अर्बुद रोग निवारणया नितिंं केन्द्रबिन्दु – यल

११३८ पोहेलागा द्वादशी/यल

यल क्षेत्र नम्बर ३ प्रतिनिधिसभा दुजः पम्फा भुसालं यल जिल्लायात अर्बुद रोग निवारणया नितिं केन्द्रबिन्दु दयेकेगु सोच विकास यायेत इनाप यानादीगु दु ।

नेपाल अर्वुद रोग निवारण संस्था (NCRS) यल कचाया ३१क्वःगु पलिस्था दिवसया लसताय् थौं यलय् याःगु लसकुस व सम्मान ज्याझ्वलय् सभासद् भुसालं यलय् NCRS या केन्द्र व जिल्ला कचाया भौतिक पूर्वाधारनापं प्रविधियुक्त क्यान्सर उपचार विशेष निगू अस्पताल स्थापित जूगु आधार न्ह्यब्वसें यल जिल्लायात अर्वुद ल्वय् निवारणया नितिं केन्द्रबिन्दु दयेकेगु सोच दयेकेत धयादीगु खः ।

राज्यया नीति निर्माणया तगिमय् थ्यंपिं प्रतिनिधिसभा व प्रदेशसभाया निर्वाचित दुजःपिन्त हंगु ज्याझ्वलय् वय्‌कलं राज्यया अनुदाननापं स्वास्थ्य सचेतना अभियान ताःलाकेत थःपिंसं ज्या यायेगु प्रतिवद्धता नं प्वंकादीगु खः ।

क्यान्सर विशेषज्ञ डा. मदन कुमार पियां ३५दँ न्ह्यः उचित कानूनया अभावय् भारतपाखें अवैध रुपं वइगु छताजि वासःया भरय् उपचार याइगु लुमंकुसें उपचार व सचेतनायानितिं राज्यलिसे निरन्तर पैरवी व संघर्षलिपा बल्ल अबलेया परिकल्पना सकसिगु ग्वाहालिं व्यवहारिक जुयावःगु न्ह्यथनादिल ।

NCRS या केन्द्रिय महासचिव विमल कुमार होडां क्यान्सर अन्तिम चरणय् थ्यंकाः उपचार याइपिं आपाः हे दुगु न्ह्यथँसें जिल्ला कचाया नेतृत्वय् यलय् सुविधायुक्त हस्पिस सेवा केन्द्र स्थापना यायेमाःगु सुझाव न्ह्यःने तयादिल ।

यल महानगरपालिकाया प्रमुख चिरिबाबु महर्जनं महानगरयात ल्वय्‌क स्वास्थ्यसेवा केन्द्र निर्माण यायेमाःगु धासें NCRS संस्थाया अक्षय कोष स्वयां क्यान्सर ल्वय् निवारण सम्बन्धित दीर्घकालीन योजना प्रस्ताव यायेत इनाप यानादिल ।

ज्याझ्वलय् नेवाः परम्पराकथं महानगरया प्रमुख लगायत प्रतिनिधिसभा व प्रदेशसभाया निर्वाचित जनप्रतिनिधिपिन्त सगं ब्यूगु खः । अथेहे, संस्थायात अक्षय कोष व भवन दयेकेत ग्वाहालि याःपिं दातापिं लिसें स्वास्थ्य शिविरय् ग्वाहालि याःपिं डाक्टर व संघसंस्थापिन्त सम्मान पत्र, प्रशंसा पत्र व कदर पत्र नं लःल्हाःगु खः ।

ज्याझ्वलय् क्षेत्र नं २ या प्रतिनिधिसभा दुजः कृष्णलाल महर्जन, क्षेत्र नं १ या प्रदेशसभा दुजः चेतनाथ संजेल व क्षेत्र नं ३ या राजकाजी महर्जन, प्रमुख जिल्ला अधिकारी महादेव पन्थ, संस्थापक सभापति ध्रुव बहादुर राउत, निवर्तमान सभापति केशर गोविन्द जोशी लिसें यलया वरिष्ठ व्यक्तित्व व संघसंस्थाया प्रतिनिधिपिनिगु उपस्थिति दुगु खः ।

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.