आदिवासी हे राष्ट्रया मौलिक पहिचानया धरोहर, राज्यं च्यूता मकाः – अमृत बहादुर सुनुवार

११३८ तछलाथ्व द्वादशी

झीगु संवाददाता 

आदिवासी हे राष्ट्रया मौलिक पहिचानया धरोहर खःसां राज्यं च्यूता कयाच्वंगु मदु । थ्व हे सकल नेपाःया आदिवासीया नितिं विडम्बनाया खँ जुयाच्वंगु दु । नेपाःया थासंथासय् च्वंपिं नेपाःया आदिवासी जनतां थःगु मौलिकताया संस्कार, संस्कृति व परम्परायात म्वाका तःगु दु तर राज्यं धाःसा न्ह्याबलें मखं पहः यानाच्वंगु दु  । उकि‌ हे राज्यया  ध्यान सालेगु आदिवासी जनजाति चलचित्र महासंघया मू आज्जु खः, संघया अध्यक्ष अमृत बहादुर सुनुवारं पत्रकार सम्मेलनया झ्वलय् न्वःवासें म्हिगः आः वइगु असार १५, १६ व १७ गते स्वन्हू यंकं निक्वःगु आदिवासी जनजाति चलचित्र महोत्सव २०७५ या ग्वसाः  भृकुटी मण्डप स्थित टुरिजम बोर्डया हलय् हे जुइगु जानकारी बियादिल ।

 

किपाः रेखा शाक्य

संकिपाया माध्यमं आदिवासी जनजातिया मौलिक कला, संस्कृति, भाषा, धर्म, परम्परा, प्रथाया दस्तावेजीकरण, संरक्ष्ण, प्रवर्द्धनया लिसें पर्यटन विकासया नितिं राष्ट्रिय तथा अन्तर्राष्ट्रिय स्तरय् थुगु महोत्सवं गुहाली जुइगु मनंतुनागु आयोजकं धाःगु दु । उगु महोत्सवय् आदिवासी जनजाति प्याखं, वृत्तचित्र व चिहाकःगु संकिपा क्यनीगु जुगु दु नापं आदिवासी जनजाति प्याखंया वस्तुगत अवस्थाया जानकारी बिइगु नितिं डेक्स, आदिवासी जनजाति समुदायया परम्परागत नसाज्वलंया स्टल, आदिवासी जनजाति समुदायया मौलिक भेषभुषा आदिइत्यादिया स्टल दइगु जानकारी बियादीगु दु ।

उगु महोत्सवय् थी थी जाति संस्थापाखें छनौट जुया वःगु प्याखंत मध्ये मैरिमो (गुरुङ), लदी पूजा (माझी), टिन्छेन फमा (शेर्पा), दुलारी (राजवंशी), ढ्वाङकुम (राई), गो सु नङा (सुनुवार), टुटल लन्गिी (थारु), पा (गुरुङ), मन्दरा (थारु), रैयाँ (मगर), मायासे लासी–३ (तामाङ), कमल पोखरी (नेपालभाषा), तापालय (नेपालभाषा) र तमुसक (मगर) यानाः मुक्कं १४ गु संकिपाः क्यनीगु ग्वसाः खलक‌ं धाःगु  दु ।

थुगु महोत्सबय् दुथ्याःगु संकिपातं सगरमाथाया क्वसं च्वनिपिं सोलुखुम्बुया स्थानीयया दिनचर्यानिसें कयाः भारतया सिमापारी संघर्ष यानाच्वंपिनिगु व्यथा तकया विषयबस्तु समावेश जुगु दु उकिं थःपिन्सं ल्यःयागु संकिपातं छुं नं छुं सन्देश बियाच्वंगुयात हे ल्यःयागु धाःगु दु ।

दुथ्यागु प्याखंयात हःपाः कथं तका ५०००।– व स्वकुमिपाखें छनौट जुगु उत्कृष्ट प्याखंयात पब्लिक च्वाइस अवार्ड कथं तका रु २५,०००।– नगद पुरस्कार, ट्रफी व दसिपौ बिइगु ग्वसाः खलकं धाःगु दु ।

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.