ज्ञान व शीपया नितिं हनीगु श्रीपंचमी

ज्ञान व शीपया नितिं हनीगु श्रीपंचमी

विद्यायात झीसं गुलि महत्व बिया वयाच्वना उकीया ल्याः चाः तयेगु अःपुगु मखु । थ्व हे कारणं थौं विश्व थुलि न्ह्याः वने धुंकल की आः वया चन्द्रमाय् छेँ दने धुंकल धकाः  जक न्यने ल्यं दनी । थ्व दक्वं विद्यां हे जूगु खः । आखः ब्वनेगु जक विद्या कथ नं मकाःगु थौया इलय् शीपयात नं विद्या कथं नालेमाः । थ्व हे शीप व विद्याया द्यः धकाः झीसं आः तक ससुद्यः वा मंजुश्रीयात हना वयाच्वनागु खः ।

ससुद्यः ।
किपा रेखा शाक्य

बौद्धतय्सं मंजुश्री अले हिन्दुतय्सं सरस्वती वा ससुद्यः या नामं हना वयाच्वंगु थुगु पंचमी कुन्हु वास्तवय् मस्तय्त दकलय् न्हापां शिक्षा बीगु न्हि कथं काइ । गुरुकुल थापना मयासें छेँ हे प्रारम्भिक शिक्षा बीत वा विद्यारम्भ यायेत थ्व न्हि कुन्हु मंजुश्री ससुद्यः प्रति भक्ति भाव यातकि शिक्षार्थीया स्मरण शक्ति बल्लाइगु, ज्ञान दइगु व धन प्राप्ति जक जुइ धइगु ल्याखं हे थौंतक व्रत च्वनाः द्यः प्रति श्रद्धा भक्तिभाव तइपिं म्हो मजु ।

श्रीप‌ञ्च‌मी कुन्हु मचा‌‌ न्हापा‌ंगु खुसिइ आखः च्वइच्वंगु ।
किपा रेखा शाक्य

स्वनिगलय् झी ससुद्यः दुसां अप्वःसिनं ससुद्यःया बनौट स्यूगुलिं झीगु समाजय् ससुद्यःया महत्व गुलि दु धकाः खंकेफु । मजुंपंचमी व श्रीपंचमि कुन्हु विशेषत मिसा मस्तय्सं थःपिंसं हे थाज्यां दयेका वःगु कापः व कपाय् द्यःयात छाय् यंकी । लिसें छन्हु न्ह्यव हे मंजुश्री ससुद्यः ल्हासां वःगु ल्याखं त्यानुल जुइ धकाः द्यःयात चिकं बुकः जुइगु परम्परा ल्यना च्वंगु दु ।

श्रीपंचमिया बारे चर्चा यायेबले विशेषतः झीसं ल्हासां वःम्ह मंजुश्री ससुद्यः या हे चर्चा यायेगु यानाच्वना । ल्हासां वम्ह ससुद्यः ख्वपया महामण्डलय् पंचमि कुन्हुु थ्यनेवं अन हे स्वन्हु तक  स्वयम्भु भगवानया आराधना यानाः गुहेश्वरीया दर्शन यानाः तिनि येँ देशय् च्वंगु पुखूया लः न्हासिकापय् ध्यनाः पितछ्वया ब्यूगु खः । थः शक्तिपिं मोक्षदायात धिलाच्वः व वारदायात फूच्वःय् तयाः तिनि थन बस्ति विकास यायेत लः पितछ्वयेगु ज्या याःगु खः ।

मंजुश्री न्हासिकापय् खड्गं पालाः लः पित छ्वयेधुंकाः द्यः यात लित छ्वये मखु धइगु भावं द्यःयात थन हे च्वने माःगु विन्ति भावया कारणं द्यः दकले न्हापां येँ देया क्वःने लागाय् च्वंगु धइगु दु । द्यःया खड्गयात थनया लगंबहालय् हे थापना यानाब्यूगु खः । थुकियात बः बीगु आधार धइगु लगंबहाः जःखः लाःगु मंजुश्रीत्वाः नं छगू खः । येँ देय्या प्राचीन बस्ति मध्ये छगू येँगाःया लिक्क लाःगु मञ्जेश्वरी वा मंजुश्री द्यः च्वंगु धइगु ल्याखं अन छगः देगः दयेकातःगु दु ।

श्रीप‌ञ्च‌मी कुन्हु मचा‌‌ न्हापा‌ंगु खुसिइ आखः च्वइच्वंगु । किपा : शरण डंगोल

 

गुगु देगः न्हयगु शताब्दी वा व सिबें न्ह्यवया खनेदुसा देगःया विकासक्रम मंजुश्री स्वयम्भु पर्वतय् च्वने न्ह्यव हे वा अन विकास जुइ न्ह्यव हे जूगु खनेदु । जेठ पुन्हिबलय् स्थापना जूगु द्यः वा देगः बारे धाल धाःसा आपासिनं मसिया वने धुंकूगु खनेदु ।

ज्ञान शीपया द्यः मंजुश्री ससुद्यःया थुलि लोेकंह्वागु खँय् ससुद्यवं न्ह्याक्व हे थः शिष्यं थःत म्हमस्यू पहः याःसां उदारता तःगुलिं हे खः । मंजुश्रीया शिष्य धर्मश्री मित्र द्वादरशाक्षरया ज्ञान मदयाः नेपाः वया उगु आखःया ज्ञान काः वःगु खः । स्वयम्भुया न्ह्यःने तयाः दिक्षा बियाः जक कने ज्यूगु थुगु द्वादरशाक्षरया महत्व कनेधुंकाः धर्मश्री मित्रयात वारणसी हे लित छ्वयाब्यूगु खः ।

थथे धर्मश्री मित्र वारणसी लिहां वनाः शिक्षा प्रचार यानाच्वंगु इलय् छक्वः मंजुश्री गुरु शिष्यया शिक्षाया जाँच काः वंगु खः । तसकं बुढाम्ह, फोहरी जुयाः वंम्ह मंजुश्री गुरु वःगु खनेवं धर्मश्री मित्रं शिक्षा प्रचार जुयाच्वंगु थासय् फोहरीम्ह बुढायात थः गुरु नालकि अन वयाच्वंपिं मनूतय्सं थःत अपमान याइ धकाः ग्याः चिकुं यानाः गुरुयात म्ह मस्यू छुं याना ब्यूगुलिं गुरु नं तं चाया लिहां वनेवं धर्मश्री मित्रं थ्व अनर्थ जुइ धकाः काचाकाचां प्रवचन क्वचायेका मंजुश्री गुरुयाथय् वनाः थम्हं नकतिनी जक गुरु खना धकाः मखुगु खँ ल्हाना पालिभ्वपूवंगु खः ।

ब्वनेकुथिइ श्रीपञ्चमी हनाच्वंगु । किपा : शरण डंगोल

गुकिया कारणं धर्मश्री मित्रया निगलं मिखा मंजुश्रीया पाली लाःगु धइगु दु । थथे धर्मश्री मित्रया मिखा कुतुंवने धुंकाः तसकं याचिका यानाः जुइवं मंजुश्री गुरुं हे पिनेया मिखा मदुसां दुज्ञांया मिखा दु लिसें धर्मश्री मित्रं गुगु धर्म निर्वाह यायेमाःगु खः व मयाःगुलिं आवंलि धर्मश्री मित्रयात ज्ञानश्रमित्र धकाः नाली धकाः थःगु उदारता क्यंगु खः ।

थ्व हे कारणं श्रीपंचमिबले ससुद्यः मंजुश्रीया कृपा दृष्टि दइ धकाः विशेष यानाः मंजुश्री अनलि नील सरस्वती आदि द्यःयाथाय् भक्तिभाव यायेगु जुयाच्वंगु दु । नेवाःतय्सं पैतृक द्यः कथं वा पर्व कथं थ्व तिथियात मान्यता मब्यूसां ज्ञान शीपया मदिक्क प्रचार संचार जुइके नितिं धाःसा हना वयाच्वंगु दु ।

श्रीप‌ञ्च‌मी कुन्हु मचा‌‌ न्हापा‌ंगु खुसिइ आखः च्वइच्वंगु । किपा : शरण डंगोल

च्वमि रास जोशी (सांभार स्वनिगः वाःपौ)

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.