‘ग्याफरा’…

११३८ दिल्ला थ्वः दशमी

माणिक उराय्

‘अनिल …हेड अफिसं छंगु गोप्य पौ छपौ वःगु दु ।’ इन्टरकोमय् हाकिमया खं न्यना अनिल झस्के जुल । झस्के मजुइगु नं गथे ? गोप्य धइगु खंग्वः हे थज्यागु कि सरकारी अफिसय् ज्या याइपिं न्ह्याम्हेसियां मन थारा न्हुइगु स्वाभाविक हे जुल ।

‘लास्सा उखुनु बहनी धुलिखेलय् जूगु घटनाया लिच्वस् जकं मखुला थ्व?’ अनिलया मनय् अने तने खँ लुया वल । ‘गोष्ठी सिधयेका बहनी डिनर नापं भचा भचा लिसं तयेगु ज्या जूगु । जि धाःसा भच्चा स्याये धुनकि…..’ लुमना वः लिसे नुगः ख्वाउंसे च्वना वल । ‘खई पक्का नं वहे जुइ’ मन भाराभारा मिन । ‘म्वायेसे जू जु थे जुइका । आः जूगु जुइ हे धुंकल थें । जिं यस्सें यानागु मखु थें । वासलं यागुला खःनि ।’ थः थम्हं मन त्याकल । ‘पौ हे वय् धुंकुसेलि स्वये हे माल थें । आः स्वःसां अले स्वःसां  । म्वासे जूगु जुइ हे धुंकल थें ।’ थथेहे मनय् खँ त्याका च्वन ।

पलख लिपा अफिसया सहायक कृष्णं पौ बिइ हल । अनिलया मिखा तप्यंक वहे गोप्य खँग्वलय् जू वन । बःचा ग्वःगु आखः नं स्वये हे ध्वाङ्ग मुया वइथें तःग्वः जुया वःथें च्वन । ‘सर, छिगु पौ..’ कृष्णया सलं अनिल झसंग वन । ख्वालय् ग्या चिकु । ल्हा फ्यारफ्यार  खाः थें । काये ला मकायेला यायां अनिलं पौ काल । स्वहेमस्वसे काचाक्क पौ म्हिचाय् स्वथन । अले छुं छां मधासे सुम्क च्वन । छचाखेरं कोथाय् मिखा ब्वल ।

नापं कोथाय् च्वंपि सकलेें थःथःगु ज्याय् ब्यस्त । सुनानं इमित स्वया च्वंगु मदु । अनिलं मेचय् लिधना छकः ताःहाकय्क झसुका तल । अनिलया पहः स्वस्वं कृष्ण छुं मधासे कोथां लुसुक्क पिहां वन । कृष्ण जक पिहां वनेवं अनिलं तीजक पौ लिकया टेबुलय् द्यने तल । वं प्यखेरं हाकनं छकः मिखा ब्वाकल । सुनानं थःत स्वया च्वंगु मदुसेंलि अनिलं छझाः याउंक मन तल । टेबुलय् चात्तु वाना च्वंगु पौया द्यने च्वंगु गोप्य खँग्वलं वइत स्वया हिस्याना च्वंगु थें ताल । अनिलया नुगलं हाकनं खँ ल्हात, ‘गुलि ग्याना च्वनेगु ? जाबो थज्यागु पौ छपौ वलं नं । जागिरे मनुया जीवने थज्यागु पौला गुलि वइ गुलि वइका । बिइ स्वये हे माल ।

’ वं तीजक पौ ल्हातय् काल । पौया द्यने स्वये हे ह्वाउं याना हयेकाः वइम्ह थें च्वंक ‘अति गोप्य’ धका ह्याउँगु आखः च्वया तःगु स्वस्वं वया भुइ चःति हाल । ल्हाः थरथर खाना वल । ख्वाः ह्याउँसे च्वना वल । अयसां तीजक खामं पौ लिकाल । थरथर खाःगु ल्हातं पौ पुइकल । ग्याचिकु मनं पतिइ च्वंगु आखलय् थःगु मिखायात सुल्लप्याच्चा म्हितकल । पौया आखःत बुलुहुं थःगु न्ह्यपुइ दुहां वंलिसे अनिलया ग्याचिकु तना वन ।

खंग्वःत ब्वंब्वं अनिलया नुगः थांथां वल । वया म्हुतुसि वं मचायेकं हे मुसुहुं न्हिला हल । स्वन्ती बले गमलाय् गोदावरी स्वां ह्वयेथें वया मन नं ह्वल । पौ ब्वने सिधयेका वं थः थम्हं छ्यंने छकः प्याट्ट दाया धाल,‘धत्, गज्यागु ग्याःगु का..ग्याफरा ।’ अफिसं वहे धुलिखेलय् जूगु गोष्ठीइ बांलाक्क प्रेजेन्टेशनयात धकाः निगू ग्रेड थपया सिरपाः ब्यूगु जुया च्वन ।

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.