चित्लाङ्ग ३ या कपु गामय् महाचुनी जात्रा न्ह्यात

११३८ बछलाथ्व अष्टमी/चित्लाङ्ग

झीगु संवाददाता

मकवानपुर चित्लाङ्ग ३ या कपु गामय् दँय्दसँ थें बछलाथ्व अष्टमी कुन्हु अर्थात थौं महाचुनी जात्रा तःजिक न्ह्याना च्वंगु दु ।

किपा-रेखा शाक्य

कपु गां व खड्बु गांपाखें रामसीतायात खतय् प्रतिस्थापना यानाः थाैं चित्लाङ्गया तौफावनय् हइगु खः । चित्लाङ्गया थ्यंमथ्यं ९० छेँया बलामी जातिं संरक्षण यानावयाच्वंगु थुगु रामसीताया जात्रायात महाचुनी जात्रा धकाः धायेगु यानावयाच्वंगु दु ।

कपुगांया द्यःछेँ थाकुलीया पुजालिसें म्वाय्लि व बाजागाजाया लिसें बस्तीया पुजा काकां द्यःखः तौफावन पाखे न्हयाकेगु याइ ।

किपा-रेखा शाक्य

अथेहे हे तौफावनया क्वसं खड्बु गांया नं रामसीताया खः वया पियाच्वनी थुकथं उगु थासय् थ्यनेवं निगुलिं खः नापं तौफावनया द्यगलय् यंकी । अन निगुलिं खःयात पालंपा देगः स्वचा चाःहिकाः देगलय् न्वलं थिइकेगु याइ ।

किपा-रेखा शाक्य

तौफावनया द्यगः दुने निगुलिं गांया रामसीताया प्रतिमूर्तियात लिकया प्रतिस्थापना यायेवं स्थानीयवासीयानापं जात्रा स्वयेत थी थी गामं वयाच्वंपि भक्तजनपिन्सं पुजा याइ । जात्रा जुइगु उगु थासय् तधंगु मेला हे जुइ ।

किपा-रेखा शाक्य

सनिलय् द्यःया प्रसाद कथं क्षीर इनाः जात्रा क्वचायेकी । जात्रा लिपा द्यःपिन्त हाकनं खतय् बिज्याकाः थःथःगु गामय लित यंकी ।

७२ दँया स्थानीय प्रेमबहादुर बलामीया धापु कथं नेवाःतय् जात्रापात्रा हनेगु परम्परा दुसां थुकथं रामसीताया हे कयाः परम्परागत जात्रा हनेगु प्रथा मेथाय् मदु । वय्कःया धापू कथं न्हापा थ्व जात्रा चितलांगय् कपूगां, सोसिंडोल, लामचौर तौमार, बिरर्खग सिमलांग व खड्बु (फाखेल) न्ह्यगांयापिं मुनाः हना च्वंगु तथ्य खँ कनादिसें लिपा समय परिस्थतिं बसोबास व लँपु तापागुलिं मू थाय् कपुगांया द्यःयात सालाकया थःगु गामय् हे जात्राया परम्परा न्हयाकाच्वंगु व आः थौकन्हे कपुगां व खड्बु गांया जक रामसीताया जात्रा छथासं जुयाच्वंगु दु । गुथिया आयस्ता छुं मदुसां गांयापिन्सं हे आर्थिक भार कुबिया फूचाथें गुहालीयानाः महाचुनी जात्रा न्ह्याकाच्वंगु दु ।

किपा-रेखा शाक्य

कपुगां वनया दथुइ लाःगु हुनिं न्हापायापिं मनूत वनय् धनुष व भाला ज्वना शिकार म्हितवनीगु धैगु खँ लुमंकादिसें न्हापा सीता वनवासया इलय् लवकुशयात थन हे वनय् बलामीतसें धनुष बाण व भाला कयेकीगु अभ्यास याकूगु खः धैगु न्यनातयागु खः । व हे कारणं थन रामसीताया जात्रायात निरन्तरता बियाच्वंगु प्रसंग व जनबिश्वास ल्यनाच्वंगु खयेफु व थुकिया वास्तविकतायात अझं कुला सत्य तथ्य न्ह्यःने हयेत अध्ययन व अनुसन्धान जुइमाःगु बिचाः स्थानीयवासी व कलाकार, अले जात्राह्यमि बेखाराम बलामिं धयादिल ।

किपा-रेखा शाक्य
किपा-रेखा शाक्य

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.