एकता दिवसया विरोधय् र्याली पिकाइगु

११३८ पोहेंलागा अष्टमी/येँ

गणतन्त्र नेपालय् सार्वजनिक विदा हे बियाः सरकारं हे जुजुया बुदिं हनेगु ज्याप्रति गणतन्त्रवादीपिन्सं आपत्ती क्यंगु दु ।

पुष २७ गते पृथ्वीनारायण शाहया बुदिंकुन्हु राज्यं एकता दिवस नां बियाः हनेत्यंगु सम्बन्धय् थौं येँय् जूगु सहलह ज्याझ्वलय् न्ववाःपिन्सं गणतन्त्र नेपालय् राज्यं जुजुया बुदिं हनेत्यंगु धासें विरोध प्वंकूगु खः ।

ज्याझ्वलय् न्ववासें नेवाः न्ह्यलुवा मल्ल के सुन्दरं गणतन्त्र नेपालय् जुजुया बुदिं राज्यं हनेगु ज्यनं राजतन्त्र लितहयेगु कुतः खःला धइगु शंका ब्वलंकूगु बिचाः तयादिल । थौं जुजुया बुदिं हनाः छगू कथं जनताया नाडि थियास्वःगु खनेदुगु न्ह्यलुवा मल्लं धयादिल ।

पृथ्वीनारायण शाहया दिव्य उपदेश वा छुं नं धापुतिइ एकिकरणया उल्लेख तक हे मदुुगुलिं हे वयाके एकिकरणया भावना द हे मदुगु खँय् मल्लं बः बियादिल । पृथ्वीनारायणं जनतायात अत्याचार यानाः, झंगः ल्हानाः युद्ध यानाः थःगु राज्य विस्तार जक याःगु मल्लया दावी खः ।

ज्याझ्वलय् पृथ्वीनारायण शाहं नेपाःगाः त्याकाकायेगु झ्वलय् याःगु छलकपट व थनया जनतायात याःगु अन्याः, अत्याःया बारे नं मल्लं कनाद्यूगु खः । सुगौली सन्धि यानाः तःधंगु नेपालयात चीधं दयेकाब्यूम्ह पृथ्वीनारायण शाहयात एकिकरणया नायः धायेगु हे हास्यास्पद जूगु वयकःया धापू खः ।

उगु हे ज्याझ्वलय् वइगु पुष २७ गते राज्यं जुजुया बुदिं हनेत्यंगु विरोधय् ज्याझ्वः यायेगु जानकारी नं ब्यूगु खः । पुष २७ गते असनय् मुनाः किपुलिइ मोटरसाइकल र्याली वनीगु जूगु दु ।

२७ गते कुन्हु असनय् मुनाः दक्कले न्हापां छगू चीहाकःगु सभा यायेगु ग्वसाः खलकं धाःगु दु । वयांलिपा मोटर साइकल र्याली यासें किपुलिइ छ्याकः ल्वहँतय् वनेगु ज्याझ्वः दु । लुमंकेबहःजू, किपूया छ्याकः ल्वहं धयागु किपूमिपिन्सं पृथ्वीनारायण शाहयात लुमंकाः थुकलं बीगु ल्वहं खः ।

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.