“गजाःगु जुइ आ …”

११३८ सिल्लाथ्व चतुर्दशी/येँ

माणिक उराय्

“गजाःगु जुइ आ …”
“अय् उराय् सिलला छँ, रमाचा ला पय्नं वनं हँ ।” जि थ्यने वं हे छम्ह पासां न्यंकल । “हां ।” जिगु म्हुतुं छ्वाराक्क पिज्वल । “लाबला मदुनि म्ह्याय्म्ह पंय्नवंगु, आः माम्हं नं ला ? का रे छु जुगु हां थ्व, थौं कन्हय्यापिं मिस्तय्त ।” ” व हे ला धयागु ।” हानं व हे पासां धाल, गुलि जक धायेगु आ… । थःगु उमेर छकः नं स्वयेम्वाला पंय्न वनेत, छय् खने धूकुम्ह का …।

 

जिपिं छपुचः पासापिं न्ह्याबलें धयाथें वंघःया कुनय्च्वंम्ह गणेद्यःयाथाय् सनिलय् मुनेगु । अन छन्हु मथ्यनकि उखुन्हु यानागु न्हिच्छिया ज्या हे पूमवं थें च्वनिगु । अले न्ह्यागु ज्या त्वःताः जूसां छधू अन वना पासापिं नाप लात । व हे झ्वलय् छन्हु रमाचा पंय्न वंगु खँ सिल ।

जिं बांलाक म्हस्यू रमाचित । जि उबलय् नकतिनि नकतिनि नेपालभाषाया ख्यलय् पलाः तयाम्ह । बोर्डिंग स्कूलय् ब्वनाम्ह जूगुलिं अन नेपालभाषा ब्वनेगु मदु । तर छेँ व त्वाः बहाःया पासापिं नाप धाःसा नेवाःभाषं हे खँल्हायेगु खः । तर च्वय् धाःसा मसः । अथे जूगुलिं जितः नेवाःभाषां च्वय् सयेके मास्तिवः ।

त्वालय् छम्ह नेपालभाषाया नांजाम्ह बाखंच्वमि दु । अले वय्कःयाथाय् मेपिं नं यक्व नेपालभाषाख्यःया भाजु मय्जुपिं झा । जि वय्कः पिनिगु संगतय लाना नेपालभाषाया छम्ह विद्यार्थी हे जुल । उबलय् रमाचा नं अन हे वइगु जितः आः तकं लुमनि ।

रमाचा बां नं तसकं हे बांलाः, सकसियां ल्वःवंक हे । तर वया धाःसा छम्ह ययेकातये धुंकूगु हुइनाभुइना । व प्याखंहुले अले म्ये नं हालेसःम्ह खः ।
त्वालय् छम्ह मेम्ह दाइ नं दु । बद्री दाइ । संगीतकार । वय्कःयाथाय् म्ये हालेगु स्यंवइगु खः रमाचा । अथेला संगीतकार दाजु भचा तसकं ख्याः यायेमाःम्ह । अले इलय् ब्यलय् जोक्स नं न्यंका चाकःलिं च्वंपिन्त ह्वारारा न्हिइका तयेफुम्ह । उमेर नं अपायसकं मवंनी । अय्सां सकसियां बद्रीदाइ ।

बद्रीदाइया थःगु परिवार दु । तताःजु नं अति न्ह्याइपुसे च्वंम्ह । थः भाःतयाथाय् वइपिं सकसितं च्या त्वंका म्हंफू मफू सहलह ब्याके न्ह्याः । रमाचा नं अन स्यं वइगु । अले तताःजु धकाः सम्बोधन यानाः न्हिलाः न्हिलाः ख्याः याना जुइगु जिं स्यू ।

छन्हु अथे हे संगीत सम्मेलनयायेगु ज्या दया बद्री दाइयाथाय् वनाबलय् तताःजुं ख्वया ख्वया जिमित कनादिल, “स्वले… दाइ नं ला व मिसायात मेथाय् कोथा कया तल हँ, स्वन्हु प्यन्हु दत छेँ दुहाँ मझाःगु …गन थें स्यूला छिमिसं ?” जिपिं ला सर्गतं कुतुवःपिं थें जुल, “आगछ्याय् …छु खँ न्यनेमाःगु थ्व ?” सुयात द्वपं बिइगु ? बद्रीदाइयात ला, रमाचित ला । अथेला रमाचिया पहः भचा न्हापांनिसें अथे हे खः धया । बद्रीदाइ नापला म्हय् म्हय् थिया ख्याः याना जुइगु …जिमित हे मछिं धयां । भचा खँ ल्हाइगु नं अस्य अस्यगु । जिपिंला उबले भचा मचाबुद्धि हे तिनि । आः धकाः थुल ।

बद्रीदाइ नं भचा अय्लाः अप्वः त्वनाहय्गु यानादिल । सायद निगू परिवारया दायित्वं क्वत्यला हल ला ? आम्दानी नं अपाय्सकं मदु । संगीतकार । छपू निपू म्ये हाला, संगीत तया गुलि हे दां व धकाः । अथे ला वय्कःया छगू स्थायी जागिर मदुगु मखु । तर दःसां निगू परिवारयात लहिइत गाः मजू । अले थःगु नुगःया घाः त्वपुइत अय्ला बाहेक मेगु छु दु धकाः । लिधंसा हे दयेका दिल अय्लाःयात बद्रीदाइ नं ।

अथेला बद्रीदाइ मदुगु नं यक्व दये धुंकल । रमाचिया पाखें बद्रीदाइया निम्ह म्ह्याय्पिं दु । बद्रीदाइ दनिबलय् हे तःधिकम्ह म्ह्याय्या इहिपा जूगु । चिधिम्ह भचा ची हे धिकःनी । रमाचिया नं उमेर ला अप्वः मदुनि नि । गुलिचां मदुबलय् तःधिम्ह म्ह्याय्या मचा छम्ह दयेका थः भाःत नापं पारपाचुल । अले व थःछेँ च्वं वःगु नं स्यू जिमिसं । उबले हे बद्री दाइ नं मन्त अय्लाखं ।

छुँ दँ लिपा चिधिकम्ह म्हयाय्या नं इहिपा जुल । इहिपा जूगु मखु थःस्वया वंगु । छेँय् तःधिकम्ह म्ह्याय्लिसे मांम्ह व छ्यम्ह च्वनाच्वंगु । तःधिकम्ह म्ह्याय् नं थःज्या यायेथाय् च्वंम्ह छम्ह मिजंनापं हेमखेम जू धाःगु न्यना । थ्व दक्वं खँ जिं गथे जुया स्यूगु धकाः च्वन जुइ छिकपिनि । त्वाःबहालय् च्वंपिं, अथे हे जुया स्यूगु का ।
छन्हु ला तःधिकम्ह म्ह्याय् नं व हे मिजंलिसे च्वनेत वन हँ मचानापं ज्वना ।

आः वया ला रमाचा नं वन हँ …।

दोहलपा सफुतिं सांभार

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.

%d bloggers like this: