इन्टरनेट एडिक्शन


इन्टरनेट एडिक्शन छगू तःधंगु ल्वय् कथं न्यना वनाच्वंगु दु । इन्टरनेट चले याइपिंसं थः इन्टरनेट एडिक्ट जुइधुंकल धकाः गब्लें नं सीमखु । दकलय् न्हापां थ्व सिइके माः कि न्हिन्हिं इन्टरनेट सर्फिङ यायेगु व इन्टरनेट एडिक्ट जुइगु तसकं पाःगु खँ खः । इन्टरनेट युजर गुलि अप्वया वनाच्वन, उलि हे ल्याय्म्हतय्त इन्टरनेट एडिक्शन ल्वचं कयाच्वंगु न उलि हे दु ।

इन्टरनेट एडिक्ट जूगु गथे यानाः सिकेगु

  • इन्टरनेट एडिक्ट जूपिं मनूत समाजपाखें बिस्तारं तापाना वनाच्वनी । इन्टरनेटय् दुसा लय् ताइगु अले इन्टरनेट चले यानाच्वंगु इलय् सुनां खँ ल्हायेगु कुतः याःसा तं पिकाइगु जुल धाःसा सिइके माःकि व मनू इन्टरनेट एडिक्ट जुइधुंकल ।
  • सुनाप नं खँ ल्हायेगु मन दइमखु, अले न्हिछिं कम्प्युटरय् हे च्वनेगु मन जुइ ।
  • न्ह्याब्लें इन्टरनेट पाखें छुं न छुं डाउनलोड याना च्वनी, चाहे व थःत ज्या वयेमा वा मवयेमा ।
  • न्हिछिचछि इन्टरनेट सर्फिङ यानाच्वनी, थ्व दथुइ नये–त्वने तकं ल्वःमंकी ।

इन्टरनेट एडिक्शनपाखे गथे यानाः बचे जुइगु

  • इन्टरनेट चले यायेगु ई फ्यायेगु, गथे कि सुथय् २ घन्टा वा बहनी ।
  • छु नं जरुरी ज्या दुसा न्हापा वयात नि ई बिइगु । इन्टरनेट ला न्ह्याब्ले चले यासां जिउ धकाः मनय् तयेगु ।
  • न्हिछि इन्टरनेटय् च्वनेगु पलेसा पासा, छेँजः नाप अप्व ई छ्यायेगु कुतः यायेगु ।
  • छेँय् सुं वयाच्वंगु दुसा न्हापां थ्व निं बिचाः यायेगु कि व छुं ईया निंतिं वःगु दु, इन्टरनेट ला लिपा नं छ्यले फइ ।
  • इन्टरनेट एडिक्शन छुं नं कथंया ल्वय् मखु । थ्व ला छगू मनोवैज्ञानिक विकार जक खः । गुकियात थःम्हं हे याउँक ठिक याये फइ ।

संसारय् इन्टरनेट एडिक्शनया बारे यक्व हे रिसर्चं थ्व खँ लुइकूगु दु कि इन्टरनेट एडिक्शनया सिकार जूपिं मनूत न्यागू प्रकारया गतिविधिइ मस्त जुयाच्वनी । न्हापां अनलाइन गेमिंङ, निगूगु नेट सर्फिङ, स्वंगूगु पोर्न साइट स्वयेगु, प्यंगूगु अनलाइन शपिङ यायेगु, न्यागूगु नेटवर्किङ साइटय् मस्त जुयाच्वनीगु ।

सोसोलोजिस्टतय् कथं संसारय् इन्टरनेट एडिक्ट अप्व थें मस्त व ल्याय्म्हत जुइ । गुपिं परिवारपाखें ई बी मफयाः याकःचा जुयाच्वंपिं खः । उपिं न्ह्याब्लें छेँ जक च्वनाच्वनीपिं जुइ । छेँय् छुं ज्या मन्तकि उमिसं याउँक इन्टरनेटपाखे नुगः क्वसायेकी ।

बजारय् अप्वया वयाच्वंगु कम्पिटिसनं यानाः नं इन्टरनेट एडिक्शन अप्वयाच्वंगु दु । अफिसय् न्हि छक्व मेल चेक याइ, अले छेँय् वये धुंकाः नं हाकनं मेल चेक याइ । छन्हु न्हिछि इन्टरनेटपाखें तापाक च्वने मालकि थः याकःचा जूगु व संसारपाखें तापाना च्वंगु महसुस याइ, गुगुकि सत्य मखु ।

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.