fbpx

कँडेलचोक भगवती तता नापलायेत नुवाकोतय् बिज्यात

११३८ चौलागा अष्टमी/ येँ

वंगु चौलागा चौथी कुन्हु बसन्तपुरया कँडेलचोक भगवती द्यः तता नापलायेत नुवाकोतया शेरा धाःगु थासय् भैरव डांडाय् नागपाणी भगवतीयात नापलाये नितिं बिज्यागु दु ।

फाइल किपाः रेखा शाक्य

हनुमान ध्वाखाया महाद्यः पार्वती दबलीया जवय् भगवतीया द्यः छेँय् बहनी पुजा आजा सिधयेकाः तता नापलायेत बिज्याम्ह भगवती व हे न्हि कुन्हु बहनी न्हयोखाय् बासं च्वनाः कन्हे कुन्हु सुथय् पुजा फयाः ककनी जुया नुवाकोट तक खतय् हे च्वनाः न्यासि बिज्याइ ।

फाइल किपाः रेखा शाक्य

उगु खः हल्चोकया सवः भक्कु स्वइगु खलया पुचःपिं कटुवाल थरयापिन्स हे क्वबिइमागु चलन दु । अले थुगु द्यःया पुजाया व्यवस्था नं इन्द्रजात्रा व्यवस्थापन समिति पाखे हे स्वयेगु याना तःगुलिं तता नापला बिज्याम्ह कँडेल भगवतीयात गुरूजु पल्टनया लिसें पञ्चवली बियाः पुजा यानाः आः वइगु द्वादशी कुन्हु लसकुस यानाः बहनी येँ लित हयाबिज्याइ ।

फाइल किपाः रेखा शाक्य

थुगु पुजाया नितिं गुठी संस्थान पाखें ८००० द्व तकाः गुहाली बियाच्वंगु दु । थन येँ थ्यनेवं भगवती द्यःयात २ म्ह हय्ँ १ छम्ह दुगुया बलि बियाः लसकुस यानाः दुत बिज्याकी धैगु जानकारी कुमारी छेँया गौतम शाक्यजुं झीगु डटकमयात जानकारी बियादीगु खः ।

 

Leave a Reply

Your email address will not be published. Required fields are marked *