हगलं नं साथ बिउगु जुल । जि उबलय् फूर्तिलो व म्हगलं नं तःधिक ।

जिं ११ दँ निसें लाखे जुया प्याखं हुलावया । अथेहे ४० दँ मल्याक प्रत्येक येँया बलय् जिं लाखे जुया प्याखं हुला । थ्व जिगु नितिं छगू गौरवया खँ हे जुया बिल । जि थुलि तक लाखे जुया प्याखं हुलेखंगु थ्व द्यःया महिमा व जि प्रति द्यवं तयाबिज्यागु बिश्वास हे खः धयाथें जितः ताः । उबलय् जितः लुमं, बाजं था थां जिं न्ह्यःयापिं लाखे प्याखं हुलाक्यनीगु स्वयागुलिं जुइ गथेयाना लाखे प्याखं हुलधाःसा बांलाइ धकाः अन्दाज दयेधुंकूगु अवस्था ।

उकिं जब जि थः स्वयम लाखे जुया, जिके व परिपक्वतां भय बिल । जिगु प्याखं हुलेबलेया थी थी मुद्रात ल्हाःया पोजिशन, तुतिया पोजिशन, प्याखं हुइबले ल्हाः छ्यनये यंकेगु पहः, बाजंया तालय् थःगु प्याखंया पोजिशन हिलेमाःगु गथेकि लाखे याकचा प्याखं हुलेगु, झ्यालिंचा नापं ख्याःयाना प्याखं हुलेगु, लाखे व झ्यालिंचा मनूया हुलय् दुने पिने याना प्याखं हुलेगु व झ्यालिंचित लित्तुलिना प्याखं हुलेगु, थ्व सकतां लाखे जुम्हं थुइकेमाः गुगु जिगु दिमागय् छाप जुया च्वनेधुंकल ।

थ्व दक्वं चाल न्ह्याइपुकेत, मनूया हूल चिइकेत लाखे आजुं इमा मन्दया रुपय् सर्पया चालय्, ब्यांचिया चालय् व फनफन चाहुला थःगु ख्वाःपा निपा ल्हातं ज्वना जवंखवं संकेगु याना सकसितं मनोरञ्जन बिइगु खः । थ्व सकतांयात थः दुने समाहित यानाः जिं थः लाखे प्याखं हुलेत सक्षम खः धकाः उबलय्या जनमानसय् छगू कथं छाप हे त्वता तयागु । उकिं थुकथं न्ह्याथाय् पुजा जुइबले नं जितः हे लाखे जुया वयेमाःगु निमन्त्रणा वइगु । थज्यागु इलय् न्हापां मेपिं नि लाखे यानाः उगु थासय् तक यंकेगु अले पुजा फये धुनेवं जि लाखे जुया प्याखं हुला क्यनेगु ।

उबलय् जि लाखे जुया प्याखं हुलेगु इलय् जब धात्थेंम्ह झ्यालिंचिया थासय् उगु त्वाःया सुं मनू ल्हातय् रुमाल छकू ज्वना जितः हिस्याना झ्यालिंचा लाखेय्या बाजंया तालय् प्याखं हुलेगु पाः वइ थुबले जिं व झ्यालिंचित ज्वनेत गुगु कथं प्याखं हुली व दकसिबे न्ह्याइपुगु दृश्य सकल स्वकूमिपिनिगु लागी जुयाबिइ हँ ।

उबलय् जिगु ब्वाँय्वनेगु शक्ति इमाया थें जुया झ्यालिंचित सुलां सुले मफयेक यानाबिइगु हँ । छेँ , झ्यालय्, कःसिइ व लँपुइ च्वना स्वयाच्वनिपिनी का लाखे नं झ्यालिंचित ज्वनी नं धकाः हालाहइगु व छगू कथं अनया लकस हे खँग्वलं बयान याये थाकूगु जुया च्वनीगु हँ धकाः लिपा मेपिन्स कनीगुलिं नं जितः गर्व ताः ।

किपाः रेखा शाक्य

जब जिं थःगु वसः त्वःता न्हापां तासया जामा पुने, अन लँ फिइ, छ्यनय् तुयुगु फेटां चिइ, जँधुलिइ जनिइ हिने, चुनरी ल्हातये चिइ तर जब जिं व तःतग्वःगु घंघला जँधुलिइ चिइ अन लिपा जितः घ्वाप्प त्वपुवःथें जिं बच्छि चाइ बच्छि मचाथें गये थें गये थें जितः जुइ धुंकी । अले ख्वाःपा पुयाः लाखे आजु जुया छेसंँ पिहाँ वयेवं जिं अन सुयांत सु धकाः म्हसिइ मखु ।

जि उबले मात्र छम्ह लाखे आजु कथं बाजंया तालय् प्याखं हुलाच्वनी । लाखे जुइगु इलय् नये मज्यू केवल नीलः जक त्वनेज्यू । ख्वाःपा नं लिकया सर्ग स्वकाः जिं ला गुबलें प्याखं महुला । जब तसकं सासः ल्हाये थाकुइ उबलय् ध्याकुनय् वना ख्वाः छकः स्वात्त हुया हाकनं ख्वाःपा पुइ धुंकी ।

तर थौयापिं लाखे जुइपिन्सं अथे मयाः । खः लाखेया वसः, घंघला व ख्वाःपा व सँया बोझं तसकं तान्वया सासः हे फी मफइगु स्वभाविक खः तर ख्वाःपा लिकया प्याखं ल्हुया मबिउसा तसकं बांलाइ । यायेमाःगु नं अथे हे खः । हानं लाखे प्याखं हुलेबले लाकां न्ह्याये मज्यू , व वल फय् वल धाये मदु, लँपुइ निभालं पुनाच्वनी, कथं सुयाच्वनी , खालं ताःया च्वनी, चागचां झ्वयेपियाच्वनी तर उकिया छुं च्यूता दयाच्वनी मखु ।

व नं छगू दैवीय शक्ति हे खः । जब लाखे वसः त्वते अनलिपा घाः जू थाय् क्वाताक्वाता मिंक्क स्याना वइ , वसः त्वतेवं हे न्ह्यः वये धुंकी अले हाकनं कन्हे द्यः जुइमानी धैगु मतिइ तया द्यनेवं स्याःचाः सकतां ल्वमनी । उबले जिगु पालय् ला गबलें गबलें याकः हे द्यः छेँ नं लाखे आजु जुया पिहाँ वनेवं बहनी एघार बाह्र बजे दुहाँ मवतले थः हे याकचा नं लाखे जुया न्हिच्छि प्याखं हुले नं ।

थौंकन्हे थासं थासय् पुजा फः वनेथाये थ्यनकी लाखे हिलेगु याः । आःया पुस्तायाके लाखे जुइगुलिइ नुगः क्वसागु नं बांलागु खँ जुल । हानं न्हापालिपा थें छिपा जक लाखे जुइगु चलन नं मखये धुंकल । उकिं येँया ज्वछिं लाखे नापं जुइपिं छुं नं जातया मस्त, ल्यायम्ह सकसिके नं लाखे जुइगु मनंतुना दइगु स्वभाविक हे खत समाजय् नं लाखे जुइम्ह प्रति स्वइगु मिखाय् आस्था व सम्मान दूगु जुल । थथे लाखे जुइम्ह केवल छिपा वा रंजित थरया जक मखसें सुं नं जातयाम्ह गुम्हसिन लाखे बाजं, बोलया आधार, प्याखं हुलेगु शीप व क्षमता क्यनेफत धाःसा याउँक लाखे जुइदइगु लकस दूगुलिं थ्व लाखे प्याखंयात अझ जनमानसं थः धैगु भावनां स्वयाबिल थ्व दकलय् बांलागु पक्ष जितः ताः ।

लाखे प्याखं हुलेगुलिइ छुं न्हूगु पहः मदु व हे पुलांगु पहः हे खः । वसः नं व हे खः । परम्परा कथं लाखेया तासया वसः ३ बर्ष क्वचाया ४ बर्ष च्वनकी न्हूगु दयेकेमाःगु चलन दु । लाखेया ख्वाःपा दकलये न्हापाया ला खुया यंकेधुंकल । आः दूगु ख्वाःपा अन लिपा दयेकूगु खः ।

न्हापा न्हापा येँया जुलकी ल्वापुख्यापु जुइगु याना हे च्वं । उबलय् झी नेवातये जात्रापात्रा जुलकी अय्ला थ्वँ त्वनेगु व त्वंकेगु बानी दु । थ्व झी नेवाः संस्कार नं खत । थज्यागु हे इलय् जात्रां पासापिं मुनाः चाहुली , अय्ला थ्वँ त्वना च्वनी । अले हा हा लय् हे सुनां मिखां जक स्वसां वा सुनां हुलय् मचायकं धक्का जक नकूसां का जितः हेपेय यात धैथें वा न्हापालिपाया तं लुमंका ल्वापु याइगु । छम्हस्या का का जुकी जुकी , दा दा जक धायेमाः ल्याम्हसु पिकया घाराघुरुं भाराभुरुं दायेगु शुरु जुइ अले व ल्वापु सुया सु नाप धकाः धायेबलये गुम्ह लाखेया पुचः नापं वःपिं , गुम्ह पुलुकिसीया पुचः नापं वःपिं सा गुम्ह हलचोकया सवभक्कु नापं वःपिं नाप जुयाच्वनी ।

त्वाःत्वालय् , छेँखाय् हल्ला जूकथं लाखे, पुलुकिसी व सवभक्कु नाप छतिं ल्वापु जूगु खैमखु । अथें तदँ तक ल्वापू जू । गुकिंयाना येँया बलय् छुँ छुँ त्वालय् प्याखँ तकं हुइक मवं । तर २०३५ सालय् स्वंगूया नं जिम्मेवार पुचःपिं नापं च्वना मेलमिलाप यानाः आवंलि थज्यागु ल्वापु ख्यापु मजुइकेगु वातावरण दयेकेगु व उकिया नितिं लाखे छेँपाखें मजिपाःया लाखेननिइ पुलुकिसीयात व सवभक्कुयात सःता ससम्मान पुजा बिइगु व समयबजि नकेगु अथे हे पुलुकिसीं नं नानीचायाः खुन्हु मजिपा लाखे व सवभक्कुयात सःता ससम्मान पुजा बिइगु प्रचलन न्ह्याकुगु खः । थुकिंयाना जात्राया हुलय् लवः कया त्वाः त्वाःया दथुइ वैमनश्यता ब्वलंकीपिन्त हाकुतिनीगु ज्या जुल ।

थ्व लेख ने‍ सं ११३६ ञँला थ्वः १५ स नेपालभाषा टाइम्सय् नं पिथने धुनागु खः । 

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.