अमरराजया ‘बाखं’ म्यूजिक भिडियो सार्वजनिक

ने सं ११३८ कौला गाः चह्रे, येँ ।

वरिष्ठ संगीत स्रष्टा अमरराज शर्मा राजोपाध्यायया म्ये ‘बाखं’या म्यूजिक भिडियो सार्वजनिक जूगु दु । थौं यलय् ग्वसाः ग्वःगु छगू ज्याझ्वलय् उगु म्यूजिक भिडियो सार्वजनिक याःगु खः ।

किपाः विराज काजी राजाेपाध्याय

ज्याझ्वलय् म्येया बारे जानकारी ब्युसें म्ये च्वमि भगतदास श्रेष्ठं करीब ४ दशक न्ह्यः थम्हं तत्कालीन राजनैतीक परिवेशय् थुगु म्ये च्वयागु धयादिल । ४ दशक लिपा नं आम नागरिकं ह्यूपाःया आभाष यायेमखंगु धासें श्रेष्ठं दुःख प्वंकादिल ।

‘प्यंगू दशक न्ह्यः जिपिं प्रगतिशील अभियानय् जुयाच्वनागु इलय्या थुगु म्यें उगु हे ईया स्याःचाः न्ह्यब्वःगु खः’, लय् चिनामि वदन ज्वालानन्द राजोपाध्यायं धयादिल, ‘थुगु म्ये आः न्यनेबलय् थौंया हे परिवेशया बाखं न्यनाच्वना थें जू’ राजोपाध्यायया धापू खः ।

२०५४ सालपाखे थ्व म्ये ब्वाला म्येचालय् दुथ्याकागु खः । लिपा थुगु म्येयात हाकनं रिकर्डि‌ंग यानागु धाःसें न्हापाया म्ये व अाः न्यनेबलय् म्ये व हे खःसां सवालय् छुं बिस्कं पाइगु धाःगु दु । थुगु म्ये सः हाकनं अमरराजजु‌ं हे तयादीगु खःसा बाजं ग्वसा हरिशरण साय्मि यानादीगु खः । न्हापा हाइ स्केलय् हाःगु खःसा अाः लाे स्केलय् हाःगु खँ कनादिल ।

https://www.facebook.com/rajendra.manandhar.7906

भिडियोस थम्हं अमूर्त न्ह्यब्वया बीत स्वयागु निर्देशक पदम बज्राचार्यं धयादिल । दुनाच्वंगु भवन अले सम्पदायात देय्या अवस्थाया रुपं नं स्वयेफइगु अथवा भुखाय् पिडितया स्याःचाःया रुपं नं कायेफइगु बज्राचार्यया धापू खः ।

हालामि अमरराज शर्मा राजोपाध्यायं म्यूजिक भिडियो दयेकूपिं प्राविधिक व उकी ल्हाः दुपिं सकसितं सुभाय् ब्युसें म्ये दयेकूगु ईयात लुमंकादिल ।
भिडियोस म्ये च्वमि भगतदास श्रेष्ठं हे अभिनय यानादीगु दु । सार्वजनिक जूगु म्यूजिक भिडियोया छायाङ्कन प्रशन्न बज्राचार्यं यानादीगु दुसा सम्पादन व ग्राफिक्सया ज्या पदम बज्राचार्यं यानादीगु दु । निर्देशन पदम व दयां यानादीगु खः ।

बुखँ श्राेत विराजकाजी राजाेपाध्याय

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.