fbpx

जितेन्द्र महर्जन २२ न्हु लिपा रिहाइ – नेवाः पत्रकार राष्ट्रिय दबुलं हनं

रेखा शाक्य । झीगु सम्वाददाता

ने सं ११३९ चाैला गाः चह्रे । यल

नेवाः पत्रकार राष्ट्रिय दबूया ग्वसालय् म्हिगः यलय् न्हूगु ज्वजलपा वाःपौया प्रकाशक नापं सम्पादक जितेन्द्र महर्जनयात हना ज्याझ्वः याःगु दु ।

किपा राजेन्द्र रंजित

पत्रकार जितेन्द्रयात २२ न्हु तक प्रहरी हिरासतय् तयाः वंगु मंगलवाः सर्वोच्च अदालतया उजं लिपा त्वःतुगु खः । म्हिगः थःगु रिहाइलय् हंगु ज्याझ्वलय्  महर्जनं  जेल दुनेया अनुभुति कनेगुया लिसें थःत त्वतकेत साथ बियादिपिं सकलें भिंचितामिपिन्त सुभाय धाःसें पत्रकार जगतय् बुखँ मुनेगु झ्वलय् फय्माःगु कसाः प्रति दुख प्वंकादिल ।

श्रीकृष्ण महर्जनया नायःसुइ सुनिल महर्जनं न्ह्याकादीगु म्हिगःया  ज्याझ्वलय् नेपाल पत्रकार महासंघया केन्द्रीय दुजः जन्मदेव जैसी, नेपाल आदिवासी जनजाती पत्रकार महासंघया संस्थागत सचिव जगत डोङ्ग तामाङ्ग, पत्रकार दबूया न्वकू नृपेन्द्रलाल श्रेष्ठ नाप थीथी संचार ख्यःया पत्रकारपिन्सं ब्वति कयादीगु खः ।

लुमंके बहःजु, नेपाल पत्रकार महासंघया पाखें केन्द्रीय सदस्य जन्मदेव जैसीं निक्वःगु खुसिइ दायर याःगु रिटय् सुनुवाइ याःसें वंगु मंगलबार दिपककुमार कार्की व हरिप्रसाद फुयालया संयुक्त इजलासं महर्जनयात त्वःतेगु आदेश ब्यूगु खः ।

पुलिसं महर्जनयात वंगु २०७५ चैत्र २६ गते बुखँ संकलनया झ्वलय् येँया रामशाहपथस्थित नेपाल बार एसोसिएसनया केन्द्रीय कार्यालय परिसरं हे ज्वंगु खः । नेपाल पत्रकार महासंघ, क्रान्तिकारी पत्रकार संगठन, नेवाः पत्रकार राष्ट्रिय दबु नेपाल लगायत प्रेस तथा मानवअधिकारनाप‌ सम्बन्धित संघ संगठनं महर्जनया गिरफ्तारीयात कयाः बिरोध याःगु खः ।

किपा राजेन्द्र रंजित

पत्रकार महर्जनयात त्वतेकेगु नितिं पत्रकार दबूया ग्वसालय् नेपाल पत्रकार महासंघ, नेपाल आदिवासी जनजाती पत्रकार महासंघ, क्रान्तिकारी पत्रकार महासंघ मंकाः कथं व‌ंगु १२ गते माइतीघर मण्डलाय् छगु दवाव मुलक धर्ना ज्याझ्वः नं याःगु खः ।

नेपाल पत्रकार महासंघपाखें महासंघया  केन्द्रीय सदस्य जन्मदेव जैसीं न्हापांगु खुसिइ सर्वोच्च अदालतय् बन्दी प्रत्यक्षकरणया रिट दायर याःगु खः । रिटय् फैसला जुयाः सर्वोच्च अदालतं बैशाख ८ गते महर्जनयात त्वतेत उज‌ं नं बिउगु खः । अदालतया उजं लिपा रिहा जुम्ह महर्जनयात  सर्वोच्च अदालत परिसरं हे तुरुन्त पुलिसं हाकनं ज्वंना यंकूगु खः । महर्जन नेवाः पत्रकार दबू येँ शाखाया दुजः नं खः ।

Leave a Reply

Your email address will not be published. Required fields are marked *