fbpx

जंक्व क्वचाःपिं २३८ म्ह ज्याथजिथियात मंका हनेज्या – मेगु दँय् बाजंगुरुपिन्त हनेगु प्रतिबद्धता

ने सं ११३९ चाैलागाः आमाइ

रेखा शाक्य । झीगु सम्वाददाता

‘ज्येष्ठ नागरिकया सम्मान, सभ्य समाजया स्वाभिमान ’ नाराया लिधँसाय् म्हिगः यलया अशोक हलय् छगू तःजिक ज्याझ्वः जुल । उगु ज्याझ्वलय् नेवाः परम्पराकथं ७७ दँ ७ ला ७ घौ व ७ पलाःया ज्या जंक्व, ८२ दँय् निक्वःगु जंक्व व ८८ दँय् स्वक्वःगु जंक्व क्वचाःपिं ज्याथजिथिपिन्त मंका कथं हनेगु ज्या जूगु खः ।

किपा निमर्लरत्न शाक्यया फेसबुक पाखें

मुक्कं निसः व स्वीच्याम्ह ज्याथजिथियात यलमहानगरपालिकाया प्रमुख चिरिबाबु महर्जनजुं स्वामालं क्वखायेका सम्मान यानादिगु खःसा १६ वडाया वडा नायः निर्मलरत्न शाक्यं दोसल्लां न्ययेकाः  हनापौ  लःल्हानादिगु खः ।

किपा निमर्लरत्न शाक्यया फेसबुक पाखें

म्हिगः सम्मानित जुयादिपिं मध्ये मिजंपाखे दकलय् ज्याथम्ह ९८ दँया गणेश बहादुर शाक्य, तुलसी बहादुर श्रेष्ठ, व मिसापाखे १०० दँया तुलसी माया श्रेष्ठ खः । अथेहे निक्वः जंक्व पू वंकादिधुंकुम्ह यलमहानगरपालिकाया पूर्व प्रमुख एवं पूर्वमन्त्री बुद्धिराज बज्राचार्य तकं म्हिगःया ज्याझ्वलय् सम्मानित व्यक्तित्व खः ।

किपा निमर्लरत्न शाक्यया फेसबुक पाखें

थ्यंमथ्यं ५ घौ तक न्ह्याःगु उगु ज्याझ्वलय् ज्याथजिथिपिन्त चित्त शान्त जुइकथं ज्ञानमाला भजन, धार्मिक पाठ प्रवचन,नेपाल परम्परागत बौद्ध धर्म संघया पाखें अपरमिता धारणी, भैषज्य धारणी, स्वस्ती वाचन व मंगलास्त्रोत पाठ नं जुगु खः । नापनापंं भिक्षु कौण्डन्यंपाखें शील सदाचारं बुह्राबुह्रीया जीवनकालय् मन शान्त व चित्त शान्त यायेगु ज्याय् तःधंगु लिधँसा जुइगु बिचाः प्वंकालि वयकःपिन्त आपालं धर्मया खँ कंसे सत्मार्गय् ल्यंदनिगु ई छ्यायेगु लँपु क्यना बिज्यागु खः ।

किपा श्याम स्मृत

उगु हे ज्याझ्वलय् नुगः खँ तय्गु झ्वलय् प्रा. बज्रराज शाक्यं ज्याथजिथियात स्वस्थ, निरोगी जुइया नितिं द्वेष राग, लोभ लालचया ज्यां तापाना मुक्कं ई सकरात्मक बिचाःया लिसें भगवाननापया सानिध्यताय् छ्यायेगु सल्लाह बियादिल । अथेहे महानगरपालिका– १६ या वडा नायः निर्मलरत्न शाक्यं ज्येष्ठ नागरिकया ज्ञान, सीपयात च्वछासें वनेगु व वइगु दँय् परम्परागत बाजागाजाया गुरुपिन्त हनेगु ज्या यायेगु प्रतिबद्धता प्वंकादिल ।

किपा निमर्लरत्न शाक्यया फेसबुक पाखें

झीगु डटकमनाप खँ ल्हायेगु झ्वलय् ग्वसाखलः यल महानगरपालिया १६ वडाया वडा नायः अध्यक्ष निर्मलरत्न शाक्यं थज्यागु जंक्व पुलेधुंकुपिं झी अजाअजियात मंका हनेगु ज्या याये खँगु व वय्कःपिं पाखें भिं सुवाः फयेखनिगु हे नं स्वयम तीर्थ वनाः धर्म मुनेगु कथं खः । थुलि याये दयाः वय्कःपिनिगु ख्वालय् न्हिला पिज्वःगु स्वये खंगु हे थःगु जीवनया छगू अभूतपूर्व सुखया अनुभुति याये खंगु व वय्कःपिनिगु भिंसुवालं थः पलखः भावुक जुयागु खँ कनादिल

किपा श्याम स्मृत

Leave a Reply

Your email address will not be published. Required fields are marked *