इन्द्रजात्रा धायेगु कि मधायेगु ?

दर्शनवीर शाक्य

इन्द्रजात्रायात वलकी झीके छगू गज्जबया अनुभूति वइ । झीगु संस्कृति गुलि तःजि धकाः झीत गर्व जुइ तर थुगु हे संस्कृतिं याना झीगु पतन सुरु जुल धैगु हीनता नं दयावइ । थुगु हे दिं खुन्हु गोर्खाया जुजु पृथ्वीनारायण शाहं येँ हमला याना मल्ल जुजुपिंत बुकाः नेवाः तय्गु पतनया न्हिं शुरुयाःगु खः । उकी इन्द्रजात्राय् झी लयेतायेगु खः वा झी दुःखी जुइगु खः धकाः झी हे अलमल जुइमागु । तर मजू । शत्रुं हमला यात धाःसा छ्वयलां कयेका छ्वये धैगु मल्लकालीन पतनया मानसिकता अझं झीके दनी ।
इन्द्रजात्रा वलकी हे थी थी कथंया चिन्तन आक्रोशयर हिला वनी यः। थ्व हे कारण इन्द्रजात्रायात झीत इन्द्रजात्रा धाये नं मयः । इन्द्रजात्रा बाहेक मेगु छु छु नां थुगु जात्राया दु व व हे नां यः । यक्व सित ताः की इन्द्रजात्रा धैगु येँयाःया खस करण खः । भाषिक कार्यकतापिंत थथे हे ताः । तर इतिहासं छु धाइ धैगु खँ गुब्लें वाः मचायेकु । केवल भाषिक वैमनस्यताया आधार कयाः झीसं थःगु इन्द्रजात्रा धायेके मयः छाय् धाःसां गैर नेवाःतय्स येँयाः धाये मसः अले इमिसं नालावयाच्वंगु इन्द्रजात्रा खँग्वः नं झीत झीगु खँग्वः थें मच्वनावल ।
इन्द्रजात्रा गुब्लेंनिसें न्ह्यात धैगु अभिलेख झीके मदु । इन्द्रजात्रा इन्द्र द्यःया हे जात्रा खः की मेमेगु द्यःपिनिगु नं जात्रा खः धैगु नं झीत अलमल दनी । छाय् की थुगु जात्राय् इन्द्र बाहेक मेमेगु द्यःपिनि नं जात्रा याइ । झीसं येँयाः धयाच्वना । येँयाः यमाःद्यःया यात्रा खः वा यमाःद्य जात्रा धकाः थुइके माः तर येँया जात्रा धकाः धाये मछिं छाय् की येँयाः धैगु यात्राया मूल रूप खः सा नेवाःतय् य व ज आखलय् भेद मदु । अले झीसं यमाद्यः धकाः इन्द्रयात हे मानेयायेगु नं खः ।
नेसं ५२६या लेलेया अभिलेखय् इन्द्रगौष्ठि धैगु खँग्वः वयाच्वंगु दु । उत्तर प्राचीनकालया जुजु जिष्णुगुप्तया मुद्रायर इन्द्रया वज्र कियातःगु दु । इन्द्रयात येँ जक मखुसे दोल्खा, थानकोट, पोखरायरनं पुज्यानाच्वंगु दु । इन्द्रयात नासः द्यःया रूपय् नं काः । थुकीं प्रस्त जू की इन्द्र झीगु संस्कारय् भ्यलयर पुनाच्वंम्ह द्यः खः ।
नेसं ६७०या जःखः वलंगत सिमुलयर धैगु छपू नेवाः लोक म्ये दु । वंगल सिमा क्वसं मिसा व मिजंया दथुया ज्वः म्ये खः । मिजंनं मिसायात हयेका च्वनिं । थ्व हे दौरान जुजु प्राण मोल ईन्द्रजात्रा स्वः वन धैगु प्रसंग न्ह्यब्वयातःगु दु ।
थ्व ल्याखँ धायेगु खःसा इन्द्रजात्रा धैगु गैर नेवाः खँग्वः वा खस करणयाना यंकुगु शव्द मखु । हाकनं येँयाः धैगु येँ न्याकीगु जुयाः येँया जात्रा नं पाय्छी मखु । छाय् की येँया धकाः येँ यल व ख्पपय् नं न्यायेकु ।

नाम नमिलेको जात्रा

झीगु डट कम

झीगु नितिं झीगु सञ्चार

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.