किलाघलं चिग्वः धिमे कासा याइगु

११३८ पोहेंलागा सप्तमी/येँ

नेवाः भाय् व संस्कृतिया संरक्षणय् ल्याय्‌म्ह पुस्तायात आकर्षित यायेगु आज्जुं येँय् येँ महानगरव्यापी चिग्वः धिमे धेंधें बल्लाः कासा जुइगु जूगु दु ।

भाषा व संस्कृतिया संरक्षण लिसें येँ महानगर दुनेया ल्याय्‌म्हतय्‌गु प्रतिभा न्ह्यब्वयेगु आज्जुलिसें किलाघः सांस्कृतिक पुचलं न्हापांगु येँ महानगरव्यापी मेयर्स ट्रफि चिग्वः धिमे धेंधेंबल्लाःया ग्वसाः ग्वयेत्यंगु खः ।

पुचलं थौं येँय् पत्रकार सम्मेलन यासें धिमे बाजंयात च्वन्ह्याका यंकेगु नं ताः तयाः वइगु पोहेंलागा द्वादशी (पुस २९ं शनिबाःया दिनस कासा यायेत्यनागु धाःगु खः । येँया सांस्कृतिक थाय् इतुम्बहालय् थुगु कासा यायेगु नं पुचलं जानकारी ब्यूगु खः ।

येँ महानगर दुने ३२ वडाया ६३ ज्यापु त्वाः खलः मध्ये २० खलःपुचः दथुइ चिग्वः धिमे धेंधें बल्लाः यायेत्यंगु खः । कासामि पुचः दथुइ मेडल, दसिपौ ट्रफिया लिसें तका सिरपाः तकं बीगु पुचलं न्ह्यथंगु खः ।

थौंया हे पत्रकार सम्मेलनय् कासाय् न्हाप लाइगु पुचःयात बीगु ट्रफि नं सार्वजनिक याःगु खः ।

न्हाप लाइगु पुचःयात मेडल, दसिपौ व ट्रफिया लिसें छगू लख तका सिरपाः बीगु पुचलं धाःगु दु । अथे हे ल्यू लाइगु पुचःयात ५०द्वः तका व लियांल्यूयात २५द्वः तका सिरपाः बीगु जानकारी नं पुचलं ब्यूगु दु ।

कासाया दिनय् धिमे ब्वज्यालिसें थीथी सांस्कृतिक न्ह्यब्वयालिसें नसात्वँसाया स्टल तक नं तइगु जूगु दु । थ्व हे झ्वलय् वाद्यगुरु न्हूछेँबहादुर डंगोलया गृहिणी प्रशिक्षार्थी पुचलं दाफा भजन नं न्ह्यब्वइगु जूगु दु ।

लिसें कासाया दिनय् ट्राफिकया समस्या मजुइमा धइगु ल्याखं न्यतंनिसें भ्याःचाद्यःतक्कया लँय् यातायात वयेवने नं बन्द जुइगु पुचलं न्ह्यथंगु दु ।

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.