किलाघः त्वालय् नीन्यादँ लिपा श्री लाेकेश्वर पद्मपाणि द्यः प्रतिस्थापन


११३८ गुँला गाः नवमी /येँ

झीगु सम्वाददाता

येँया किलाघः त्वाः खलः गुथिया ग्वसालय् म्हिगः पद्मपाणी लोकेश्वरया द्यःया न्यास तयेगु लिसें न्हूगु देगः दयेकाः उगु देगलय् गजू छुइगु ज्या क्वचाःगु दु ।

किपाः रेखा शाक्य

देगलय् विधिपूर्वक होम यानाः पुजा याःसें देगलय् दुने तयातःपिं श्री पद्मपाणि लोकेश्वर व जवं खवं सप्तलोचन तारा व आर्याताराया  न्यास तयेगु ज्या जूगु खः । उगु हे झ्वलय् पाहाँ कथं झायादीम्ह येँ महानगरपालिकाया मेयर भाजु विद्यासुन्दर शाक्यजुं  ताम्रपत्रया उलेज्या यानादीगु खः।

किपाः रेखा शाक्य

ता ई न्ह्यःनिसें भ्वाथः जुयाच्वंगु उगु देगःयात थुनाः हाकनं न्हूगु दयेकूगु खः । पुलांगु स्वरुप व मौलिकपनं दयेकुगु उगु देगलय् धाःसा द्यः खुया यंकुगुलिं न्हापांनिसें द्यः मदुगु खः ।

किलाघः गुथिया दुजः भाजु चन्द्रमान महर्जनजुं बियादीगु जानकारी कथं न्हापांनिसें दुम्ह लोकेश्वर द्यः सिँयाम्ह खः । तर खुया यंकल । अन लिपा हानं मेम्ह दातां सिंयाम्ह मेम्ह द्यः तयाबिल । व नं खुयायंकल । थुकथं निक्वःगु खुसिइ नं द्यः खुयायंकेवं स्वक्वःगु पालय् वि.सं २०४१ सालय् ल्वँहयाम्ह द्यः तयेगु ज्या मेम्ह हे दातापाखें जूगु खः तर व नं वि.सं २०५० साल पाखे खुया यंकेव द्यः मदुगु देगः कथं हे धस्वानाच्वंगु खः ।

किपाः रेखा शाक्य

हालसालय् हे उगु देगः तसकं भ्वाभः जुयाः देय्के माःगु अवस्था जुइवं किलाघः त्वाः खलः गुथिया सक्रियताय्  दुजःपिं व अन्य सकलें, अथेहे येँ महानगरपालिकां ब्यूगु आर्थिक गुहालीं हाकनं देगः न्हूगु दयेके ज्या जूगु खः । उगु हे देगलय् हाकनं द्यः पलिस्था यायेगु झ्वलय् किलाघःया दाता महेश शाक्यजुं स्वम्हं द्यः (३९ इन्चया पद्मपाणि लोकेश्वर व १२ इन्चया सप्तलोचनतारा व आर्यातारायात) थःगु पाखें व्यक्तिगत रुपं दयेके बिया आर्थिक जिम्मेवारी कयादीगु खः ।

देगःयात पूर्ण रुपं रंगरोगन तयेगुया लिसें अन्य मेमेगु ज्याय् नं हनुमानध्वाखाया सम्बन्धित थासं व वडापाखें याइगु ज्या ल्यं हे दनिगु धाःसें म्हिग साइत दुगु हुनिंयाना ज्या सम्पन्न यानागु खँ महर्जनु कनादिगु खः ।

किपाः रेखा शाक्य

येँया बलय् दच्छिया छक्वः होमयाना जक सार्वजनिक रुपं सकल भक्तजनपिन्त दर्शन यायेत पिहाँ बिज्याइम्ह पद्मपाणियात आः धाःसा देगः दुने हे थापाना यानाब्यूगु दु । उगु देगलय् हे च्वना किलाघः त्वाःया दाफा खलकं गुँलाबलय् भजनया लिसें दाफा थायेगु चलन आः तकं न्ह्याना हे च्वंगु दु ।

किपाः रेखा शाक्य

One thought on “किलाघः त्वालय् नीन्यादँ लिपा श्री लाेकेश्वर पद्मपाणि द्यः प्रतिस्थापन

  • September 9, 2018 at 9:14 am
    Permalink

    I want to say something. We cover the god and goddess with flowers, red powder, clothes, etc. So we can not see the actual ‘face’ of the god and goddess. To those who do not know which god looks like what appearance cannot figure what kind of god. Can not the god and goddess keep clean and do not cover with anything?

    Reply

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.