एस इ इ परीक्षाय् नेपालभाषा कयाः ताःलाःपिं ब्वंमिपिन्त हन ।

११३८ चिल्लागा नवमी/येँ

नेवाः देय् दबूया नायः नरेश ताम्राकारं नेपाल सरकारया भाषा नीति हे गलत जूगुलिं नेपालभाषा लगायत मेमेगु भाषाया नं दमन जुयाच्वंगु धयादिसें सकल नेवाः खलः पुचःत छधी छपं जुयाः भाषिक आन्दोलन यायेमाःगु खँ म्हिगः जूगु एस इ इ परीक्षाय् नेपालभाषा कया ताःलाःपिं ब्वंमि भाजु मय्जुपिन्त हंग ज्याझ्वलय् धयादिल ।

किपा गुहाली नेवाः सूचना केन्द्र

नेपालभाषा स्यनेकने पुचःया ग्वसालय् जगतसुन्दर ब्वनेकुथि लखुतिर्थय् एस इ इ परीक्षाय् नेपालभाषा कया ताःलाःपिं ब्वंमि भाजु मय्जुपिन्त म्हिगः हनेगु ज्या जूगु खः ।   शान्ति निकुञ्ज मा. बि. या सचिन कारञ्जित (न्हाप) , जगतसुन्दर ब्वनेकुथिया सुजिना तामाङ्ग (ल्यू) , रिकेश श्रेष्ठ (लियांल्यू) कन्या मन्दिर मा. बि. या लसता श्रेष्ठ, बिनिशा श्रेष्ठ, आदर्श उच्च मा. बि. थिमिया लक्ष्मी केशरी श्रेष्ठ, अमिरा श्रेष्ठ, सायर कपालि, बनिन श्रेष्ठ, रोजिना श्रेष्ठ, जगतसुन्दर मा. बि.या सुनिता दिपाकार, सरिता महर्जन, सृष्टि खड्गीपिन्त मूपाहाँ रत्न देवी तुलाधरं हनापौ व दां लःल्हानादीगु खः ।

किपा गुहाली नेवाः सूचना केन्द्र

अथेहे भाषासेवी नेवाः बस्ती नेवाः अभियानया अभियन्ता दिपक तुलाधरं  नेपाल सरकारया शिक्षा नितिइ ऐच्छिक विषयस भाषानाप प्राविधिक विषय मखु भाषा हे तयेमाःगु खँयात बः बियादिल । प्राध्यापक प्रेमशान्ति तुलाधरं छुंनं जातियात न्हंकाछ्वयेमाल धाःसा इमिगु भाय्यात विस्थापित यानाबिइमाः धैगु धापूयात नेपाल सरकारं नालाकाःगु खनेदु धयादिल । तरनं साइन्स विषय कयाः ब्वनाच्वंपिं ब्वंमिपिं मध्ये बांलाःगु ल्याः कायेत ताःलाःपिं प्रायः नेपालभाषा कयाः ब्वंपिं नेवाःत हे खनेदुगु थ्व झीगु  नितिं सकरात्मक खँ खः धकाः मन्तब्य बियादिल ।

किपा गुहाली नेवाः सूचना केन्द्र

ज्याझ्वलय् थःगु नुगः खँ प्वंकेगु झ्वलय् नेपालभाषा कयाः ब्वंपिन्संनं रोजगारी चूलाके थाकुइगु धैगु भ्रम जक खः इमिसंनं रोजगारी याना थःगु तुतिइ दनाच्वंगु खँ नेपाल लिपि गुथिया अनिल स्थापितं कनादिलसा  जगत सुन्दर ब्वनेकुथिया प्रिन्सिपल सुनिता मानन्धरं नेपालभाषा विषय कयाः ब्वनेवं ब्वंमिपिं कमजोर जुइ धैगु खँ भ्रम जक खः । नेपालभाषा कयाः उत्कृष्ठ ल्याः हयेत ताःलाःपिं प्रगति ह्यूमत व सुमन स्थापितपिसं ल्याव टेक्निसियन विषय कयाः बांलाक हे अध्ययन यानाच्वंगु खँ कनादिल ।

किपा गुहाली नेवाः सूचना केन्द्र

नेपालभाषा स्यनामि नेपालभाषा स्यनेकने पुचःया नायः रमिता बज्राचार्यं नेपालभाषा कयाः उत्कृष्ठ ल्याः हयेत ताःलाःपिं ब्वंमिपिन्त हनाबना यासे कःघानाः भाषिक अभियानय् नापनापं यंकेमाःगु खँय् बः बियादिल ।

बुखँ व किपाः साभार नेवाः सूचना केन्द्र

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.

%d bloggers like this: