किपुलिइ मायादेवीया प्रतिमूर्तिया उलेज्या

११३८ बछलाथ्व त्रयाेदशी/किपू

झीगु संवाददाता

किपूया २ वडा न्यामासिमाया लागाय् पिनातःगु गौतम बुद्धया जन्मलिसें स्वानाच्वंगु बोधिवृक्षया बंशज सिमाक्वसं पलिस्था याःगु मायादेवीया प्रतिमूर्तिया उलेज्या थौं जुल । विधिवत पुजा क्वचाय्का मू पाहाँ किपू नगरपालिकाया मेयर रमेश महर्जनजु प्रतिमाया उलेज्या यानादिगु खः ।

किपा-रेखा शाक्य

लुम्बिनीइ वनेमफुपिन्त मायादेवीया दर्शन यायेत किपुलिइ हे नं दर्शन यायेगु व्यवस्था याये खंगु बांलागु ज्या जूगु व नेपाःया विविध थाय् विविध कारणं प्रख्यात दुथें किपूयात नं नेपालभाषा एकेडेमीं भाषाया विकासयायेगुया नितिं नेवाः एफ एम न्ह्याकाच्वंथें आः  किपूया आर्थिक स्तरयात नं विकास यायेत थ्व थाय्या प्रचार प्रसार धार्मिक पर्यटनया रुपय् नं यायेमाःगु खँय् बः बियादिसें उकिया नितिं किपू नगरपालिका सदां नापं दइगु बचं बियादिल । ।

किपा-रेखा शाक्य

अथेहे किपू नगरपालिकाया उपप्रमुख सरस्वती खड्काजुं थौंया ज्याझ्वलय् ब्वति कायेखना लय्ताःगु धाःसें किपू लागाय् च्वंगु नेवाः एफ. एम पाखें भाषाया संरक्षण जक मखसें थःगु मौलिकता व पहिचान, धर्म संस्कृति व कलायात ल्यंकेया नितिं यानाच्वंगु ज्यायात च्वछायादिल ।

किपा-रेखा शाक्य

ज्याझ्वलय् नुगः खँ तयेगु झ्वलय् नेपालभाषा एकेडेमीया दांभरीं डा. पुष्पराज राजकर्णिकारजुं मायादेवीया प्रतिमा प्रतिस्थापना जूगु बांलागु खँ खः धाःसें नेपाः छगू विविधताय् एकता दूगु देय् खः । विभिन्न भाषाभाषि, जातजाति दूगु खःसां राज्यं समान व्यवहार मतःगु खँ कुलादिल । नेवाःतय् थःगु हे मौलिकतां जाःगु संस्कार दु, तजिलजि दु, भाषा दु  उकियात राज्यं मखसें सम्पूर्ण नेवाःतसें हे थःगु म्हसिका ल्यंकेया नितिं न्ह्यचिलेमाःगु थौंया वर्तमान अवस्थायात लुमंकाादिसें झी सकलें बुद्धया शिक्षायात नालाकया छप्पं छधी जुया न्ह्यावनेत इनाप यानादिल ।

किपा-रेखा शाक्य

नेवाः एफ एमया प्रबन्ध निर्देशक श्री कृष्ण महर्जनजुं लसकुस यानादिगु खःसा थौंया ज्याझ्वःया सभा नायः अनक मिडिया प्रा.लिया नविन महर्जनजुं ज्याझ्वः ताःलाकेत गुहाली यानादिपिं सकसितं सुभाय् देछाया दिगु खः । थौंया ज्याझ्वलय् वडा नं १ या हर्ष महर्जन, वडा नं २ या रमेशमान डंगोल, वडा नं ९ या गंगाराम महर्जन व वडा नं १० या अमन महर्जनयालिसें स्थानीयवासीपिनिगु नं सहभागिता दुगु खः ।

किपा-रेखा शाक्य

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.