आधुनिक औषधि तथा स्वास्थ्य व्यवसायी संघय् हाकनं र्इन्द्रवीर महर्जन

११३८ बछलागा  सप्तमी/यल

आधुनिक औषधि तथा स्वास्थ्य व्यवसायी संघ ललितपुरया स्वक्वःगु बार्षिक साधारण सभा तथा निक्वःगु अधिवेशनया बन्द सत्रं ईन्द्रवीर महर्जनयात  हाकनं अध्यक्षय् निर्वाचित याःगु दु ।


संघया बिधान २०७२ कथं वइगु निदँया नितिं ६म्ह दुजःपिं सहित महर्जनया नेतृत्वय् न्हूगु कार्यसमिति निर्विरोध निर्वाचित जूगु खः । दुजलय् पवित्रराज बैद्य, मनोज अमात्य, धु्रव नारायण श्रेष्ठ, नरहरि महत, राजु पन्थी र सजन श्रेष्ठ दुथ्यागु दु । निर्वाचन अधिकृत तकं जुयादिम्ह संघया कानूनी सल्लाहकार अधिवक्ता अर्तीनाथ बोकीया कथं निर्वाचित समितिया आः जुइगु बैठकं उपाध्यक्ष ल्यज्याया लिसें ९म्ह दुजः कार्यसमितिइ मिसा दुजः बिद्या श्रेष्ठ व सम्राट मान जोशीयात मनोनित यागु दु ।

शनिवार यलया संघया उलेज्या सत्रया मू पाहाँया रुपय् यल महानगरपालिकाया मेयर चिरिबाबु महर्जनं विधिवत रुपं उलेज‍या यायेगुया लिसें संघया बुलेटिन बिमोचन यानादिगु खः । थः उगु लागाया सिटामोल व डिकोल्डया वासःया बारे जक जानकार जूगु धाःसें मेयर महर्जनं शहरी स्वास्थ्य क्षेत्रया सुधारया नितिं व्यवसायी संघया मू भूमिका दइगु खँय् बः बियादिल । चिकित्सक व औषधि व्यवसायीपिनिगु पूर्ण विश्वासय् वासः निकास जुइगु जुया थिकेगु वासः स्वयां न्याइपिं बिरामी केन्द्रित वासः मिइगु व सुलभ तरिकां प्राप्त यायेफइगु लकस दयेकेगुलि महानगरपालिका नापं पलाः छिइत तयार दूगु खँ कनादिल ।


अध्यक्ष ईन्द्रवीर महर्जनं स्वास्थ्य क्षेत्रय् ताः र्इ न्ह्यःनिसें सक्रिय जुयाच्वंपिं स्वास्थ्यकर्मी दुथ्यागु थुगु संघं व्यवसायमुखी स्वया नं सेवाया भाव अप्वः ज्वना तःगु खँयात च्वछाया दिल । ३३ दँया इतिहास कय्च्याना तःगु संघं न्हूगु विधान कथ‌ं न्हू पुस्तायात थुगु क्षेत्रय् आकर्षित यासें सामाजिक स्वास्थ्य विकासया नितिं ज्या याना वयाच्वंगु खँ धयादिल । ‘

संघीय प्रणालीइ स्थानीय निकायया मू अप्वःगु अवस्थाय् स्थानीय स्वास्थ्य विकासनितिं प्रभावकारी ज्या यायेगु खँय् संघ सदां सजग दु ।’ वयकलं धयादि – ‘अर्वुद रोग निवारण संस्था, क्षयरोग व नेपाल रेडक्रस सोसाइटी लगायतया संघसंस्थानापं सहकार्य याना वयागु अनुभवया आधारय् महानगरपालिकानाप नं संघ दीर्घकालीन सहकार्य यायेत तयार दु ।’

सल्लाहकारया रुपय् न्ववानादिसें र्फमपाखें डा. बद्री शक्ति मास्कें संघया स्थापना पेशाकर्मीपिनिगु सेवा प्रवाह एकरुपताया लागि जूगु लुमंका दिसें यक्व दुजः स्वास्थ्यकर्मी थुकिइ दुने दुगु थुगु संघया विशेषता जुगु धयादिल । संघं यानावयाच्वंगु सामाजिक स्वास्थ्य ज्याझ्वलय् न्ह्याबलें नापं दइगु धाःसें दक्ष जनशक्ति   व कार्यक्रम अनुसारया विशेषज्ञपिनिगु व्यवस्थापनय् थः सक्रिय जुया च्वनेगु प्रतिबद्धता प्वंकादिल ।

संघया ज्याझ्वलय् दुथ्यापिं सकसितं मतिनाया चिं लःल्हानादिसें मनोज अमात्यजुं सुभाय देछाना दीगु खः ।

बुखँ राजेश बज्राचार्य

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.