ज्ञानमाला रत्नवत सिरपाः लःल्हात

११३८ चिल्लागा अष्टमि/येँ

थुगुसीया रत्नवत सिरपाः जितवन विहार थक्वाःया भिक्षु थानसेठ्ठ महास्थविरयात लःल्हाःगु दु ।

थौं येँय् क्वचाःगु ज्याझ्वलय् भिक्षु थानसेठ्ठ महास्थवीर लिसें म्येच्वमि, लय्‌चिनामि व वरिष्ठ गायक रत्न बेहोसी बज्राचार्ययात नं रत्नवत सिरपाः लःल्हात । रेडियो नेपालय् दक्कले न्हापां ज्ञानमाला भजन रेकर्ड याःम्ह बेहोसीया लिसें थुगु हे सिरपालं युवक बौद्ध मण्डल नेपाल (YMBA) लोककृति महाविहार यलयात नं थुगु सिरपालं हंगु दु ।

बौद्ध धर्म प्रचारय् योगदानयात च्वछासें बीगु थुगु रत्नवत सिरपालं सम्मानित स्वम्हेसितं बुद्ध मूर्तिइ हनापौलिसें झिद्वः तका राशि लःल्हाःगु खः ।

रत्नवत सिरपाः दिवंगत रत्नबहादुर तण्डुकारं वि.सं. २०५१ सालय् स्वनादीगु खः । न्हापा दँय्‌दसं लःल्हाना वयाच्वंगु थुगु सिरपाः छुं दँन्ह्यःनिसें धाःसा निदँय् छक्वः जक बीगु याना वयाच्वंगु दु ।

उगु हे ज्याझ्वलय् रत्नवत सिरपाःयालिसें गुलुपाः सिरपाः नं लःल्हाःगु दु । थुगुसीया गुलुपाः सिरपाः विश्वशान्ति विहार, न्हू बानेश्वरयात लःल्हाःगु खः ।

स्वनिगःया थीथी विहारय् तयातःगु गुलुपाःया बांलाक्क संरक्षण व सम्वर्द्धन यानातःपिंत हनेगु निंतिं गुलुपाः सिरपाः स्वनातःगु खः ।

सम्मनित सकलसित येँ महानगरपालिकाया मेयर विद्यासुन्दर शाक्यं बुद्धमूर्ति हनापौ लःल्हानादिल । तका सिरपाः धाःसा ज्ञानमाला भजन खलःया नायः तीर्थनारायण महर्जनं लःल्हानादीगु खः ।

किपा सर्जु ताम्राकार

उगु हे ज्याझ्वलय् ज्ञानमाला भजन खलःयात निरन्तर न्ह्याकेत ग्वाहालि याःपिं, प्रतिनिधि व प्रदेशसभाय् निर्वाचित जनप्रतिनिधिपिंत नं हंगु खः ।

हनेज्याया झ्वलय् येँ प्रदेश ३ क्षेत्र नं. ८ पाखें प्रतिनिधिसभाय् निर्वाचित जीवनराम श्रेष्ठ, प्रदेश सभा क्षेत्र नम्बर ८ (क) पाखें निर्वाचित राजेश शाक्यलिसेंयात भिंतुना देछासें हंगु खः ।

थुकथं हे खलःया सल्लाहकारपिं डबलकाजी तुलाधर, युरीकाजी कंसाकार, प्रा. रत्नमान डंगोल, वरिष्ठ अधिवक्ता सर्वज्ञरत्न तुलाधर, डा. सुमित्रा मानन्धर, रत्नबहादुर राजकर्णिकार व पुण्य शाक्ययात नं हंगु खः ।

ज्याझ्वलय् वरिष्ठ गायकलिसें संगीतकार, गीतकार रत्न ‘बेहोसी’ बज्राचार्यं च्वयादीगु म्ये मुना सफू ‘फाटेको मन’ येँ महानगरपालिकाया मेयर विद्या सुन्दर शाक्यं उलेज्या यानादिल ।

किपा सर्जु ताम्राकार

ज्याझ्वः ज्ञानमाला भजन खलःया ग्वसालय् जूगु खः । ग्वसाः खलकं थौं हे नेवाःतय्‌सं संगीतया द्यः कथं हनीम्ह महामंजुश्रीया नं पूजा याःगु खः ।

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.

%d bloggers like this: