गोरखापत्र दैनिकया खेल पत्रकार प्रजित शाक्यया लिसें अन्य कासामिपिं पुरस्कृत

११३८ तछला गाः तृतिया

शहीद दशरथ चन्द मेमोरियल ट्रष्टं नेवाः पत्रकार राष्ट्रिय दबु, येँ या सचिव व गोरखापत्र दैनिकया खेल पत्रकार प्रजित शाक्ययात नगदसहित उत्कृष्ट खेल पत्रकारिताया सिरपाः ब्यूगु दु ।

युवा तथा खेलकुद मन्त्री जगतबहादुर सुनार विश्वकर्मां उत्कृष्ट घोषित कासामिपिन्त सिरपा ब्यूगु खः । शहीद दशरथ चन्द मेमोरियल ट्रष्टं थुगु पालंनिसें उत्कृष्ट लेख रचनाया मूल्याङ्कन यानाः उत्कृष्ट पत्रकारिता पुरस्कारया शुरुवात याःगु खः । गुकिया पुरस्कार राशि ५००१ तका खः ।
अथेहे , क्रिकेटर सन्दीप लामिछाने सहित ८ म्ह कासामिपिन्त दशरथ चन्द मेधावी खेलाडी प्रतिभा पुरस्कार प्रदान याःगु दु  ।

शहीद दशरथ चन्दया ११६औँ जन्मजयन्तिया अवसरय् राष्ट्रिय खेलकुद परिषद् (राखेप), त्रिपुरेश्वरय् च्वंगु दशरथ रङ्गशालाया प्राङ्गणय् शहीद चन्दया झ्वाताः दुगु थासय् जुगु ज्याझ्वलय् सन्दीपसहित क्षेत्रगत रुपय् न्याम्ह व पारापाखें निम्ह कासामिपिन्त नगद पुरस्कार ब्यूगु दु।

सन्दीपयात विशिष्ट मेधावी खेलाडीपाखें पुरस्कृत याःगु दु । अथेहे पूर्वाञ्चलपाखें ब्याड्मिन्टनया जेसिका गुरुङ, पश्चिमाञ्चलपाखें क्रिकेटया करण केसी, मध्यमाञ्चलपाखें शारिरीक सुगठनया ननिता महर्जन, मध्यपश्चिमाञ्चलपाखें ह्यान्डबलया कल्पना व सुदूरपश्चिमाञ्चलपाखें ब्याड्मिन्टनया दिपेश धामी पुरस्कृत जुगु दु ।

अथेह पाराय् ह्विलचेयर क्रिकेटया हिमाल अर्याल व पारा तेक्वान्दोया रञ्जना धामीयात न‌ पुरस्कृत याःगु दु । ट्रष्टं २०६२ सालनिसें कासामिपिन्त पुरस्कृत यायेगु याना वयाच्व‌ंगु खः ।

सम्मानित कासामि मध्येय् नं दीपेशयात सर्वश्रेष्ठ खेलाडी घोषित यात । वय्कःयात हनापाैया लिसें १५००१ तकां पुरस्कृत यात सा मेपिं कासामिपिन्त म्हतिं १०००१ तकाः ब्यूगु दु ।

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.