इलं म्हू चिनातःगु चिनाखँ सफूया उलेज्या

ने सं ११३९ थिंलाथ्व द्वितीया येँ

झीगु सम्वाददाता

“रामबहादुरया कवि दुर्गालाल हे कवि जुइमाःगु मदु । व कवि व हे जुयाः दने फयेमाः । चाकु माकु व खाइसे खल्ल वःगु सवाः हे कविता खः । चिनाखँ न्ह्यागु विषयया जुइमाः चाहे व जीवन, समाज, राष्ट्र, भाषा व राजनैतिकनाप हे  स्वापू दूगु छाय् मजुइमाः उकिइ थः हे स्वयम दुब्यंगु जुइमाः अले जक चिनाखँय् जीवन्तता वइ ।”

किपाः रेखा शाक्य

थ्व धापू जनकवि दुर्गालालजुं न्हय्मू न्हय्तवाः दरु गुथि संरक्षण समितिया ग्वसालय् जूगु उगु समितिया कजि भाजु रामबहादुर डंगाेलयात थाकुलिं लुइगु भिं लसताय् वय्कःया हे च्वसां पिज्वःगु चिनाखँ मुना सफू इलं म्हू चिनातःगु चिनाखँ उलेज्याय् प्वंकादिगु धापू खः ।

किपाः रेखा शाक्य

लाय्कू बाँसुरी खलःया पुचलं मंगल धुनया लकस ब्वलंका विधिवत रुपं त्वाः देवाय्  मत च्याका उलेज्या जूगु थाैंया ज्याझ्वलय् उगु सफू मू पाहाँ शताब्दी पुरुष सत्यमाेहन जाेशीजुं  उलेज्या यानादिल ।

किपाः रेखा शाक्य
किपाः रेखा शाक्य

समितिया सचिव भाजु मचाराजा महर्जनजुं लसकुस यायेगु झ्वलय् झीगु ख्यलय् अापालं साहित्यकारपिं दुसां वय्कःपिन्त सदां च्वयेगु लकस जक मखु च्वया हे म्वायेगु लकस दयेकेमाःगु अावश्यकतायात न्ह्यथनादिल । उकिं थःगु त्वाःया बाजं संस्कार अले भाषायात तकं झीसँ सदां म्वाकातय्गु लकस ब्वलंकेमाःगु खँय् बः बियादिल ।

किपाः रेखा शाक्य

मू पाहाँ भाजु जाेशीजुं थःगु नुगः खँ तय्गु झ्वलय् च्वमि भाजुयात थाकुलिं लुइगु भिंलसताय् भिंतुना देछाया दिल सा वय्कःया सफूयात कयाः वय्कः छम्ह दार्शनिक कवि खः धकाः धाःसें वय्कल‌ं संसारया नित्य खँयात चिनाखँया माध्यमं ब्वयेगु कुतः याना थःगु दार्शनिक पहः न्ह्यब्वःगु खँयात कुलादिल ।

https://www.facebook.com/rajendra.manandhar.7906

विशेष पाहाँ कथं झायादिम्ह प्राध्यापक सुवर्ण शाक्यजुं उगु हे सफूतिइ दुथ्यागु चिनाखँयात कया नुगः खँ न्ह्यथनादिल । सफूतिइ धर्म संस्कृति परम्परा भाषा राजनिती व मतिनाया खँ दुथ्याका तःगु दु धाःसें विविध विषययात कःघाना च्वयातःगु थुगु सफुतिइ कल्पना म्हाे जुया वास्तविकता व यथार्थपरकतां जाःगु खँ धयादिल । चिनाखँय् भजन व म्ये हालेज्यूगु कथंया विषयवस्तु दुगु खँ नं कनादिल ।

किपाः रेखा शाक्य

ज्यापू महागुथि केन्द्रीय समितिया नायः लाेककवि राजभार्इ जकःमि जुं च्वमि भाजुयात कया चिनादिगु चिनाखँ ब्वना न्यंकादिलसा ज्यापू महागुथिपाखें डंगाेलजुयात  दाेसल्ला न्ययेकेया लिसें हनापाै नं लःल्हानादीगु खः । अथेहे मू पाहाँ भाजु जाेशीयात च्वमि भाजुं दाेसल्लां न्ययेका हनादिगु खः ।

किपाः रेखा शाक्य

अथेहे मेम्ह पाहाँ नेवाः देय् दबूया नायः नरेश ताम्राकारपाखें नं भिंतुना देछाया दिलसा पूर्व राज्यमन्त्री तीर्थ राम डंगालपाखें नं भिंतुसें नुगः खँ तयादिगु खः ।

ज्याझ्वःया लिपांगु इलय् च्वमि भाजु राम बहादुर डंगाेलजुं थःगु नुगः खँ तयेगु झ्वलय् धयादिल नुगःया खँ न्ह्यब्वयेगु अपुगु खँ मखु । गथे मतिइ वल गुबलय् खँ नुगलय् लँय्लँय् बुल व हे जक नं कथं हंक च्वयेगु अपुगु बिधा मखु । अथे खयानं थःम्ह थःगु नुगःया बुँगाचय् ब्वलंगु भाव यात र्इ ब्यः कथं नुगलय् दासिवःगु भावनाया खँग्वःयात फुति फुति लः मुने थें मुनाः थुगु सफूया सृजना यानागु खँ न्ह्यथंसें थुगु सफू पिकायेत गुहालि यानादिपिं सकसितं सुभाय् देछायादिल । नापनापं  थःम्ह च्वयातयागु सफूया  चिनाखँ छपू  नं ब्वना न्यंकादिगु खः ।

थाैंया ज्याझ्वः  न्हयमून्हयत्वाः दरुगुिथ व मुसुंबहाःया गुरुया लिसें नायः भाइराजा महर्जनया सभानायसुइ न्ह्याःगु खः । थाैंया ज्याझ्वलय् विशेष पाहाँकथं येँ महानगरपालिकाया मेयर भाजु विद्यासुन्दर शाक्य, माननीय कृष्णगाेपाल श्रेष्ठ, प्रदेश सांसद मय्जु जीवन डंगाेल, यँ महानगर समितिया नायः भाजु बाबुराजा महर्जन, अथेहे दरुगुथि स‌ंरक्षण समितिया न्वकू कालुमान महर्जन, संस्कृति विकास काेषया नायः भाजु मंगलकृष्ण सिंह,  सफू प्रकाशक मय्जु भुवन केशरी डंगाेल, वाद्यगुरु न्हुच्छे बहादुर डंगाेलया लिसें ज्यापू महागुथि केन्द्रीय समितिया  व संरक्षक पूर्व नायः राजभाइया सहभागिता दुगु खः । लिसलिसें उगु संरक्षण समितिया अन्य दुजःपिं नापनापं स्थानीय व गन्यमान्य व्यक्तित्वपिनिगु उपस्थिति दुगु खः ।

किपाः रेखा शाक्य
किपाः रेखा शाक्य
किपाः रेखा शाक्य

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.