ज्ञानोदय पूर्व विद्यार्थी समाज नेपाल “ज्ञान” या सुचुकुचु ज्याझ्वः क्वचाल ।

११३८ बछलागा  तृतीया/येँ

काठमाण्डौ महानगरपालिका वडा नं. १३ अवस्थित सामुदायिक विद्यालय मध्येय् उत्कृष्ट विद्यालयया रुपय् म्हसिका बियाच्वंगु ज्ञानोदय माध्यमिक विद्यालयया ५५ क्वःगु बुन्हिया लसताय् ज्ञानोदय पूर्व विद्यार्थी समाज नेपाल (ज्ञान) या ग्वसालय् सुचुकुचु ज्याझ्वः थौं क्वःचायेकुगु दु ।

किपाः राम शरण डंगाेल

का.म.पा. १३ स्थित वाफलचोकं निसें मकालुचोक रिंगरोड तक ग्वसाः ग्वःगु उगु सुचुकुचु ज्याझ्वःस क्षेत्र नं. ८ का संघीय सांसद तथा नेपाल ओलम्पिक कमिटिया अध्यक्ष माननीय जीवनराम श्रेष्ठ, प्रदेश नं. ३ या माननीय प्रदेश सभासद श्री राजेश शाक्य, का.म.पा. १३ या वडा सदस्य रामबाबु कोइराला, १३ वडाया पूर्व अध्यक्ष रामशरण डंगोल, का.म.पा.१५ या वडा अध्यक्ष ईश्वर मान डंगोल लगायतया व्यक्तित्वपिं समेत  थाैंया ज्याझ्वलय्  ब्वति कयादीगु खः ।

अथेहे विद्यालयया पूर्व ब्वानामिपिं, स्थानिय अभिभावक तथा स्थानीयवासीपिन्सं नं उगु सुचुकुचु ज्याझ्वलय् ब्वति कयादीगु खः ।
थौ‌ं जूगु ज्याझ्वःया जानकारी आयोजक “ज्ञान “ या अध्यक्ष श्री रुपचन्द्र पन्तं वंगु छुं दँ न्ह्यः निसें थुगु संस्थां थुकथंया ग्वसाः ग्वःया वयाच्वनागु खँया लिसें निशुल्क स्वास्थ्य जाँच, रक्तदान, छात्रवृत्ति वितरण, अन्तर विद्यालयस्तरीय ज्याझ्वःत याना वयाच्वनागु धयादिल ।

किपाः राम शरण डंगाेल

संस्थां दैविक तथा प्राकृतिक प्रकोप थें जागु बाढी पहिरो, भुखाचं प्रभावित जूगु थासय् तकं वनाः उद्दार व राहत सामाग्रीहरु वितरण याना वयाच्वनागु व वइगु दिनय् नं थुकथ‌ं सामाजिक व मानविय ज्या यायेत हौसला दुगु खँ धासें  अझं मेमेगु ज्यात याना वनेगु योजना दुगु खँ अध्यक्ष पन्त न्ह्यथनादिल ।

बुखँ निरु महर्जन

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.