आयोजक रसिया व क्रोयसिया क्वाटरफाइनलय्

 

११३८ तछला गाः चाैथी

विश्वकप २०१८ अन्तर्गत म्हिगः निगूलिं कासा पेनाल्टी सुट आउट पाखें निर्णय जुगु दु । स्पेन विरुद रसिया व क्रोयसिया विरुद्ध डेनमार्क जुगु कासाय् थप समयतकं बराबर जुगुलिं पेनाल्टी सु आउट (सडेन डेथ) पाखें जुगु खः । गुकिइ आयोजक रसियां स्पेन विरुद्ध १(४)–१(३) गोलं त्याःगु दुसा क्रोयसियां डेनमार्क विरुद्ध १(३)–१(२) गोलं त्याकाः क्वाटरफाइनलय् थ्यंगु दु । शनिबाः थुपिं निगू टिमया दथुई सेमिफाइनलय् वनेत धेँ धेँ बल्ला जुइ ।

किपा गुगल

म्हिगः क्वचाःगु न्हापांगु कासाय् १२ औं मिनेटय् रसियाया कासामि सर्जेई इग्नाशेभिचया तुतिइ लानाः डिफ्लेक्ट जुयाः थःगु पोष्टय् गोल जुसेंलिं स्पेनं अग्रता काःगु खः । आत्मघाती गोल याम्ह रसियाया कासामि सर्जेई इग्नाशेभिच दकले ज्याथम्ह कासामि खः । वयकः म्हिगः ३८ दँ व ३५२ दिन (झण्डै ३९ वर्ष) दुगु खः । दिपाः न्ह्यः डी एरियाय् हायण्डबल जुगुलिं रसियायात पेनाल्टीया ह्वताः चूलाःगु खः । रसियाया अर्टम डिज्यूबां ४१ औं मिनेटय् गोल यासेलिं थप ई तक नं कासा १–१ या बराबरी जुगुलिं पेनाल्टी सुटआउटं रसिया त्याःगु खः ।

किपाः गुगल

अथेहे म्हिगः हे क्वचाःगु मेगु कासाय् ४गू मिनेट दुने १–१ गोल जुगु खः । न्हापांगु मिनेटय् डेनमार्कया माथियास जोर्गेन्सनं गोल याःगु खःसा क्रोयसियाया मारियो माण्डजुइकं ४ गुगु मिनेटय् गोल यासे कासा १–१ या बराबरी वःगु खः । अन लिपा थुगु कासाय् नं थप ई तक १–१ या बराबरी जुगुलिं पेनाल्टी सुटआउटं क्रोयसिया त्याःगु खः ।

थौंया कासा ब्राजिल विरुद्ध मेक्सिको ७ः४५ ताःइलय् व बेल्जियम विरुद्ध जापान ११ः४५ ताःइलय जुइ ।

 

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.