ख्वपय् बुद्धया मूर्तिया जीर्णोद्वार क्वचाल

११३८ थिंलाथ्व षष्ठी

बौद्ध सम्पदा संघया ग्वसालय् ख्वपया वडा ७ हनुमानघाट परिसर खुसि विहारय् दुगु बुद्धया मूर्ति जिर्णोद्धारया ज्या क्वचाःगु दु ।

वंगु २०७२ बैशाख १२ व १३ गतेया भुखाचं क्षतिग्रस्त जूगु भगवान बुद्धया तःधंगु मूर्तिया जिर्णोद्धारया ज्या क्वचाःगु खः । ख्वप बौद्ध सम्पदा संघया भुखाचं क्षतिग्रस्त बौद्ध सम्पदातयगु संरक्षण व सम्बद्र्धन यायेगु योजना अन्तर्गत वंगु २०७४ भाद्र ८ निसें उगु मूर्तिया जीर्णोद्वारया ज्या न्ह्याःगु खः ।

उगु बुद्ध मूर्ति जिर्णोद्धार १,३०,३६० तकाया लागतय् जूगु संघं न्ह्यथंगु दु । जिर्णोद्धारया लागिं मुनि विहार, इनाचो, वाँचुत्वाःया दातापिं नकःमि परिवारया मदुम्ह रामशेखर नकःमिव मेपिं नकःमि परिवार, इन्द्रवर्त महाविहार, इनाचो अले स्थानीय जनताया आर्थिक अले भौतिक ग्वाहालि जूगु खः ।

पुनर्निर्माण न्ह्यः जीर्ण अवस्थाया बुद्ध मूर्ति



२०७२ फागुनय् हे जिर्णोद्धारया लागिं नगरपालिका व दरवार हेरचाह अड्डायात ग्वाहालि यायेत इनाप यानां नं उखेपाखें ग्वाहालि मवःगुलिं व दक्ष प्राविधिकया अभावं ज्या लिबाःगु संघं न्ह्यथंगु दु । उखेपाखें इलय् ग्वाहालि जुइगु खनेमदयाः मूर्तिया दाता परिवार, मुनि विहारया श्रद्धेय विपस्सी भन्ते व स्थानीय जनतायाके ग्वाहालि कयाः ज्या क्वचायेकागु संघया धापू खः ।
मूर्ति जीर्णोद्धार यायेगु नितिं परम्परागत निर्माण ज्वलं बज्र छ्यलाः पुलांगु शैलीया अप्पा हे छ्यलागु संघया न्वकू सुगत रत्न बज्राचार्य व सल्लाहकार पद्म सुन्दर शाक्यं जानकारी बियादिल ।

सनातनि हिन्दु व बौद्ध धर्मया मंकाः तीर्थस्थल कथं काइगु हनुमानघाट परिसरय् थौंकन्हय भजन याइगु थाय् व देगःया पुनर्निर्माण जुयाच्वंगु दु ।

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.