“एल्भीस – छ जितः सदां लुमं “

११३८ चिल्लाथ्व त्रयाेदशी/येँ

रेखा शाक्य

“एल्भीस- छ जितः सदां लुमं

“एल्भीस – छ जितः सदां लुमं । “

जि ताहाचलं अफिस वयेगु झ्वलय् बांगेमुढाया व सन्ध्या टाइम्सया ज्याकुथिइ पलखः झासु लनेत यक्व वने लं । धात्थें आः उगु ईयात लुमंका लिफ स्वयेगु खःसा जि द्यापं च्वनेमाःगुलि जितः दुुख ताः ।  निपू स्वाहाने गयेवं तप्यंक टेबिल झ्याःया न्ह्यःनेसं । देपा पाखे एकाउन्टया क्वथा, जवय् स्वयेवं हानं क्वथाचा खनेदइ । व दथुया ब्वः जुल । गन बसि खुना तःगु दु अले जवय् कम्प्यूटर क्वथा अले देपा पाखे पत्रिकाया पं पं नापं न्ह्यःने सोफा । अनं नं दुने वन कि देपा पाखें सुरेश दाइ च्वनिगु टेबिल, वया न्ह्यःने निगः टेबिल दइ, अनं नं देपा पाखे रमेशदाइया टेबिल ।

व सुरेश दाइ च्वनिगु टेबिलया न्ह्यःने निगः टेबिल । झ्याः पाखेया टेबिलय् अप्वः धयाथें हाकुगु पाइन्ट, हाकुगु कमिज पुनाः एल्भीस ल्हातिइ कलम ज्वना व हाकचागु भ्वंतय् छुं च्वयाच्वनी सा गबलें छुं ब्वनाच्वनी । जि खनेवं मुसुक्क न्हिली ।

उबलय् जिं नापलायेगु धैगु हे सुरेशदाइयात खः । रमेशदाइ, उदेन, तेज, कृष्ण प्रजापति, ज्ञानकुमार, अनिलपिं सकलें नापं नतसुत दु । जि सुरेशदाइ नाप उगुथुगुं गफ याना च्वने बलय् एल्भीस न्हिला च्वनी । तर जब सुरेशदाइ थःगु थासय् मदयाच्वनी जिं खँ ल्हायेत पासा थ्वयेकेगु हे एल्भीसयात खः । खय्तला जितः एल्भीस सुना म्हसिका ब्यूगु धकाः मस्यू तर जि अन वनेबलय् धाःसा एल्भीस नाप जिगु गफ कनी मू थें मू ।

अजू चा एल्भीस सुं नापं उलि मन्ह्यू वा गफ मयाः धाइ तर जि नाप धाःसा गफ याः । जि भचा स्वतन्त्र विचार धारायाम्ह अले जि अन वनेबलय् सकलें नापं ख्याःयाना न्हिला इनावयेमाम्ह । छकः निकः जिं अन वना हल्लायाना च्वनिगु इलय् रमेश दाइ नं तीजक गःपः ल्ह्वना स्वइगु मखंगु मखु जिं । रमेश दाइ धाःसा ध्यबा पुला नवाके माम्ह जि धाःसा सितिकं सः थ्वयेका च्वनिम्ह ।

जि उबलय् एफ एम स्वनिगः सच्छिइ नेपालभाषाया ज्याझ्वः न्ह्याकाच्वनाम्ह जूगुलिं एल्भीसं नं ज्याझ्वःयात कयाः आपालं खँ न्यनाच्वनी अले थःम्ह स्यूगु खँ कनाच्वनी । थथे हे उगुं थुगुं खँ जुइगु झ्वलय् एल्भीसनाप नेवाः ख्यलय् यौन बिषययात कया च्वइपिं मनूत मदु धैगु बारे नं खँ जुयाच्वनीगु । जि भचा थुगु बिषयस तप्यंक खँल्हायेत नं मछिं मतायेकीम्ह धैगु वं स्यू ( एफ एमय् उसाँय् ज्याझ्वः न्ह्याकेबलय् गबलें यौन सम्बन्धि खँ नं वइगु अले जिं निर्धक जुया उकिया बारे न्ववायेगु याना) ।

 उकिं वं जितः छन्हु थुकथं हे खँ जुयाच्वंगु इलय् झीगु नेवाः ख्यलय् नं थज्यागु विषयया पत्रिका छगू पिकाये दःसा ज्यू तर सुना च्वइ ख्वाः मवः धाइगु, अले जिं काचाक्क धायेगु “एल्भीस छ व पत्रिकाया सम्पादक जु जिं च्वयाबिइ । ” अले अज्यागु खँ न्यना अन जिमिगु गफ न्यनाच्वंपिं सकलें हररर न्हिलिगु ।

उखे क्वथाय् रमेश दाइ धाःसा छुं मताः पहः याना मुसु जक कयाच्वनी । एल्भीस नं जिगु खँ न्यनाः जिं अथे थ्यंक मधाइगु खःला धकाः च्वनीगु जुइ अले व स्वयम थः हे क्वछुना न्हिली । अले धाइ ” धात्थें रेखा थें ज्याम्ह नुगः चकंम्ह, बिचालय् स्वतन्त्रम्ह मनू झीगु नेवाः ख्यलय् म्हो हे जक । ” उबलय् व खँ ख्यालं धाःगु ला वाय् धात्थें धाःगु जिं गबलें लिफ स्वयाः मूल्यांकन मयाना । छाय्की एल्भीस जिगु नितिं छम्ह बांलाम्ह मनू खः अले जि सखे वयागु त्यानुगु इलय् छझा जक सां सितिकं न्हिकिम्ह रेखा ।

थौं जक मखु गबले गबले होली वइ जितः एल्भीस लुमं । एल्भीस मन्त धकाः पाटन क्याम्पसय् नेपालभाषाया एम ए ब्वनाच्वनागु इलय् कक्षा क्वथाय् वया जानकारी ब्यूगु न्हि । काचाक्क सुनां नं विश्वास याये मफुगु न्हि । तर सत्य ला सत्य हे जुइ । सुयां मययेवं अले विश्वास मयायेवं व असत्यय् गन हिलावंगु दु । एल्भीसया मृत्यु नं छगू खायूगु सत्य हे जुया बिल । सकसिगु मिखाय् ख्वबिया बाय् कायेका तुं वन ।

ई न्ह्याना हे च्वनी थःगु हे मताय् । अथेहे एल्भीस मदूगु नं स्वदँ क्यंगु दिनस एल्भीस जोशी लुमन्ति सफू पिदन अर्थ प्रकाशनया लुखां । छगू जिगु ल्हातिइ नं थ्यन । अनं निसें जिं थ्व सफूयात तितिपापा याना तइतया तिनी अले हरेक वर्षया होलीया इलय् एल्भीस लुमंका वयागु सफूया देवलय् तइतःगु वैगु किपाः स्वया वइत लुमंका च्वना ।

जिं अथे छाये याना सखे जिके सुनां न्यंसा जिके नं उकिया लिसः मदु । तर छगू आत्मीयता धाये वा व उगु इलय् जिगु त्यानु ईया पलख झासु लनेगु ईया साक्षी जूगुलिं खः व जितः लुमनाच्वनीगु । यदि धात्थें व इलय् एल्भीसलिसे व दुखद दुर्घटना मजूगु खःसा थौं जिं व पाखें आपालं खँ सयेके खनीगु खइ । लुइके खनीगु खइ वा धाये झीगु नेवाः भाषा ख्यलय् यौन साहित्य नं हाः काये धुंकूगु खइ ।

शायद एल्भीस नाप थुगु विषयस जुयाच्वनीगु ख्याःथें नी थेंया खँ उगु इलय् अन दुपिं सन्ध्याटाइम्सया मेपिं दुजःपिन्त तकं ल्वमने धुंकल ज्वी तर जितः धाःसा एल्भीस नं लुमं अले व विषय नं ।

थौंकन्हेया माहौल नं होलीया । अले न्ह्याबलें होली वलकी लुमनीम्ह एल्भीस थुगुसी नं लुमनं । हाकनं सफू दथुं व हाकुगु कभरया सफू लिकया । उबले उगु सफुतिइ मन्ह्यंगु व न्ह्यःने मलाःगु जिगु नुगःया खँ श्रद्धाया छपास बिचाःया खँ थौं दँ दँ लिपा च्वया अले धयाच्वना “एल्भीस छ जितः सदां लुमं” 

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.