fbpx

चित्ला‌ंगय् महाचुनी अर्थात रामसीताया जात्रा क्वचाल

रेखा शाक्य । झीगु सम्वाददाता

मकवानपुर चितलांग ३ या कपु गामय् दँय्दसँ थें वंगु बछलाथ्व अष्टमी कुन्हु महाचुनी जात्रा तःजिक क्वचाःगु दु । “कपु गां” व “खड्बु गां” पाखें रामसीतायात खतय् प्रतिस्थापना यानाः चितलांगया टाेबय् अर्थात तःधंगु वनय्  निगू खः हइगु खः । चित्लांगया थ्यंमथ्यं ९० छेँया बलामी जातिं संरक्षण यानावयाच्वंगु थुगु रामसीताया जात्रायात महाचुनी जात्रा धकाः धायेगु यानावयाच्वंगु दु ।

किपा रेखा शाक्य

कपुगांया द्यःछेँ थाकुलीया पुजालिसें म्वाय्लि व बाजागाजाया लिसें बस्तीया पुजा काकां द्यःखः टाेबय् पाखे न्हयाकेगु याइ ।

 

किपा अजय बलामिया फेसबुकपाखें

अथेहे हे टाेबय् क्वसं खड्बु गांया नं रामसीताया खः वया लँपुइ पियाच्वनी थुकथं उगु थासय् निगुलिं खः थ्यनेवं नापं छगू खःया ल्यू ल्यू मेगु खः स्थानीयया सहभागिताया लिसें बाजागाजाया नापं तौफावनय् दूगु द्यगःया प्रांगणय् यंकूगु खः । अन निगुलिं खःयात पालंपा देगः स्वचा चाःहिकाः देगलय् न्वलं थिइकूगु खः ।

किपा रेखा शाक्य

अनिलपा टाेबय् या द्यगः दुने निगुलिं गांया रामसीताया प्रतिमूर्तियात लिकयाः प्रतिस्थापना यायेवं स्थानीयवासीयानापं जात्रा स्वयेत थी थी गामं वयाच्वंपि भक्तजनपिन्सं पुजाआजा याःगु खः । जात्रा जुइगु उगु थासय् उकुन्हु तधंगु मेला हे जूगु खः ।  सनिलय् द्यःया प्रसाद कथं क्षीर सकल भक्तजनपिन्त इनाब्यूगु खः । थुकथं द्यःया प्रसाद इनेज्या धुनेवं द्यःपिन्त हाकनं खतय् बिज्याकाः थःथःगु गामय लित यंकूगु खः ।

किपा अजय बलामिया फेसबुकपाखें

नेवाःतय्गु जात्रायात दुवालेगु खःसा आपालं द्यःपिनिगु जात्रा दुसां थुकथं परम्परागत रुपं रामसीताया जात्रायात हनीगु परम्परा मेथाय् मदु । स्थानीय प्रेम बहादुर बलामीया धापू कथं न्हापा थ्व जात्रा चितलांगय् कपूगां, सोसिंडोल, लामचौर तौमार, बिरर्खग सिमलांग व खड्बु (फाखेल) न्ह्यगांयापिं मुनाः हना च्वंगु तथ्य खँ कनादिसें लिपा समय परिस्थतिं बसोबास व लँपु तापागुलिं मू थाय् कपुगांया द्यःयात सालाकया थःगु गामय् हे जात्राया परम्परा न्हयाकाच्वंगु खः । वर्तमानया इलय् कपुगां व खड्बु गांया जक रामसीताया जात्रा छथासं जुयाच्वंगु दु । थानकोटय् नं बलामी जातिं थुकथं जात्रा हे यानाः महंसां थःपिन्स पुजायाना वयाच्वंगु दनिगु खँ न्ह्यथना दिल ।

गुथिया आयस्ता छुं मदुसां गांयापिन्सं हे आर्थिक भार कुबिया फूचाथें गुहालीयानाः महाचुनी जात्रा न्ह्याकाच्वंगु दु  । थुकियात नं छगू कथं आत्मसन्तुष्टि कथं कायेमाः । उकिसनं जात्राया नितिं हे जक जूसां थःगु पुर्ख्याेली जात्रायात मतिना यानाः न्ह्याथाय् वनाः लजगा यानाच्वंसां जात्राया महत्व व थःगु म्हसिका ल्यंकातयेया नितिं गामय् थ्य‌ंकवःपि‌ स्थानीयया लिसें युवातयेगु उत्साहयात च्वछाये माःगु बिचाः प्वंकादिल ।

किपा मुकेश बलामिया फेसबुकपाखें

अथेहे रामसीताया जात्राया बारे वास्तविकतायात अझं कुला सत्य तथ्य न्ह्यःने हयेत अध्ययन व अनुसन्धान जुइमाःगु बिचाः स्थानीयवासी व कलाकार, अले जात्राह्यमि बेखाराम बलामिया दु । कपुगां वनया दथुइ लाःगु हुनिं न्हापायापिं मनूत वनय् धनुष व भाला ज्वना शिकार म्हितवनीगु धैगु खँ लुमंकादिसें न्हापा सीता वनवासया इलय् लवकुशयात थन हे वनय् बलामीतसें धनुष बाण व भाला कयेकीगु अभ्यास याकूगु खः धैगु न्यनातयागु खः । व हे कारणं थन रामसीताया जात्रायात निरन्तरता बियाच्वंगु प्रसंग व जनबिश्वास ल्यनाच्वंगु खःला धइगु वय्कःया धारणा खः ।

किपा रेखा शाक्य

थुगसिइ जात्राया हे झ्वलय् बलामिया हरेक धार्मिक सांस्कृतिक व अन्य ज्याय् थःगु योगदान बियाच्वनादिपिन्त दोसल्ला न्ययेकाः सम्मान नं याःगु खः ।

किपा अशाेक बलामिया फेसबुकपाखें

 

किपा अजय बलामिया फेसबुकपाखें

 

Leave a Reply

Your email address will not be published. Required fields are marked *