इहिपा लिपाया रोमान्स

११३८ दिल्ला थ्वः दशमी

“इहिपा व लड्डु खः, नःपिं नयाः पछ्ताये चाः मनःपिं सवाः पाखें द्यापं च्वना छखे ला ।”  थ्व धापू इहिपाया खँया बारे गुनगुन जुलकी न्वःगु मकःया मी थें ह्वानाक्क च्याये नं मफू काचाक्क सिइ नं मफूगु नौ थें जुयाच्वंगु थें जितः ताः । खय्तला थौं कन्हेया हलिंया हावां कयाः व मनूत २१ औं शदीया आधुनिकताय् दुबिना थ्व लड्डु नयेत लखौं लख फुकाः झ्यांझ्यां बाजं त्वाः थ्वयेक न्यायेकाः, थःथिति दक्वसित सःता लड्डु नयेतः काबिल जुल धकाः प्रमाणित याये माःगु अवस्था मदु ।

थौं कन्हे भतिचा ध्यबाः फुकाः नं धाः धाःगु सवाःया लड्डु नयाच्वंपिं अल्याख दु । थ्व छुं तःधंगु विषयया खँ मखु थें जुइधुंकल ।
तर जीवन काःछि थःम्ह लखौं ध्यबा फुकाः सदां छगू हे सवाःया लड्डु नयेगु खँय् धाःसा आपालं कारणं यानाः गबलें व सवाः पाखें नं द्यापं च्वने मालेफु । अथे हे लड्डुया नं सदां व हे छप्वाः म्हुतुइ ल्वसुइगु कामना मदया वनीगु नं थौंकन्हेया समाजय् खने दयाच्वंगु प्रसंग झीसँ यक्व हे समाचार, घटना पाखें सिइका च्वनागु दु , ब्वनाच्वनागु दु, न्यनाच्वनागु दु ।

आः वने विषयबस्तु पाखे । जीवनय् न्ह्याम्हसिगु इच्छा छक्वः इहिपाया जीवन हनेगु । इच्छा मनूतय् जक मखु जगतया प्राणीतय् सकसियां दइ । गुम्हसिया छु गुम्हसिया छु यायेगु इच्छा दया हे च्वनी । उकि मध्ये नं इहिपाया खँ दकलय् च्वये लाइ । याकः म्वायेगु पलेसा सुं नापं म्वासु दतले ह्वना नयेगु । थुकिया नितिं झीथाय् ब्याहा मयासें सुं मिसा मिजं नाप अले सुं मिजं मिसा नाप इहिपा हे मयासे च्वनेगु लकस मेमेगु देशय् थें झीथाय् उलि मदुनि । दुसां व खँयात झीगु समाजं पचे याये फूगु अवस्था मदुनि । समाजं सिइक अथे च्वना च्वंपिन्त ब्यक्वः मिखां स्वयेगु यानाच्वंगु हे दनि ।

इहिपा हे याना नापं जीवन ह्वना च्वंपिनि नं जीवनय् रोमान्सया कमिं याना अप्वः हे कचमच जुयाच्वनीगु व उकिया लिच्वः पारपाचुकेय् थ्यंकाः क्वचाःगु नं घटना झीसँ न्हियान्हिथं ब्वनाच्वनागु हे दु । उकिं इहिपा छगू संवेदनशील विषय हे खत ।

किपाः रेखा शाक्य

सकसिनं स्यू, सुयां इहिपा जुइ । इमिसं थःगु जीवनया इच्छा पूवंगु ताय्काः उकियात न्ह्याइपुक हे हनेत कुतः याइ । इहिपाया छुं दँ तक निम्हसिन निम्हेसिगु छुं बांमलागु पक्ष मखं छु याइ वा मखना च्वनी । तर ईया घःचाः चाहिला वं लिसे अनलिपा छम्ह मेम्हसिगु गुणया पलेसा अवगुणया ल्याःचाः तयेगु शुरु याइ । अनंलिपा ल्वापूया पुसा पीगु ज्या न्ह्याइ । न्हापा हरेक ची ची धंगु खँयात छुं मखु थें ह्वनाजुइपिन्त व हे  चि चि धंगु खँ ल्वापुया छेँ दनेत छपा छपा अपाः तयेगु ज्या कथं कयाबिइ ।

इहिपा न्ह्यः तक निम्हसिनं निम्हेसिगु हरेक तःधंगु चिधंगु इच्छा यात कदर याइ । छम्हं मेम्हसित च्वछायेगु ज्या याइ । तर बुलुहुँ च्याःगु निकाः सिं नौ जुजुं वनी । अले इहिपाया जीवन च्या च्यां बुलुहँ गुनु मी या रुप काइ । न्हापा विश्व सुन्दरी कथं स्वयाच्वम्ह कलाःयात छेँया फर्निचर कथं ताय्की । यःबले फ्यतुइ मयल की ध्याकुने वानाछ्वइ । अथे हे छुं संकिपाया हिरो कथ खंका च्वम्ह थः मिजंयात नं मिसा पात्रं सामान्य हिरो कथं जकं स्वयेगु याइ थःगु मिखाय् मेम्ह हिरो सुपर जुयावइ ।

धात्थें कलाः भाःतया दथुइ रोमान्सया थाय् मदयेवं छम्हं मेम्हसित छम्ह सामान्य मनू कथं जक व्यवहार याइ । जुजुं छखा हे छेँ च्वना नं निम्ह म्हमस्यूपिं मनूतय् थें व्यवहार जु जुं वनी । धात्थें थज्यागु ई उबले वइ जब निम्ह मध्ये सुनां नं थवंथवय्या चि चि धंगु खँयात हे वेवास्ता याना बी । गथे की बुन्हिया भिंतुना, नाप चाःहिलेगु ई मदया वनीगु, छेँ ज्याय् छम्हसिनं जक च्यूता कयाच्वने मालिगु, छेँया व्यवहारिक ज्याय् सुस्तिपहः क्यनेगु, छेँजःया परिवारयात वेवास्ता याना यंकीगु, छम्ह मेम्हसित कदर मयाइगु, ल्वापू जुलकी छम्हं मेम्हसित याक त्वता मेगु क्वथाय् वना द्यनेगु, भाःत सिबें थः उच्च पदय् थ्यन की व सुयां जीवनय् सुं मेम्ह व्यक्तिया प्रवेश  अादि इत्यादी  ।

कलाः भाःतया दथुइ थवं थवय् थज्यागु आपालं लापरवाही जुया वलकि थुमिगु स्वापुतिइ ख्वाउँपन वइगु स्वभाविक खः । अप्वः धयाथें मिसात इहिपा धुन की छेँ ज्याय् तक्यनीगु व भाःतयात यक्व ई बी मफइगु, अथेहे इहिपा लिपा मिजं त नं थःगु क्यारियर दयेकेत अप्वः ई ज्याय् तक्यनिगु । अले निम्हसिनं थःपिनिगु नितिं हे जक धकाः नं ई बिइ मफइगु जुयावनी । छेँ ज्यां त्यानु चाम्हं थः मिजंयात अथेहे पिनेया ज्यां लागीमिगी चाःम्ह मिजं नं थःपिनिगु वैवाहिक जीवनया छगू आधारयात, अन्तरंग ईयात उलि हे न्हापा थें रोमान्टिक मुडय् भ्यलेपुनेगु ई बिइमफया च्वनीगु व यचा स्वापुतिइ छम्हं मेम्हसिगु इच्छाया कदर मयासें सुम्क च्वना बिइगु हुनिं याना नं इहिपा लिपाया राेमान्सय् ख्वाउँगु पन वइगु खः ।

जीवनय् म्वायेत ध्यबा व मतिना खँग्वःया लिधँसाय् जक म्वाना च्वंन धाःसा उकिया प्रतिफल सुखमय जुइमखु । नापं च्वनेगु व खँग्वलं जक मतिना क्यनेगु पलेसा निम्हसिनं नं थवंथवय् व अन्तरंग ईयात खः कथं छ्यले मफइगु हे नं छगू इहिपा जीवनय् भुखाय् ब्वयेकेगु नितिं तःध‌गु भूमिका म्हिता च्वंगु जुयाच्वनी  ।

मिसापिं नं न्हापा न्हापा भुतुलिइ ज्या यानाच्वनी बलय् भाःत लिउनं वयाः घ्येपुवइगु, याक ईयात काचाक्क मतिनाया ई कथं ह्वनेगु मतिइ तयाच्वनी सा भाःत जुम्ह नं पिनें त्यानुक वइगु इलय् कलाः पाखें मतिनां जाःगु सलं खँ ल्हाना भाःतया समस्याय् थःगु ब्वति काइगु व भाःत खन कि नापं प्यपुं वइगु ई यात त्वफिका च्वनी । अथेहे अन्तरंग मतिनाया नितिं पहल यायेगुलिइ लिचिलिगु बानी वा अहमं याना नं निम्हसिगु दथुइ पःखाः ग्वयाच्वनी । थ्व दक्वं अनुभवं जब धात्थें न्हापा थें मतिनां साकार रुप कयाच्वनी मखु अले अन बुलुहुँ छम्हस्यां मेम्हप्रतिया मतिना अवहेलना व अपेक्षाय् हिलावनी ।

अले अन चि चि धंगु खँ चाहे व लसताया खँ जुइमाः वा दुखया खँ जुइमाः इनेगु बानी त्वफिना वनी । मिजं नं बिचाः याइ थ्व जिमि कलाः खः न्ह्याबलें उलि हे मतिना व व्यवहार गनं यानाच्वने फइ । अथे हे मिसां नं थ्व मिजंया नितिं थुलिमछिं एडजस्ट याये धुन आः जिं जक छाय् वयागु हे अधिकारय् च्वना च्वने । जि नं थः यत्थें म्वाये, थःयत्थें जुइ ।

वास्तवय् कलाः व भाःत दथुइ रोमान्सयात सदां म्वाकातयेमाः, चाहे व नकतिनी इहिपा जूगु ई छाये मजुइमाः चाहे दँ दँ पुलांगु ई हे छाय् मजुइमाः । खः इहिपाया धुंकाः या क्वाःक्वागु स्वापुतिइ गुलि रोमान्स ह्वानाक्क हे च्याना च्वनी छम्ह मेम्हसिया दुने समाहित जुइत गुलि आय्बुया च्वनी व ई न्हापा थें न्ह्यागुं इलय् मलुइफु, मजुइफु  वइ तर मतिना ला मतिना हे जुल उकिं व्यक्त यायेगु पहः व उकिया प्रकृया जक पाइगु खः धकाः थुइके माः । समस्या न्ह्यागु हे जुइमाः तर निम्हसिया दथुइ रोमान्स जुया हे च्वनेमाः ।

मतिना हे व क्वातुगु आधार खः निगू प्राणया दथुइ निगू नुगःयात स्वायेगु दकलय् बांलांगु व संवेदनशील आधार । निम्हसिया दथुइ न्ह्यागु हे कचमच जूसां थःपिनिगु अन्तरंग इलय् यदि छम्ह मेम्ह प्रति समर्पण जुया बिल धाःसा व कचवंया अन्त अन हे जुइ । थुकिया नितिं निम्ह मानसिक रुपं तयार जुइमाः ।

थथे थःपिन्त सदां मानसिक रुपं न्ह्यब्वये फतधाःसा अन सदां मतिना म्वानाच्वनी । खः मतिना धाल की निम्हसिया दथुइ याैन विषय वा निम्हिसया दथुइ जुइगु यचा स्वापू जक हे नं मखु तर यचा स्वापू छगू कलाः भाःतया दथुइ छम्ह‌ं मेम्हसिगु जीवनयात चिना तइगु व बल्लागु पसुका खः गुकिइ सदभाव व समर्पणया र‌ंग दु ।  थथे जुल धाःसा अन इहिपा छगू बोझ कथं जुइमखु । इहिपायात मात्र ई या ह्यूपाः कथं कयाः थःगु मतिना ब्यक्त यायेगु व मतिनाय् म्वायेगु पहःयात छुं भचा हिलादिसँ समय सापेक्ष जुइकथं । अले सदां इहिपाया लड्डुया सवाः न्हूगु हे जुयाच्वनी । व सवालं म्हुतु सदां माकुसे व चाकुसे च्वना हे च्वनी ।

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.

%d bloggers like this: