छज्वः नेवाः मतिनामिया लभ लेटर मुना “यज्जु”

११३८ अनलागा  अष्टमी/येँ

शान्तराज शाक्य

नेपालभाषा साहित्य ख्यलय् यक्व साहित्यकारपिं दी । वयकःपिनि मतिनाया खँ झीसँ मस्यू । तर नांजाःम्ह बाखंमि, उपन्यासकार भाजु मथुरा साय्मिया मतिना खँ धाःसा अप्वःसिनं स्यू । मथुरा साय्मिया मय्जु रमादेवी श्रेष्ठ नापं मतिना जूगु व वय्कःपिनि यःत्यः इहिपा जूगु अले इहिपा जुया छम्ह म्ह्याय् मय्जु दये धुंकाः रमादेवीं वय्कःया यज्जु मथुरा साय्मियात सदांया लागि थ्व संसार त्वःता वंगु थें ज्याःगु मयइपूगु खँ नं स्यू ।
थथे रमादेवी थ्व संसारं त्वःता वंगु झाः छगू लुमन्ति ज्याझ्वः जुल ।

किपाः रेखा शाक्य

उगु ज्याझ्वलय् ब्वंगु रचना मुंकाः रमा नांया सफू छगू पिकायेगु निर्णय जुल, नापं वय्कःपिनि दथुइ कालबिल जुयाच्वंगु दक्वं मतिनाया पौ मुंकाः छगू मतिनाया पौ मुना नं पिकायेगु निर्णय याःगु जुयाच्वन । व हे निर्णय कथं भाजु मथुरा साय्मि व भाजु रमादेवी श्रेष्ठया दथुइ जूगु मतिना पौ मुनाः सफू पिहाँ वल ।

 

थ्व सफूया नां “यज्जु “ खः । थुकिइ वयकःपिनिगु मतिनाया इलय् च्वया तःगु पौ मुना तःगु दु । नापं वय्कःपिनि इहिपा धुंकाः ज्याया सिलसिलाय् निम्ह निखे बाया च्वने माःबलय् च्वया तःगु पौ नं दुथ्याका तःगु दु । थुकथं थ्व “यज्जु “ नांया सफुतिइ इहिपाया न्ह्यः व इहिपा धुंकाः या निथी पौया सवाः दु । उगु पौ वय्कःपिनिगु खःसां भाजु कृष्णचन्द्र सिंह प्रधानं थ्व सफू सम्पादन यानादीगु खः । भाजु साय्मि सफू सम्पादनया झ्वलय् छथाय् थथे च्वया दीगु दु –

 

“गुम्हेसित जिं थ्व संसारय् दकलय् अप्वः ययेका च्वना, अज्ज गुम्हेसिके जिं थःगु संसार खना च्वना, व थौं जिगु न्ह्यःने मन्त । उकिं, जिगु मिखाय् ल्यना च्वंगु थौंया थ्व संसार अले जिगु जीवनया कचि बाखं …” ध्वदुक्व सित कना हानं हानं लुमंके मास्तिवः ताकि जि थः हे लुमन्ति थजुु …थथे हे मेथाय् च्वया तःगु दु …थ्व ला जिमिगु न्हापांनिसें थौं तकया दुने जूगु यः पौ । जिमिगु आगं । थज्यागु नं गथे ब्वयेगु ।

 

थ्व सफूया नां जुया च्वंगु यज्जु खँग्वः या अर्थ बारे भाजु मथुरा साय्मियाके न्यना । वय्कलं यज्जु खँग्वःया अर्थ डार्लिंग धयादिल । पश्चिमी समाजय् निम्ह मतिनामिया दथुइ थःथवय् छ्यलीगु डार्लिंग खँग्वःयात वय्कलं यज्जु कथं छ्यला दिल । थ्व यज्जु खँग्वः दकसिबे न्हापां छिसं हे छ्यला दीगु खःला धकाः न्यनाबलय् वय्कलं दकसिबें न्हापालाक थःम्हं छ्यलागु खः मखु क्वछिनाः धयादी मफू । थःम्हं छ्यले न्ह्यः चलन चल्ती दयेफु धयागु वय्कःया बिचाः दु । थ्व हे यज्जु खँग्वः थौंकन्हे यज्जु, यजु जुयाः बांलाक छ्यलाबुला जुयाच्वंगु दु । थ्व खँग्वः सत्यमोहन जोशीजुया बहःचाधंगु खँग्वः धुकुतिइ नं दुथ्यानाच्वंगु दु ।

 

किपाः रेखा शाक्य

थ्व मतिनाया पौ मुना सफूयात नां तयेगु बारे छलफल जूबले कवि दुर्गालालजुं “यज्जु “नां तःसा ल्वइ धकाः धयादीगु खँ नं मथुरा साय्मिजुं कनादिल । वय्कःपिन्सं पौ च्वयेबलय् थाय्थासय् छम्हेसिनं मेम्हसित “यज्जु “ धकाः छ्यला तःगु दु । उकिं नं थ्व सफूया नां यज्जु जूवंगु खइ ।
११६ पेज दूगु उगु सफूतिइ मुक्कं ५८ पु मतिनाया पौ मुनाच्वंगु दु । थ्व सफूया सम्पादकं १० गू पेजया भुमिका च्वया तःगु दुसा निगू पेजय् मथुरा साय्मिजुं सम्पादकयात छत्वाचा खँ च्वया तःगुु दु । नापं दुर्गालालजुं नं नुगः खँ च्वयातःगु दु ।

 

सफू मदुम्ह रमादेवीया दकिलाया तिथिइ (ने.सं १०८४ दिल्लागा ८) कुन्हु पिथना तःगु खः । सफूया पिकाक रमा प्रकाशन खःसा मू नितका खः । मदुम्ह रामया “जिं स्वइतं ययेकासा व छ हे खः, खतुं छ नं ला जि हे खः” उदगार नापं वय्कःपिं निम्हेसिया छपाः किपाः दुगु थुगु सफूया छत्वाचा भुमिकाय् दुर्गालालजुं थथे च्वयादीगुु दु – म्हिग तक रमा व मथुरापिनि न्ह्यबः तालं ग्वयातःगु आगं थौं सकसिगु नितिं चाल । उकिं, थ्व इमिं निम्हसिगु जक मजुसे झी ब्याक्वसिगुं जुल । मतिनाया इतिहासय् थ्व नं छगू नुगलय् थुंदीगु अजुगति खः …।”

५४ दँ दये धुंकूगु थ्व यज्जु नेपालय् हे दकसिबे न्हापांगु यःपौ मुना सफू जुइमाः । थ्व यःत्यःया संसारय् छगू स्यल्लागु कृति जुइफु ।

स्वनिगः वाःपौ १११९ गुंलागा चतुदर्शी

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.