ख्वपया नवदुर्गागण जयवागेश्वरीइ थ्यन

११३८ थिंलाथ्व नवमी

ख्वपया नवदुर्गा प्याखंया देवगणपि‌ थौ‌ पशुपतिया जयबागेश्वरीइ बिज्याकाःलि आः द्यःगणपिं अन प्याखं हुलाः जात्रा न्ह्यानाच्वंगु दु ।

ख्वपं न्यासि हे वःपिं द्यःगणपिं येया सिफलय् थ्यंकाः द्यः वसः पुनाः थाय्‌थासय् द्यः ल्हानाः जयबागेश्वरीया दबुली थ्यंकः बिज्याःगु खः ।

जयबागेश्वरीइ द्यः ल्हाये सिधयेकाः वसपोलपिंत स्थानीयावासीपिंसं ध्यबा, कापः, गा, कसिली आदि तयाः पुजा बिइगु याइ ।

थुकथं पूजा बीगु झ्वलय् दकलय् लिपा अनया वैद्य खलकं पुजा बिइगु याइ । थ्व झ्वलय् खा बलि बियाः समयबजि न‌ं छाइगु खः ।


प्याखं सिधयेकाः वैद्य खलःपाखें पुजा फयेधुंकाः थौं हे जयबागेश्वरीइ प्याखंया विर्सजन याइ ।

सकसिगुं पुजा फयेधुंकाः द्यःगण पशुपति वनेगु लँपुइ वनाः बलिया निंतिं फा माःवनी सा फा बलि कायेधुंकाः सिबालय् वनाः उकुन्हुया प्याखं क्वचायेकी ।

द्यःगण जयबागेश्वरीइ बिज्यायेगु निंतिं छवाः न्ह्यः हे थन वयाः थःपिं वयेत्यनागु जानकारी छ्वयाहयेमाः । वसपोलपिं बिज्याइगु जुइवं स्थानीयपिं माःकथं हलंज्वलं तयार यायेगु याइ ।

दशमीकुन्हु जयबागेश्वरीया दबुलिइ न्हिच्छियंक प्याखं हुलाः प्याखं सिधयाकथं द्यःगणपिं ख्वपय् हे लिहां वनाछ्वइ ।


जयबागेश्वरीइ प्याखं क्वचायेधुंकाः कन्हय् सुथय् द्यःगण लिहां बिज्याइ । व धुंकाः वइगु घ्यःचाकु संल्हु निसें ख्वपया नीछगू थीथी थासय् प्याखं हुइकी ।

थ्व झ्वलय् ख्वप देशं पिने नं प्याखं हुइके यंकेमाःगु चलन दु। देशं पिने वनेगु झ्वलय् सांगा, नाला, चाँगु, पन्ति, धौख्यः, सक्व आदि थासय् नं प्याखं यंकेगु परम्परा दु ।

देशय् ल्वय्, भय व मेगु छुं कथं नं हानी नोक्सानी मजुइमा धयागु ल्याखं नवदुर्गा प्याखं हुइकेगु याना वयाच्वंगु धापू दु ।




नवदुर्गा द्यःगणय् झिंगुम्ह दुजः दु । खिम्जा, तम्जा, क्याम्जा, भैलःद्यः, महाकाली, बाराही, धुम्बा, सिम्बा, बालकुमारी आदिया लिसें बाजंगुरु, बाजं थाइपिं दुथ्याः ।

महालक्ष्मी धाःसा खतय् थापना याना: न्ह्यःने ख्वाःपाः जक ब्वयातयेगु चलन दु ।




Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.