ऐतिहासिक चन्द्रागिरी गढीइ ३० म्ह कलाकारं शीप न्ह्यब्वल

११३८ चौलागा अष्टमी

१८ दँ न्ह्यः पिदंगु नेपाल मण्डल सम्पदा सफुतिं हःगु अवधारणायात पर्यटकिय प्रर्वद्धनया रुपय् न्ह्यःने यंकेत म्हिगः चैत्र २४ गते नेपाल मण्डल पर्यटन नगरी पर्यटन उत्सवया थी थी ज्याझ्वः त मध्येय्ह ऐतिहासिक चन्द्रागिरी गढीइ टिष्टा सतजल काँगडा युद्धय् थःगु वीरता क्यना बलिदान ब्यूपिंनिगु लुमन्ति व सम्मान स्वरुप कला उत्सवया ग्वसाः ग्वसें छगू तःजिगु ज्याझ्वः जुल ।

किपा-रेखा शाक्य

नेपाल मण्डल पर्यटन नगरी चन्द्रगढी टिष्टुङ पालुङ चित्लाङ भेगपाखे‌ं ग्वसाः ग्वःगु उत्सवय् अभियानकर्तात पाखें नेपाःया ध्वाँय् झण्डा ब्वयेकाः पार्क स्थापनाया घोषणा याःगु खः ।

किपा-शरण ज्यापू हरि

नेपाल मण्डल पर्यटन नगरीया केन्द्रीय अध्यक्ष कृष्ण केसी व महासचिव पद्म श्रेष्ठया लिसें अन्य व्यक्तित्वपिं सहभागी दूगु उगु ज्याझ्वलय् अध्यक्ष केसीं टिष्टा काँगडाया थ्व उजाड पहाडयात हलिं न्यंकं प्रचार प्रसारयानाः थ्व थाय्यात पर्यटन नगरी दयेकेमाःगु दु, झीसँ झीगु थाय् एेतिहासिक जूगु खँ सकसिगुं न्ह्यःने तया बिइमाःगु दु, थन नं कलाया मूर्त अमूर्त कला निमार्ण याये माःगु दु थुकिया नितिं सम्बन्धित थासय् वनाः थुकियात उत्थान यायेत संरक्षण व सम्बर्द्धन यायेत बजेटया माग यायेगु खँ नेपाल मण्डल पर्यटन नगरीं यानाच्वनागु खँ स्पष्ट यानादिल ।

निर्वाणा आर्ट ग्यलरीया प्रमुख तथा कलाकार बेखराम श्रेष्ठ बलामीं नेपाल एकिकरण यायेत योगदान बियादिपिं वीर गोर्खाली योद्धापिनिगु कलाया माध्यमं सम्मान यायेगु थःपिनिगु आज्जु जूगु खँ स्पष्ट यानादिल । म्हिगः जूगु उगु ज्याझ्वलय् मुक्कं ३० म्ह कलाकारपिन्सं अन हे पहाडया चकंगु थासय् च्वनाः थःगु शीप कलाया दसू क्यंसें क्यानभासय् थी थी विषय बस्तुयात कयाः आर्ट यानादीगु खः ।

किपा-रेखा शाक्य

दक्षिण पश्चिम भेगिय संयोजक विनोद महर्जनं किर्तिपुर एकिकरणया क्रमय् धस्वाःगु गढीयात टिष्टा काँगडा पार्क दयेकाः हलिंन्यंक थुकियात प्रचार प्रसार याये दःसा ऐतिहासिक अस्तित्वया संरक्षण जुइगुया नापं किर्तिपुर,चन्द्रागिरी,ईन्द्रसरोवर,दक्षिणकाली नगरपालिका दक्वं लागायात पर्यटन प्रवर्द्धनय् दुथ्याके फत धाःसा थुकिं एेतिहासिक थाय्या नापं उगु लागाय् च्वंपिन्त आर्थिक रुपं नं सम्पन्न जुइत बः दइगु खँ न्ह्यथनादिल ।

किपा-रेखा शाक्य

निर्वाणा आर्ट ग्यालरीया व्यवस्थापनय् जूगु उगु उत्सवयात सम्वोधन यासें ईन्द्रसरोवर गाउँपालिकाया अध्यक्ष जीवन लामां धयादिल – “मुलय् तयाः गः किइगुया लिसें सुयागुं न्हाय् हे ध्यनाः तकं दमन यानाः एकीकरणया लिसें एकाधिकरण याम्ह जुजु पृथ्वीनारायण शाहयात व्यक्तिगत रुपं हने हे माः धैगु सुइतं कर मदु तर टिष्टाकाँकडा तकया लागा नेपाली भूमियात विस्तार यायेत गुगु योगदान उम्ह जुजुपाखें जुल उकिया कदर स्वरुप थुगु पार्कयात प्रवर्द्धन यायेगु थौंया आवश्यकता जूगु दु ।”

 

ऐतिहासिक तामाङ वस्ती ईन्द्रसरोवर गा.वि.स. दुनेया थुगु सम्पदा प्रर्वद्धनया दायित्व जिमिसं कायेत तयार दु तर राज्यं स्पष्ट वजेट सहितया जिम्मेबारी बिइमाःगु खँय् जोड बियादिल ।

किपा-रेखा शाक्य

 

अथेहे टिष्टु‌ंग बज्रवाराही नेवाः पुचःया अध्यक्ष हरिगोपाल श्रेष्ठजुं थःपिनिगु मू आज्जु धयागु हे लिउने लाना च्वंगु थाय्या विकासयासें पर्यटन क्षेत्रय् थुकियात महत्व बिया सामाजिक भौगोलिक व आर्थिक रुपं सबल यायेगु खः धयादिल । नेपाल मण्डल पर्यटन नगरीया स्थानीय अभियानकर्ता भक्त खवास व  रामलाल श्रेष्ठ स्मृति प्रतिस्ठानया उपाध्यक्ष विश्वमान श्रेष्ठया नं उपस्थिति दुगु खः ।

किपा-रेखा शाक्य

अथेहे म्हिगःया ज्याझ्वलय् झायादिम्ह मुर्तिकार तथा कलाकार सुर्दशन विक्रम राणां कलायात दीर्घकालिन कार्ययोजना दयेका न्ह्याः वने माःगु बिचाः प्वंकादिल ।

किपा-रेखा शाक्य

म्हिगः उगु ज्याझ्वलय् ब्वति कयादिपिं कलाकारपिन्सं नं थज्यागु नेपाःया एेतिहासिक थासय् सकसिनं थःथःगु विषय् कथं ल्हाःया शीप न्ह्यब्वये खंगु व उलिमछिं कलाकार छथासं मुनाः आर्ट याये खंगु धइगु नं छगू एेतिहासिक ज्या हे जूगु व थःपिन्सं नं थुकी ब्वति कायेदुगुलिं तसकं न्ह्यापुसे च्वंगु खँ मंका कथं झीगु डटकमनाप खँ ब्याकादिल ।

किपा-रेखा शाक्य
किपा-रेखा शाक्य
किपा-रेखा शाक्य
किपा-रेखा शाक्य
किपा-रेखा शाक्य
किपा-रेखा शाक्य

म्हिगःया ज्याझ्वः नेपाल मण्डली पर्यटन नगरी, दक्षिण पश्चिम भेग, चन्द्रगिरी न. पा., किर्तिपुर न. पा., दक्षिणकाली न. पा., इन्द्र सराेबर गा. पा. व थाहा न. पा. या संलग्नताय् जूगु खः ।

One thought on “ऐतिहासिक चन्द्रागिरी गढीइ ३० म्ह कलाकारं शीप न्ह्यब्वल

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.